Read Biete 1 RICHISUINA 28 Bible Online

1 RICHISUINA 28 - Biete bible

1 RICHISUINA 28

¹Rêng Davida khan Israel ruaitu murdi Jerusalema ribûm rangin thu a pêk a. Khanchu, nam lupuihei, rêng sinithoa thla tina rithlâk kual ngai pôl ruaituhei, sipai ruaituhei, rêng neh a naipahei sum neh thil nei murdi chunga ruaituhei, milian neh pasalṭha murdihei kha Jerusalemah an ribûm tâk a.

²Davida kha an matonah â ding a, “Ki suapuihei neh ki mihei, ki ṭong hi lei ringai ta u. PUMAPA ke ringatna, Thuthlung Bôm siana rang In idet sin inlang iti ki lei ngaitua ngai a; khante, Tempil sinna rang inrua khom ki lei inrifûk diam tâk a.

³Khannisela, Pathianin ki ziangah, ‘Nang chu ridoi mi ni nit a, thisen ne sua rôn tâk sikin ker ming rangin In sin no tin e,’ a ti a.

⁴PUMAPA, Israelhei Pathian khan, keimah neh ker chihei kha Israelhei rênga kumkhuaka om rangin a ner thlang tâk a. Juda nam kha ruaitu nitna ituh mai rangin a lei rithlang a, ki pa naipahei lâi ata Israel murdi rêng rangin keimah hih a ne lei irthlang suak bîk a nit.

⁵Naipa itamkah a ne pêk a, khahei murdi lâiah khan Israelhei rêng rangin PUMAPA rama rêngṭhungmuna ṭhung rangin ki naipa Solomona hi a lei irthlang tâk a nit.

⁶“PUMAPA khan ki ziangah, ‘Ni naipa Solomona khan ki Tempil kha sin inding a ti. Ki naipa rangin ki lei rithlang tâk a; keimah a pa nîng ki ti.

⁷Ki thupêkhei neh ki dânhei atûna a zôm lam angkah hin a zôm maiin chu a ram kha kumkhuaka rangin indet mai ki ti,’ a ti a.

⁸“Khasikin, atûnah hin, ki mihei, ei Pathian riatah neh PUMAPA mi ribûm, Israelhei murdi mitmuah hin PUMAPA ei Pathian thupêk murdi iṭha takka zôm rangin nangni ki îthor a nit. Khanchu, hi ram iṭha tak hi lua mai nin ta, nin inunga nin richihei khom kumkhuaka rangin nin înlua thal mai thei rang a nit,” a ti a.

⁹Khanchu, Solomona ziangah, “Ki naipa, ni pa Pathian hi rian la, lungril iṭha rikip neh lungril ifân takkan a sin tho roh. PUMAPA khan lungril a en ngai a, lungrila ngaitua murdihei hi ai riat riai a nit; amah ni zongin chu mûng ni ta, nung ni songin chu kumkhuakan nang khâi pai a ti.

¹⁰Ridîn roh dua; a Tempil rithiang isin rangin PUMAPA khan nang a irthlang tâk a nit; irât takkan om inla, atûnah hin sin zel roh,” a ti a.

¹¹Khanungchu, Davida khan a naipa Solomona kha Tempil rilim murdihei, sum siabûmna in rilimhei, a chontan dang murdi rilimhei, Mun Rithiang Tak rilimhei, sual izâna ṭhungmun inrifûk rang dân rilimhei kha a pêk a.

¹²Khapenah khan a lungrila a lei ingaitua murdi PUMAPA in rikulsung tualzôl rilimhei, a vêl chontan murdi rilimhei, Pathian ina mangrua siabûmna in rilimhei neh PUMAPA ta ranga thil thâr inrithiang siana in rilimhei kha a pêk sa a.

¹³Davida khan thiampuhei, Levia chihei a pôl pôla an sin an thona rang dânhei, PUMAPA Ina sinthona rang dânhei, Tempila bûrbêl an enkol rang dânhei a pêk a.

¹⁴Tempil mang rang bûrbêlhei siamnaah rângkachak neh tangkaruahei izâk zâkâm imang rang hei,

¹⁵rângkachak meiser neh a sianaa rângkachak mang zâk rang hei,

¹⁶tangkarua dochamheia tangkarua mang zâk rang hei, ibai siana rângkachak docham heia, docham tina rângkachak mang zâk rang hei â ril a.

¹⁷Khabanah khan sa thurna ikhênṭak hei, berbuhei neh tâborhei siamnaa rângkachak rithiang tak mang zâk rang hei, khênghei siamnaa tangkarua neh rângkachak mang zâk rang hei,

¹⁸Namhoi hâlna mâichâm siamnaa rângkachak rithiang mang zâk rang hei, Cherubhei PUMAPA Thuthlung Bôm an rithla zâr rikhûhei chuangna tâli rilim siamnaa rângkachak rithiang mang zâk rang hei kha â ril riai a.

¹⁹Rêng Davida khan, “Hihei murdi hih sin dân rang, PUMAPA ngêiin a ne îril itho ngêt rang riziaknaah khan ai om riai a nit,” a ti a.

²⁰Rêng Davida khan a naipa Solomona ziangah, “Irât tak neh ihâi takkan om roh. Sin kha phut zel inla, îten nangin ringam no riseh. PUMAPA Pathian, a sin kî tho ngai kha ni ziangah om mai a ti. PUMAPA Ina sin murdi hi ni zoi riai mâkah chu nang ithlan nang marak no nih.

²¹Khante, Pathian Ina sin tinrêng isintu pôl thiampuhei neh Levia chihei an om a, îsin khomah lam tinrênga sin ithiam irât takka nang isan rang sin mihei ni ziangah om mai an ta; ruaituhei neh mipui murdi khomin ni thupêk kangân chu zôm mai an ti,” a ti a.