Read Biete 1 RICHISUINA 29 Bible Online

1 RICHISUINA 29 - Biete bible

1 RICHISUINA 29

¹Rêng Davida khan mipui ribûmhei ziangah, “Ki naipa Solomona hi Pathianin a irthlang chu a nit a; khannisela, a la naiinpangin a riatna a la roi a. A sin rang lak chu a roinpuia, a In sin rang lak miriam ta rang ni mak a, PUMAPA Pathian In rang a nit.

²Khangkan Tempil sinna ranga mangrua rângkachak hei, tangkarua hei, sumsen hei, thîr hei, thing hei, lungilu hei neh lungmantam chi dang danghei neh sâilungvârhei itam takka ki thei dôrkan ki lei bûm tâk a.

³Kha ki lei înrifûk thlâm tâkhei banah khan ki Pathian In hih ki kan tak tak sikin keima richon pial ata rângkachak neh tangkarua khom ki Pathian In rangin kî pêk a nit.

⁴Tempil banghei inrivôna rangin rângkachak iṭha chi talent sângithumkah neh tangkarua ṭha chi talent sângsarikah ki pêk a.

⁵Khahei kha lam dang danga mi kut ithiamhei mang ranga rângkachak hei, tangkarua hei mangna ranga tangkarua an mang ranga kî pêk chu a nit. Vuanah hin PUMAPA ta ranga ilôm taka pe phal tûm a om?” a ti a.

⁶Khanungchu, panam lupuihei, Israel nam ruaituhei, sipai ruaituhei, rêng neinun enkoltu ruaituhei khan ilôm takkan,

⁷Pathian In sinna mang rang thilhei an hong pêk a: rângkachak talent sângringakah, tangkarua talent sîngkah, sumsen talent sîngka neh sângiriatkah, thîr talent nuaikah an pêk a.

⁸Lungilu neihei khan PUMAPA sum sianah khan an hong pêk a. Amakha Gersona panama mi Jehiela khan a enkol a.

⁹Mipuihei kha an lôm tak tak a, iphal takka mahni lungsuak ngêia PUMAPA ta ranga pe an nit sikin an lôm tak tak a. Rêng Davida khom a lôm tak tak a.

¹⁰Davida khan mipui ribûm murdihei makung zelah khan PUMAPA ziangah lômthu â sîr a, “O PUMAPA kin pu Jakoba Pathian, kumtluangin inpâkin om roh.

¹¹O PUMAPA, roinpuina hei, sinthotheina hei, chôiinrisângna hei, nênahei, inlalna hei, hih ni ta a nit a, rinêng neh rivâna om murdi hi ni ta a nit. O PUMAPA, ram hi ni ta a nit a, mi murdi chunga ân chungtak ni nit.

¹²Richongna neh maritna hei hi ni zianga rithoka suak a nit a, tinrêng chungah thu ni nei a; ritha lian ni kutah a om a; ni kutah hin mi murdi roinpuina neh râtna pêk theina a om a.

¹³Atûnah hin, O kin Pathian lômthu nang kin ril a, ner ming roinpui hi kin înpâk a nit.

¹⁴“Nikhomsela, keimah neh ki mihei hin îte nang kin ipêk thei omak, thil murdi hi ni ziang ata kin idong a nit a, ni ta ngir kha nang kin hong ipêk nôk kêng ai nit.

¹⁵O PUMAPA kin pi neh puhei angkah khan ni maah hin khualmi neh khualzin angkah pai kin nit a; hi nuaia kin dam sung sûnhei chu rilîm angkah pai a nit a, tute ring rilon rang zel omak.

¹⁶O PUMAPA kin Pathian, ner ming rithiang ranga In nang kin sin pêkna ranga hi thil kin lei înrifûkhei murdi hih nangma ata suak a nit a; nangma ta korong a nit.

¹⁷Ki Pathian, nangman lungrilhei ni fia ngai a, felnahei ni lôm ngai iti ki riat. Lungril takkan hi thil murdi hih ilôm takkan ki hong lan a; khante, hintaka om ni mihei khomin iphal takka ni zianga thil an hong ilan hih ki mun kî lôm tak tak a nit.

¹⁸O PUMAPA, kin pu Abrahama, Isaka, Jakoba hei Pathian, ni mihein hingkana lungril an riput mai theina rangin an lungrilhei hi ni ta rangin indet roh.

¹⁹Khante, ki naipa Solomona hi ni thupêkhei murdi izôma hi thilhei murdi hih itho rang neh ki lei înrifûk thlâm tâk Tempil sin inding rangah hin lungril iṭha rikip inriput roh,” a ti a.

²⁰Khanungchu, Davida khan mipui murdi ziangah khan, “Tho, PUMAPA nin Pathian chu inpâk rei,” a ti a. Khanchu, mipui ribûm murdi khan PUMAPA, an pi neh puhei Pathian kha an inpâk a, an ikhûna, PUMAPA kha roinpuina an pêk a, rêng khom an chôiinrisâng sa a.

²¹Khante, atûkah chu ran an that a, PUMAPA ziangah ribôlna thillan an lan a, mipui khom an infâk sa a. Serâtchal sângkah, berachal sângkah neh berate sângkah an that a, mâichâmah hâlrivâm thillanin an lan a. Uain thillan khom an hong lan sa a.

²²Kha nî-ah khan PUMAPA makungah râiifân takkan an fâkin an in tâk a. A ṭum iniknan Solomona kha rêngin an inpuang nôk a. PUMAPA rimingin rêng rangin riak an inrithu a. Khante, Zadoka kha thiampu rangin riak an inrithu a.

²³Khanchu, Solomona kha PUMAPA îndet rêngṭhungmunah khan a pa Davida rithûlin rêngin â ṭhung tâk a. Rêng thluan itlung tak a nit a, Israelhei murdi khan a thu an izôm a nit.

²⁴Milianhei murdi, sipaihei murdi neh Davida naipa danghei murdi khomin rêng Solomona chunga iamom rangin ṭong an rikhâm a.

²⁵PUMAPA khan Solomona kha Israelhei murdi mitmuah natinsat takkan a chôiinrisânga, Israel ramah a matona rênghein an lai chang ngai ino, rêng inlalna roinpui tak kha ân dong a.

²⁶Jesaia naipa Davida kha Israelhei murdi chungah

²⁷kum sômilikah ân lal a. Hebron khuaah kum sarikah ân lal a, Jerusalemah kum sômithumkah kum ithumkah a înlal a nit.

²⁸Ûnlian tak, tarkûla damin, richong tak neh marit ilon a thi a, a naipa Solomona kha arthûlin a hong inlal tâk a.

²⁹Rêng Davida thurchi chu a bul ata a mong idênin, zânthla Samuela lekhabu hei, zânthla Nathana lekhabu hei, zânthla Gada lekhabuah hei ai chuang a nit.

³⁰A roirêl dân thu hei, a thiltho theizia murdi hei, a chunga thil itlung hei, Israelhei neh an kôlvêl ram chunga thil itlung murdi kha riziakah khan inchuang riai a nit.