Read Biete 1 RICHISUINA 4 Bible Online

1 RICHISUINA 4 - Biete bible

1 RICHISUINA 4

¹Hihei hi Juda richihei chu an nit: Perza, Hezrona, Karmia, Hora neh Sobala,

²Sobala khan Reaia a nei a, Reaia khan Jahata a nei a, Jahata khan Ahumaia neh Lahada a nei a, khahei kha Zora khuaa om namhei richibul an nit.

³Kaleba neh a nupui Efrati nai lutîr kha Hora a nit a, archihei khan Bethlehem khua an înding a nit. Hora khan naipa ithumkah Etama, Penuela neh Ezera a nei a. Etama khan naiipa ithumkah Jezreela, Isma, neh Idbasa neh nainu khatkah Hazelelponi a nei a. Penuela kha Gedor khua indingtu a nit a, Ezera kha Husa khua indingtu a nit.

⁵Tekoa khua indingtu Asura khan nupui inikah Heli neh Nari a nei a.

⁶Nari neh khan naiipa ilikah, Ahuzama, Hafera, Temenia neh Hahastaria an nei a.

⁷Heli neh khan naiipa ithumkah, Zeretha, Izara neh Ethnana an inei a nit.

⁸Koza khan Anuba neh Zobeba a nei a, ani kha Haruma naipa Aharhela rithoka nam zuang risuihei richibul khom a nit.

⁹Mi khatkah arming Jabesa a om a, ani kha a suapuihei nêka mi marit iom a nit a. A nu khan, “Dengthei takka kî nei a nit,” itin arming kha Jabesa ai sak a nit.

¹⁰Israelhei Pathian ziangah Jabesa kha a ṭongṭaia, “O Pathian, ṭhat ne vur inla, ki ramrî hi nen rizat pêk inla, ni kut khan ne ompui inla, inkhôkna ki chungah a tlung nona rangin sual ata ne khâi inrikiang roh,” a ti a. Khanchu, Pathian khan a thil ngên kha thluan ân tlung pêk a.

¹¹Saha inzirpuipa Kaleba khan naiipa Mehira a nei a. Mehira khan Estona a nei a.

¹²Estona khan naiipa ithumkah Bethrafa, Pasea neh Tehina a nei a. Tehina kha Nahasa khopui indingtu a nit. Hi mihei richi hi Rekaah an iom a nit.

¹³Kenaza khan naiipa inikah Othniela neh Seraia a nei a, Othniela khomin naiipa inikah Hathatha neh Meonothaia ai nei a nit.

¹⁴Meonothaia khan Ofra a nei a. Seraia khan Joaba a nei a, Joaba hi “Kutithiam Phâi” an iti muna omhei richibul a nit. Kha mihei kha kutithiam tak tak korong an nit.

¹⁵Jefunea naipa Kaleba khan naiipa ithumkah Irua, Ela, Naama hei a nei a, Ela khan Kenaza a nei a.

¹⁶Jehalalela khan naiipa ilikah Zifa, Zifaia, Tiria neh Asarela hei ai nei a nit.

¹⁷Ezra khan naiipa ilikah Jethera, Mereda, Efera neh Jalona hei a nei a. Mereda khan Faroa nainu Bithiaii nupuiin a nei a, nai nupang khatkah Miriami neh nai ipa inikah Samaia neh Isba hei ai nei a nit. Isba kha Estemoa khua indingtu a nit. Mereda khan Juda nam nupang nupuiin a nei sa a, naiipa ithumkah, Jereda, Hebera neh Jekuthiela hei a nei a. Jereda kha Gedora khua indingtu a nit a; Hebera kha Sokoa khua indingtu a nit a; Jekuthiela kha Zanoa khua indingtu a nit.

¹⁹Hodia khan Nahama farnu nupuiin a nei a. An naihei kha Keila khuaa om Garm namhei neh Estemoa khuaa om Maakat namhei richibulhei an nit.

²⁰Simona khan naiipa ilikah Amnona, Rinna, Benhanana neh Tilona hei ai nei a nit. Isia khan naiipa inikah Zohetha neh Benzohetha hei ai nei a nit.

²¹Juda nai Sela richihei chu hihei hi an nit: Era, Leka khua indingtu; Laada, Maresa khua indingtu; archihei chu Beth Asbea khuaa om, patpuan itônthiam namhei kha an nit.

²²Jokima neh Kozeba khuaa omhei; Joasa neh Sarafa, anni hin Moab nupanghei nupuiin an nei a, Bethlehem khuaah an iom tâk a nit. (An thurchi suina hi tianlâia mi a nit.)

²³Anni kha rêng sin itho a, bêlvuaktu an nit a, Netaim neh Gedera khuaa om an nit.

²⁴Simeona khan naiipa ringakah Nemuela, Jamina, Jariba, Zera, Shaula hei a nei a.

²⁵Shaula khan Saluma a nei a, Saluma khan Mibsama a nei a, Mibsama khan Misma ai nei a nit.

²⁶Misma khan Hamuela a nei a, Hamuela khan Zakura a nei a, Zakura khan Simeia ai nei a nit.

²⁷Simeia khan naiipa sômleiirukkah neh nai nupang irukkah a nei a. Khannisela, ân zirpuihei khan chu nai nei intam mak a; khasikin, Simeona richihei kha chu Juda richihei pung tam dôrkah chu an ipung ino a nit.

²⁸Rêng Davida inlal idêna Simeona richihei omna khopuihei chu: Beerseba, Molada, Hazar-Shual,

²⁹Bilha, Ezem, Tolad,

³⁰Bethuel, Horma, Ziglag,

³¹Beth-Markabot, Hazar-Sosim, Beth-Biri neh Saraim hei a nit.

³²Khabanah khan mun dang ringakah Etam, Ain, Rimon, Token, Asan khuahei neh

³³a kôlvêla khua chînhei murdi sim thlang tak Baalat khua dênin an iom sa a nit. Khahei kha an insungkua richi risuina neh an zuang omna riziak bua chuang an îkol chu a nit.

³⁴Hihei hi an panam tin lupuihei chu a nit: Mesobaba, Jamleka, Amazia naipa Josa, Joela, Jehua, (ani kha Asiela naipa Seraia nai Josiba naipa a nit), Elioenaia, Jaakoba, Jesohaia, Asaia, Adiela, Jesimiela, Benaia, Ziza hei an nit. Ziza kha Sifia nai a nit a, Sifia kha Alona nai a nit a, Alona kha Jedaia nai a nit a, Jedaia kha Simria nai a nit a, Simria kha Semaia a nit. An insungkuahei kha natinsat takkan an pung mai sikin,

³⁹tlâk lam tiang Gerar idên lôk kan an indar a, kha khopui omna sua tiang pang phâizôlah khan an berahei kha an înlêng ngai a nit.

⁴⁰Ram rizat tak, loisûl ṭhatna mun, ram ringum ningbei omna mun itam takkah an mu a. Kha rama lei iom ngaihei kha Hama richihei an nit.

⁴¹Judai ram rêng Hezekia inlal lâiah khan khi a chunga an riming riziakhei khi Gerarah an va fe a, khantaka lei iomhei in neh puan inhei kha an va siat pêk riai a. A mihei kha an ûm rizûla, an berahei inlêngna rang mun iṭha tak a nit sikin kha ram kha an iluapêk thal tâk a nit.

⁴²Khante, Simeona richihei lâia mi rizarngakah sua tiang Edomah an fe a. Anni kha Isia naipahei Pelatia, Nearia, Refaia neh Uziela hei khan ma an iruai pêk a.

⁴³Khanchu, Amalekhei nam armang bân la omhei kha an that a, atûn tenan kha munah khan an iom tâk a nit.