Read Biete 1 RICHISUINA 5 Bible Online

1 RICHISUINA 5 - Biete bible

1 RICHISUINA 5

¹Jakoba nai lutîr Reubena richihei chu hihei hi an nit: Ani kha nai lutîr chu a nit a; khannisela, a pa kûnpui ân nim sikin a nai lutîr nitna kha lah pêk a nit a, Israela nai Josefa naihei ziangah ilan a nit a, khasika khan richi suinaah nai ulian indôn zuang ridot lamah inchuang ai nit ino a nit.

²Juda richihei kha â rât tak a hong nit a, nam pumpui chungah ruaitu nitna ipe a nit. Khanniseh, nai lutîr nitna chu Josefa dongtum a nit.

³Jakoba nai uliantak Reubena khan naiipa ilikah Hanoka, Palua, Hezrona neh Karmia hei a nei a.

⁴Joela richihei rikhûk ridot dân chu hihei hi a nit; Semaia, Goga, Simeia, Mika, Reaia, Baala neh Beera hei an nit. Khante, Reuben nam ruaitu Beera kha Asuria rêng Tiglat Pilesera khan â ne a, suakin ai ṭhui a nit.

⁷Richisuinaa inchuang Reubena richi an panam ruaituhei chu: Jeiela, Zakaria neh Bela an nit.

⁸Bela kha Azaza nai a nit a, a pu kha Sema a nit, ani kha Joela panama mi a nit. Joela richihei hi Aroera khuaah an om a, mâr tiang ram Nebo ata Baal Meon idênin an iom a nit.

⁹Anni khan Gilead ramah khan bera neh kêl an nei intam ok a; khasika khan sua tianga Eufratis vadunga rithoka ramchâr lûtna dênin an ilua a nit.

¹⁰Rêng Saula dam lâiah khan Reuben namhei khan Hagarhei kha an va rûn a, an that a; khanchu, Gilead sua tiang pang ram kha an ilua pêk tâk a nit.

¹¹Reubena namhei idep mâr tiang pang Basan ramah Gada namhei kha Saleka dênin an om a.

¹²Joela panamhei kha â tam tak an nit a, â nikna chu Sefama panamhei an nit. Janaia neh Sefata panamhei kha Basan rama panam dang inikah â lian iom sa chu an nit.

¹³Gada nam sungah khan hi panam sarikahei khom hi itepsa an nit: Mikaela, Mesulama, Seba, Joraia, Jakana, Zia, Ebera.

¹⁴Annihei kha Huria naipa Abihaila richihei an nit. An rikhûk hang ridot dân chu Abihaila pa Huria, Huria pa Jaroa, Jaroa pa Gileada, Gileada pa Mikaela, Mikaela pa Jesisaia, Jesisaia pa Jadoa, Jadoa pa Buza a nit.

¹⁵Hi panamhei ruaitu chu Gunia nai Abdiela naipa Ahia a nit.

¹⁶Annihei kha Basan neh Gilead rama khopuiheiah an om a, Saron mual tlâng murdiah khan an iom a nit.

¹⁷Khahei murdi kha Judai ram rêng Jothama inlal lâi neh Israel ram rêng Jeroboama nikna inlal lâia richibulhei suinaah riziak suak a nit.

¹⁸Reubenhei, Gadhei, Manase nam rizâtkahei khan ipho neh chemsei imang thiam, thal kâp ithiam sipai mi sîngilikah sângilikah rizasarikah sômirukkah an nei a.

¹⁹Khante, Hagar nam Jetur hei, Nefis hei, Nodab hei idoi rangin an fe a.

²⁰Pathian chungah an iamna an ringat ngit a, sanna zongin a ziangah an ṭongṭai a, Pathianin an ṭongṭaina kha a sâm a, Hagarhei kha an rithloppui murdihei neh khan an inê tâk a.

²¹An irâlhei kut ata kha saringsei sîngringakah, bera nuai inikah neh sîngringakah, sakuartung sânginikah neh miriam nuaikah an man a.

²²Kha ridoi kha Pathian ṭhat tipui a nit sikin irâl mi itam takka an ithat a nit. Suaka an itâng idênin kha ram kha an ilua pêk mai tâk a nit.

²³Manasea richi nam rizâtkahei kha Basan ramah neh a mâr tiang ramah Baal Hermonheiah, Senirheiah, Hermon tlâng idênin an om a, a mi khom natinsat takkan an pung a.

²⁴Hihei hi an panam lupuihei chu an nit: Hefera, Isia, Eliela, Azriela, Jeremia, Hodavia neh Jadiela. An rêngkan râlpa an panam râlpa miriam riming inthang korong an nit.

²⁵Mihei khan an pi neh puhei Pathian chungah thil an thonsual a, an matona Pathianin a lei iûm isua pêk tâk namhei pathian kha chubai iûnin an pathian nung an song tâk a.

²⁶Khanchu, Israelhei Pathian khan Asuria rêng Pula (Tiglat Pilesera khom an ti ngai) khan an ram kha a rûn pêk a. Ani khan Reuben hei, Gad hei, Manase nam rizâtkahei kha a ṭhui a, Halaah hei, Haborah hei, Hara-ah hei neh Gozan vadung rikamheiah khan ân om a, atûn tenan a iom mai tâk a nit.