Read Biete 2 RICHISUINA 1 Bible Online

2 RICHISUINA 1 - Biete bible

2 RICHISUINA 1

¹Rêng Davida naipa Solomona khan Israel ram chu a thunuaiah idet takkan ân om riam a. PUMAPA a Pathian khan ṭhat a vur a, ritha rât takkan a siam a.

²Mi sângka ruituhei, rizaka ruituhei, sorkâr sinithohei, nam tin ruaituhei, Israel insungkua tin lupuihei neh Israel mipuihei chu

³Gibeon khuaah ife khai rangin thu a pêk a; amakhan Ritongna Puan-In, PUMAPA som Mosian ramchâra ai siam khah a lai om mai a nit.

⁴Thuthlung Bôm kha chu Davida khan Kiriat-Jearim ata a lâk a, Jerusalem khuaa Puan In ai siamah khan ai sia tâk a nit.

⁵Uria naipa Bezalela, Hora tupa isiam sumsen mâichâm khom khah Gibeonah hin Ritongna Puan-In kottualah a lai om a nit. Puan-In tualah khan Solomona neh mipuihei khan PUMAPA chubai an ûn a.

⁶Rêng khan PUMAPA ziangah hâlrivâm thillanin ran sângkah a lan a, Puan-In kottuala sumsen mâichâmah khan a hâl rivâm riai a.

⁷Kha zânah khan Pathian chu Solomona ziangah ân lâr a, “Im nang ipeh ranga ni ne inuam,” a ti pêk a.

⁸Solomona khan a sâm a, “Ki pa Davida khah ni kan tak tak ngai a, atûnah hin â nung ithûlin rêngin ni ne siam tâk a.

⁹O PUMAPA Pathian, ki pa zianga ni ṭonginkung kha lo intluk roh. Rinênga pilvut dôra tam mihei chungah rêngin ni ne siam a;

¹⁰Khaangkan an chungah roi ki rêl thiamna rangin vârna neh riatthiamna ne peh roh. Khanonchu, ni mi hingka dôra tam hih ingkam roi ki rêl pêk thei rang?” a ti a.

¹¹Pathianin Solomona khah a sâm a, “Rithlangna dik tak nî nei a nit. Richongna hei, riming inthangna hei, ne râlhei nang ithat pêk rang hei, ring dam sôtna hei manih ni loiin an chunga rênga nang ki phunna ki mihei chunga roi ni rêl pêk theina rang vârna neh riatthiamna zongna châng ni riat a.

¹²Vârna neh riatthiamna chu nang peh ngêt ki ti; richongna hei, neinungna hei, ni matona lei inlal tâkhei neh la hong inlal ranghei nêka riming inthangna nang peh sâng ki ti,” a ti a.

¹³Solomona khan Gibeon khuaa munrisâng, Ritongna Puan-In omna khah a mâk a, Jerusalem tiang a kîr a, Israelhei chungah ân lal tâk a.

¹⁴Sakor tâli sânglei rizalika neh ridoi sakor sînglei sânginikah a nei a, a ṭhen chu Jerusalemah a dôn a, a dang chu khopui dang dangah a sia a.

¹⁵Ân lal sungin Jerusalemah khan rângkachak neh tangkarua chu lungchirithei angkah dôran a tam a, sidar thing khom theipui kung angkah dôran ai tam a nit.

¹⁶Solomona sakorhei chu Aigupta neh Kilikia rithoka hong ila lût a nit.

¹⁷Rêng rithûla rivai ithotuhei khan sakor tâli tangka rizarukkah chitin an richôk a, sakor khom tangka rizalei sômringakan an richôk a; amakhah Hit mihei neh Suria mihei ziangah an izuar nôk ngai a nit.