Read Biete 2 RICHISUINA 10 Bible Online

2 RICHISUINA 10 - Biete bible

2 RICHISUINA 10

¹Rehoboama chu Sekem khuaah a fe a, amakhan rênga siam rangin mâr tianga Israel mihei khah an hong ribûm a.

²Nebata naipa Jeroboama, rêng Solomona ṭi sika Aigupta rama zur bi khan a thi thu khah a lei riatin chu in tiang a hong kîr a.

³Mâr tiang mihei khan ani khah an koi a, an rêngkan a lômin Rehoboama ziangah an fe a, a ziangah,

⁴“Ni pa khan kin chungah puak irik tak arngat a, hi puak irikhei hih nangman nen zâng pêk ualin, kin ringnun hih nen hoi pêk ual inla, ni khua neh tui, ni thu zôm mihei nîng kin ti,” an ti a.

⁵Rehoboama khan, “Sûn thumka nungah hong nôk rei,” a ti a. Khanchu, mihei khah an fe tâk a.

⁶Rêng Rehoboama khan a pa Solomona dam lâia roiisakpui ngai ulianhei khah a va sôn a, “Hi mihei hih ingkan im sâm inlang nin ne tipui?” a ti a.

⁷Anni khan, “Hi mihei chungah hin lungkham nei inla, iṭha takkan risônpui roh; khanchu, ni thu zômin ni sin tho mai an ti,” itin an sâm a.

⁸Khannisela, ulianhei roisakpui khah ipom nuam mak a, tlangvâl, ama ruala, lungvâr â sak ngaihei khah â sôn a,

⁹“Hi mihei, ‘Ni pan kin puak a ne înrik pêk tak tak hih nangman nen zâng pêk roh,’ hong itituhei hih ingkan im lei sâm inlang nin ti,” a ti a.

¹⁰A vângpui tlangvâlhei khan, “Hi mihei, ‘Ni pan kin puak a ne înrik pêk tak tak hih nangman nen zâng pêk roh,’ hong itituhei hih hingkan lei sâm roh, ‘Ki kutte khom hih ki pa kong nêkan ai khir ual a nit.

¹¹Ki pa khan nin chungah puak irik tak tak arngat a, amakhah keiman ki înribôk ual rang a nit. Ani khan zêpna ruirualin nangni a zêp ngai a, khan keiman chu lâidângin nin vun lâi ki ti,’ itin anni chu lei iril roh,” an ti a.

¹²Sûn thumka nungah chu Jeroboama neh Israelhei khah, a ti pêk lam angkan Rehoboama ziangah an hong a.

¹³Rêng khan ulianhei roisakpui khah zôm nuam loiin mihei khah inrum takkan â sôn a.

¹⁴Tlangvâlhei roisakpui lam angkah khan Rehoboama khan mihei ziangah, “Ki pa khan nin chungah puak irik tak a irngat a nit a, amakhah keiman ki înribôk ual rang a nit. Ani khan zêpna ruirualin nangni a zêp ngai a, khan keiman chu lâidângin nin vun lâi ki ti,” a ti pêk a.

¹⁵Rêng khan mipui thu khah ai ngaisak nuam khâi ino a nit, Silo mi zânthla Ahija zianga Nebata naipa Jeroboama chungchâng PUMAPA Pathianin a îsîr khah a hong tlung rikip theina rangin khangkan Pathianin a întho a nit.

¹⁶Israel mihei chu rêng khan an thu ringaisak nuam mak iti an riatin chu rêng khah an sâm a: “Davida ramah chan im ei nei a? Jesaia richihei lâiah rangtum im ei inei? Davida richihei chu an om omin om riseh, Israel mihei o, tho rei, in tiang fe tâng ei ti u,” itin an ikhêk a.

¹⁷Khanchu, Israel mihei chu an rihel tâk a, Judai ram huala omhei rêng rangin Jeroboama khah an mâk rak tâk.

¹⁸Rêng Rehoboama khan Adonirama, dândea sinitho pôl ruaitu chu Israelhei ikoi rangin a tir a, anni khan lungin an lei dêng that a. Khasikah khan Rehoboama chu a sakor tâliah a chuang vak vak a, Jerusalem tiang a rot tâk a.

¹⁹Khantaka rithokin chu Israel ram mâr tiang rêngram mihei khah Davida richihei idoiin atûn ten idênin an irhel mai tâk a nit.