Read Biete 2 RICHISUINA 12 Bible Online

2 RICHISUINA 12 - Biete bible

2 RICHISUINA 12

¹Rehoboama khan a hong inlal det tâk kaneh chu amah neh a mihei khan PUMAPA dân khah an mâk tâk a.

²Rehoboama ân lal kum ringanaah khan PUMAPA an ithla tâk sikin kuttum an tuang tâk a. Aigupta rêng Sisaka khan,

³sakor tâli sânglei rizanikah, sakor chungchuang mi sîngirukkah neh sipai tep zoi loi, Libia hei, Soki hei neh Kus ram sipai lômhei hong iṭhuiin Jerusalem a hong doi a.

⁴Judai ram khopui kul ineihei khah a lâk a, Jerusalem ten idênin a hong tlung a.

⁵Sisaka ṭi sika Judai ram ruaitu Jerusalema lâizâm hong ithohei neh rêng Rehoboama ziangah khan zânthla Semaia chu a fe a, an ziangah, “Amahih nin ranga PUMAPA thucha chu a nit. ‘Nin ne mâk tâk a, khaangkah ngirin atûnah hin kei khomin Sisaka kutah nangni kî mâkrak tâk a nit hih,’ a ti,” a ti pêk a.

⁶Rêng neh ruaituhei khan, an îsual tâk a nit iti an inpuang a, “Thil kin ithonsual tâk a nit, PUMAPA thiltho hih a îdik a nit,” an ti a.

⁷PUMAPA khan amakhah a mun chu, Semaia chu â sôn nôk a, a ziangah, “An îsual tâk a nit iti an ririat tâk sikin anni chu inrimang no ning e. Sisakan Jerusalem a hong doi tikin, ki ningthikna chu Sisaka mangin an chungah bun vang no ning a, a ṭhen chu an dam suak phal ki ti.

⁸Khannisela, Sisaka khan doi inê a ta; khanchu, ki sin itho neh nuai rêng sin itho riphêr tlia reh suak tâng an ti,” a ti a.

⁹Rêng Sisaka khan Jerusalem a hong rûn a, Tempil neh rêng-ina thil ilu omhei murdi khah a lâk riai a. Rêng Solomonan rângkachak ipho ai siamhei banah îtinrêng ai lak riai a nit.

¹⁰Kha phohei rithûlah khan Rehoboama khan dâr iphohei a siam a, rêng-in kotbâi vêngtuhei kutah ân kol a.

¹¹Rêng khah Tempilah a fe kipah vêngtuhei khan iphohei khah an chôi a, an zui a; khanchu, vêngtuhei chontanah khan an hong sia nôk ngai a.

¹²PUMAPA ziangah itlôm takka arbei riam tâk sikah khan, PUMAPA ningthik khan a înrimang vang khâi ino a nit. Judai ram mihei khom vângsak inṭumin an hong iom nôk thiai tâk a nit.

¹³Rehoboama chu Jerusalemah ân lal a, ân lal indet ok a. Rêng a changah khan kum sômilikah mi a nit a, Jerusalemah kum sômlei kum sarikah a înlal a nit. Israel ram pumpuiah kha khopui khah amah chubai ûnna mun ranga PUMAPA khan a irthlang a nit. Rehoboama nu chu Amon mi, Naami a nit.

¹⁴PUMAPA lungdo im ai nit iti ngaitua mak a, thil ṭhano khah a tho ngai a.

¹⁵A bula rithoka a mong idêna Rehoboama thiltho neh a insungkua thurchi chu zânthla Semaia thurchi riziakna bu-ah neh zânthla Idoa thurchi riziakna bu-ah khan ai chuang a nit. Rehoboama neh Jeroboama chu an irdoi mai ngai a nit.

¹⁶Rehoboama chu a thi a, Davida Khopuia rêng ithlânah khan an phûm a, a naipa Abija khan a rêng nitna khah a thûl tâk a.