Read Biete 2 RICHISUINA 13 Bible Online

2 RICHISUINA 13 - Biete bible

2 RICHISUINA 13

¹Israel rêng Jeroboama inlal a kum sômleiiriatnaah khan Abija kha Judai ram rêng a hong chang a,

²Jerusalemah kum ithumkah ân lal a. A nu chu Gibea kho mi Uriela nainu Mikaii a nit. Abija neh Jeroboama chu an ridoi tâk a.

³Abija khah sipai ihâi rithlang suak ngat nuai ilikah iṭhuiin arthok a, Jeroboama khan sipai ihâi rithlang suak ngat nuai iriatkah iṭhuiin a lei doi a.

⁴Efraim tlângramah khan sipai lômhei chu an ritong tâk a. Rêng Abija khah Zemaraim tlângsîpah a lui a, Jeroboama neh a sipaihei khah â sam a, “Ki ṭong hih lei ringai ta u,

⁵PUMAPA Israelhei Pathian khan, Davida neh archihei ziangah Israel mihei chunga lal nitna chu thu thlungin ai pêk tâk a nit iti nin iriat ino mani?

⁶Davida naipa, Solomona som Nebata naipa Jeroboama chu a pu rêng Solomona chungah arhel tâk a.

⁷Nungtiangah khan mi mangmunboihei a bûm khôm a, Solomona naipa Rehoboama khah an heng pai a; ani lak a la naiinpangin anni lei inar ngam rangin a lungril lak la puitling ino a nit a.

⁸Atûnah hin Davida richihei zianga rêng thuneina PUMAPA ipêk ikalin nin sipai itam neh Jeroboama serât rilim nin pathian ranga ai siam isongin nin hong irthok a nit a.

⁹PUMAPA thiampuhei neh Levia chihei khah nin ûm isua a, nam danghei tho dân angkan thiampu rang nin phun chop a. Serâtchal hong ikâi murdi neh bera sarika manih hong ikâi kangân chu, ‘Kin thiampu a nit’ iti rangin thiampun nin lei serinran nuam zel ngai a.

¹⁰“Keimani rêkin chu PUMAPA kin Pathian sin kin la tho mai a, ani chu kin la îma no a nit. Arona richia thiampuhei ngêiin an tho tum an tho a, Levia chihein an isan ngai a nit.

¹¹Zîng tin neh kholoi tin PUMAPA rang namhoi an hâl a, hâlrivâm thillanhei khom an ilan ngai a nit. Ibai iser khah docham rithiangah an sia mai a, kholoi tin rângkachaka siam meiser khom an la ihâl mai ngai a nit. Keimanin chu PUMAPA thupêk kin la zôm mai a, nangmani rêkin chu ani khah nin îma tâk a nit.

¹²Pathian ngêi khah ne ruaitu a nit a, a thiampuhei khom ridoinaa bekul itum rangin an irsiam ṭian mai a nit. O Israelhei, PUMAPA nin chibulhei Pathian hih doi tlak no rei. Inê thei no tin u,” a ti a.

¹³Kha lâi tâkah khan Jeroboama khan a sipai ṭhenkah Juda sipaihei ruang lei ichuan rangin nungtiang a tir a, a danghei khan maton tianga lei idoi rangin a lei sia a.

¹⁴Judahei khan an thlîr vêlin chu an irâlhei khan an lei irhual khap tâk a nit iti an mu a. PUMAPA khah an isam a, thiampuhei khan bekulhei kha an tum a.

¹⁵Judahei chu an ikhêk rak rak a, Abija ruaina nuaiah an doi a; Pathianin Jeroboama neh Israel sipaihei khah â nê tâk a.

¹⁶Israelhei chu Judahei maah khan lâizâm an tho tâk a, Pathianin Judahei khah râtna ai pêk tâk a nit.

¹⁷Abija neh a sipaihei khan Israel sipaihei khah an inê tâk a, Israel sipai iṭha ṭha nuai ringakah an ithat a nit.

¹⁸Judahei khan an chibulhei Pathian, PUMAPA chungah an ringat sikin Israelhei khah an înê tâk a nit.

¹⁹Abija khan Jeroboama sipaihei khah arzûl a, an khopui ṭhenkah Bethel, Jesana, Efron khah a kôlvêl khotehei neh khan a lua pêk tâk a.

²⁰Abija rêng chang sungin Jeroboama khah iding suak nôk tak tak khâi mak a. A nungkhônah chu PUMAPA khan kuttum a tho a, ai thi tâk a nit.

²¹Abija kha chu a hong irât tîr tîr a nit. Nupui sômleiilikah a nei a, naiipa sôminikah inikah neh nai nupang sômleiirukkah ai nei a nit.

²²Abija thurchi dang, a thusîr neh a thil thohei chu zânthla Idoa thurchi riziakna bu-ah ai chuang a nit.