Read Biete 2 RICHISUINA 14 Bible Online

2 RICHISUINA 14 - Biete bible

2 RICHISUINA 14

¹Rêng Abija chu a thi a, Davida Khopuiah rêng ithlânah an phûm tâk a. A naipa Asa kha arthûlin ân lal a. Asa inlal kum sômka sung chu râlringam takkan an om a.

²Asa khan thil idik neh thil iṭha thon PUMAPA, a Pathian lung ân tluk pêk ngai a.

³Nam dang mâichâmhei neh an pathian isônna munhei ân rimang pêk a, an lung mirmilhei khah â khiak pêk a, pathiannu Aseri rilim thinghei khah â phûr riai a.

⁴Judai ram mihei khah PUMAPA, an chibulhei Pathian lungdo sin rang neh a dânhei neh a thupêkhei izôm rangin thu a pêk a.

⁵Judai ram kho tina nam dang pathian isônna mun risânghei neh an namhoi hâlna mâichâmhei ân boi riai a, ân lal sungah khan ram khah râlringam takkan an iom a nit.

⁶PUMAPA khan kum itam takah râlringam takkan ân om a, risual ridoina a om no sungah hin Judai rama khopuihei khah kulpuihei a siam a.

⁷Judai rama mihei ziangah, “Tho rei, ei khuahei hih siam inṭha nôk ei la, lungin kulpui siam ei ta, râlrungbûk risânghei, Kotbâi khârhei neh a kalhei siam ei ti u. PUMAPA ei Pathian lungdo ei la sin sikin hi ramah hin thuneitu ei lai nit a nit a; amah chu ei ipom sikin kil tinah râlringam takka om rangin a ne îhoih a nit,” a ti a. Khaangkan kulhei khah an siam a, vângisak inṭumin an iom a nit.

⁸Rêng Asa khan ipho neh ifei ichôi ngai, Judai rama rithokin sipai nuai ithumkah neh Benjamin rama rithokin ridoi ithiam ṭângipho neh phel ichôi ngai sipai nuai inikah neh sîngiriatkah a nei a; an rêngkan mihâi neh ridoi ithiam tak tak korong an nit.

⁹Ethiopia rama mi Zera khan sipai nuai sômkah neh sakor tâli rizathumkah iṭhuiin Judai ram a hong rûn a. Maresa ten a hong dên tâk a.

¹⁰Lei idoi rangin rêng Asa khah arthok suak a, Maresa kôl, Zefatha phâizôlah khan an ritong tâk a.

¹¹Asa chu PUMAPA a Pathian ziangah a ṭongṭai a, “O PUMAPA, sipai rât ino ualhei khom â rât ualhei nêka inrât theitu, nangma angkana tute omak. O PUMAPA, kin Pathian, atûnah hin ne zuang ṭangpui roh, nangmaah hin kin ringat a, ner ming ichingin hi mihei hih idoi rangin kin hong irthok a nit. O PUMAPA, kin Pathian ni nit; miriamin nang ngam tlak no riseh,” a ti a.

¹²PUMAPA khan Ethiopia mihei khah Asa neh Juda sipai maah khan â nê a, lâizâm an tho tâk a.

¹³Asa neh a sipaihei khan Gerar idên rakkan an rizûl a. Ethiopia mihei kha an that intam ok a, a lei idoi rang khom an iom thei khâi ino a nit. PUMAPA neh a sipaihei khan an inuai bit a, sipaihei khan râllâk sum khom itam takkah an lâk tâk a.

¹⁴Gerar neh a kôlvêla khopuihei khom khah an îsiat chit thei tâk a nit; khantaka mi omhei khan PUMAPA chu an iṭi tak tak a nit; sipaihei khan khopuihei khah an irok a, râllâk sum itam takkah an lâk a.

¹⁵Berapuhei riabuk murdi khom an hâl a, bera neh saringsei itam takkah an man a; khanungchu, Jerusalemah an kîr nôk tâk a.