Read Biete 2 RICHISUINA 15 Bible Online

2 RICHISUINA 15 - Biete bible

2 RICHISUINA 15

¹Obeda naipa Azaria chungah Pathian Rithla a zuang ṭum a.

²Rêng Asa imu rangin a fe a, â khêk suak a, “Rêng Asa, nangmani Judai ram neh Benjamin ram mihei o, ki thu hih ringai rei. A tiang nin ṭang sungkah chu PUMAPA khom nin tiang ṭang a ti; nin zongin chu mûng nin ta, nung nin songa a nitin chu nung nangni ai song rang a nit.

³Israelhei chu Pathian dik chubai ûn loiin isôtkah an om a, ân riseitu rang thiampu khom nei mak a, Dân iboiin an iom tâk a nit.

⁴Nikhomsela, lungzîngna an tongin chu PUMAPA Israelhei Pathian tiang an ngat a, Amah chu an zong a, an imu ngai a nit.

⁵Kha mumal nei loia an om lâiah khan ram chu a buai a, a buaina ân rik sikin ife hong ngam khom an iom ngai ino a nit.

⁶Nam khatkan nam dang an nuaisia a, khopui khatkan khopui dang a sirde a, Pathianin buaina neh lungkângna an chungah a îṭhum pêk a nit.

⁷Nangni chu irât takkan om unla, indôpin nin om rang ni tlak mak e. Nin sintho râ chu nin imu ngêt rang a nit,” a ti a.

⁸Rêng Asa khan zânthla Azaria, Obeda naipa thunpuang khah a riatin chu rithorna a pêk ok a, Judai ram neh Benjamin rama mirmil iom murdi chu ân boi vang tâk a, Efraim tlângram khua ai lâk murdihei ata khom ân boi vang a. Tempil tuala PUMAPA mâichâm khom a siaminṭhat nôk a.

⁹PUMAPA khan a ompui iti an riatin chu Efraim rama rithok hei, Manasea neh Simeona rama rithok hein a tianga ṭang rangin mi itam takkan an hong ribêl a. Asa khan kha mihei khah Judai ram neh Benjamin ram mihei neh khan a koibûm a.

¹⁰Asa inlal kum sômleiringana, a thla thumnaah khan Jerusalemah an hong ribûm a.

¹¹Kha nî-ah khan an râllâk serât rizasarikah neh bera sângsarikah PUMAPA ziangah ribôlnan an lan a.

¹²An chibulhei Pathian, PUMAPA chu lungril neh tititaka chubai iûn rangin thu an thlung a.

¹³Tukhom, itar mo ivâng mo, ipa mo nupang mo, Israelhei Pathian PUMAPA chubai ûn nuam ino chu ithat rang a nit an ti a.

¹⁴Rôl iring tak isuan PUMAPA riming ichingin ṭongrikhâmna an nei a, an thu thlung chu vong indet ngit rangin an inkung a, an ikhêk a, bekul an tum a.

¹⁵Tititaka thu an thlung inrual thei tâk sikin Judai ram mihei chu an lôm tak tak a. PUMAPA sinitho chu a hoi an ti a, ani khan a lei iham a, kil tinah ringeina ân lêng pêk a.

¹⁶A pi rêngnu Maaki khan Aseri rilim itiriom tak khah a phun sikin rêngnu a nitna khah a lîp pêk a. Asa khan Aseri rilim khah â phûr a, arkit a, a lek lekin Kidron phâizôlah khan a hâl tâk a.

¹⁷Ram sunga munrisâng, pathian dang an isônna ngai murdi khah rêng Asa khan inboi riai no khom seh a damsungkah chu PUMAPA bang a îtûk indet ngit a nit.

¹⁸A pa Abijan Pathian zianga thil ai pêk murdi khah Asa khan Tempilah a sia a; amah ngêiin rângkachak neh tangkarua ai lanhei khom khah ai sia sa a nit.

¹⁹A roirêl sung kum sômithumkah kum ringaka sung kha chu ridoina om nôk khâi mak.