Read Biete 2 RICHISUINA 16 Bible Online

2 RICHISUINA 16 - Biete bible

2 RICHISUINA 16

¹Judai ramah rêng Asa khah kum sômithumkah kum irukkah ân lal kumin Israel rêng Baasa khan Judai ram a hong rûn a, Judai rama rithokin mi tute an suak thei nona rangin neh tute an lût thei nona rangin Rama khuaah kulpui a siam a.

²Khasikah khan Asa khan Tempil sumsiana In ata tangkarua neh rângkachak a lâk suak a, Damaska khua om Suria rêng Benhadada ziangah a thon a, a ziangah,

³“Ki pa neh ni pa an lei irthlop ngai angkan eini khom tho rithlop ei ti. Hi tangkarua neh rângkachak hih nang ki hong ithon a nit. Atûnah hin Israel rêng Baasa neh nin rual richanna chu inmong inla, ki ram ata a sipaihei koi ikhîr nôk ta riseh,” a ti a.

⁴Benhadada khan Asa roisak khah ṭha a ti a, a sipai ruaituhei a koi a, Israel khopuihei irûn rangin a tir tâk a. Ijon, Dan, Abel Maim neh Naftali biala fasiarpui omna khua murdi khah a lâk a.

⁵Kha thil khah rêng Baasan a riatin chu Rama kho kulpui ai siam khah arngam a, a sin khah a mâk rak tâk a.

⁶Rama khua kulpui siamna rang lung neh thinghei khah ilah rangin Judai ram mi murdi khah Asa khan â phung a, Geba neh Mizpa kulpui siamna rangin an mang tâk a.

⁷Kha lâi zoroah khan zânthla Hanania chu rêng Asa ziangah a fe a, a ziangah, “PUMAPA ni Pathian chunga ringat nêkan Suria rêng chungah ner ngat a, Israel sipaihei chu ni kut ata an izôk tâk a nit.

⁸Ethiopia neh Libia mihei khan sipai neh sakor tâli itamkah neh sakor chungchuang mi itam takkah an inei ni mak ima kha? Nikhomseh, PUMAPA chungah ner ngat a, Aman nêna nang ai pêk a nit kha.

⁹PUMAPA chu ama iam ngittuhei chu iṭangpui rangin rammual mun tinah a mit a înlêng mai ngai a nit. Invêt chângin ni châng tâk a; khasikin, atûn ata chu ridoipui rang nî nei mai rang tâk a nit,” a ti a.

¹⁰Kha thu sikin zânthla chungah khan Asa khah a ning a thik tak tak a, zingzirin a khuap a, tâng inah a khum tâk a. Khantaka rithokah khan chu Asa khan mi dang chungah khom nuniter takka kut iṭhum ai phut tâk a nit.

¹¹Asa inlal phuta rithoka a mong idêna thurchi khah Juda neh Israel Rênghei Thurchi Riziakna Bu-ah inchuang a nit.

¹²Asa chu kum sômithumkah ikuakkah ân lal kumin a ke â pân a, a ke â bâi tâk a. Khan khoma PUMAPA tiang pan loiin dâktor a pan lem a.

¹³Kum inika nungah chu ai thi tâk a nit.

¹⁴Davida khopuiah, ama thlân ranga lung a îpûkah khan an phûm tâk a. An phûm maah khan namhoi dîhei neh riak namhoihei an nâl a, amah an ṭâ nan meipui an sêm vung vung a.