Read Biete 2 RICHISUINA 17 Bible Online

2 RICHISUINA 17 - Biete bible

2 RICHISUINA 17

¹Jehosafata kha a pa Asa rithûlin rêng a hong chang tâk a, Israelhei idoi thei rangin a dingmun a siaminṭhat a.

²Judai ram kul inei khuaheiah, Judai ram tlângramheiah neh Asa lei ilâk Efraim ram huala khopuiheiah khan a sipaihei ai sia a nit.

³Ân lal phut lâia a pa itho angkah khan Jehosafata khomin a tho a, Baal chubai ûn nuam mak a. Khasikah khan PUMAPA khan Jehosafata chu ṭhat ai vur a nit.

⁴A chibulhei Pathian sin a tho a, Pathian thupêkhei a zôm a, Israel rênghei angkan ai om ino a nit.

⁵PUMAPA khan Jehosafata khah Judai ramah rêng idetin a siam a, mihei khan thilpêk an hong pêk zut zut a, a hong richong tâk a, mihei ringai risâng khom a lo tak tak tâk a.

⁶PUMAPA sin itho chu a nuamlam tak a nit a, mirmil pathian biakna mun risânghei, pathiannu Aseri rilimhei khah Judai rama rithokin a înboi riai tâk a nit.

⁷Kum ithumkah ân lal kumah khan a milian Benhaila, Obadia, Zakaria, Nathanela neh Mikaia hei khah Judai ram khopuiheiah mi inrisei rangin a tir suak a.

⁸Levia chihei mi ikuakkah neh thiampu inikah an fe sa a. Levia chihei khah Semaia, Nethania, Zebadia, Asahela, Semiramota, Jehonathana, Adonija, Tobija neh Tobadonija hei an nit a; thiampuhei khah Elisama neh Jehorama an nit.

⁹PUMAPA Dân lekhabu khah an chôi a, Judai ram chu an rifang suak a, mihei khah an inrisei a.

¹⁰A kôlvêla rêngram murdihei khah Jehosafata doi ngam loi rangin PUMAPA khan thâi indôpin a siam riai a.

¹¹Filistia mi ṭhenkahein tangkarua neh thil dang itam takkah thilpêkin Jehosafata khah an hong pêk a. Arab mi ṭhenkah khomin bera sângsarikah rizasarikah neh kêl sângsarikah rizasarikah an hong pêk a.

¹²Khanchu, Jehosafata khah ân lal tîr tîr a, Judai ram pumpuiah khan kulpuihei a siam a, khopuihei ân ding a.

¹³Kha munheiah khan fâk itam takkah a bûm a. Jerusalem khuaah a sipai ruaitu lian mihâi tak takhei khah a sia a.

¹⁴A panam namin mahni nam ruaitu an nei chit a, Juda nam sipai ruaitu chu Adna a nit a, sipai nuai ithumkah â rui a;

¹⁵a thuai zela ruaitu chu Jehohanana a nit a, sipai nuaiinikah sîngiriatkah â rui a;

¹⁶â thumna ruaitu chu Zikria naipa Amasia a nit a, sipai nuaiinikah â rui a. (Amasia hi hingkana PUMAPA sinitho ranga ripe a nit.)

¹⁷Benjamin nama ruaitu chu, sipai ihâi tak Eliada a nit a, sipai nuaiinikah ṭângipho neh phel ichôihei â rui a.

¹⁸A thuai zela ruaitu chu Jehozabada a nit a, ridoi ranga rifo diam sipai nuailei sîngiriatkah â îrui a nit.

¹⁹Hi sipaihei hin Jerusalemah rêng sin an tho a, anni banah Judai ram kul inei khuaheiah sipai danghei ai sia sa a nit.