Read Biete 2 RICHISUINA 18 Bible Online

2 RICHISUINA 18 - Biete bible

2 RICHISUINA 18

¹Juda rêng Jehosafata khah archong a, arming a hong inthang tâk tenan chu, Israel rêng Ahaba neh rikop rangin an ngaitua a, an insungkua mihei an inrinei risak a.

²Kum itam a thleng nungin Jehosafata chu Ahaba pan rangin Samaria khuaah a zu fe a. Jehosafata neh ai ṭhuihei lei ilômnan Ahaba khan bera neh serât itam takkah a that a, ruai â ṭhe a, Gilead biala Ramot khua idoipui rangin Jehosafata khah â thlêm a.

³Ani khan, “Ramot khua idoi rangin ne fepui ni tîm?” a ti a. Jehosafata khan, “Ife ranga ner zoi tik tikah ife rangin keimah neh ki sipaihei hih kin irfo diam a nit, nang thlop kin ti,” itin a sâm a.

⁴“Khan PUMAPA la sôn masa hi ei ti,” a ti sa a.

⁵Khaangkan Ahaba khan zânthla rizalikah vêl a koi a, “Ramot khua ifen kî rûn rang im, kî rûn ino rang im?” itin anni chu ardon a. Anni khan a ziangah, “Rûn roh, Pathianin nêna nang pêng a ti,” itin an sâm a.

⁶Khanniseh, Jehosafata khan, “Zânthla dang PUMAPA ne sôn pêk thei rang an iom ino mani?” a ti a.

⁷Ahaba khan, “Khatkah, Imla naipa Mikaia chu a la om sa; khannisela, thil iṭha rêng rêng a ne rillôk pêk ngai no sikin kî nel a nit, thil ṭhano îtak manih hih ai rillôk ngai a nit,” a ti a. Jehosafata khan, “Rêng takin chu khangkah khan chu ni ti rang ni mak dua,” a ti a.

⁸Rêng khan ruaitu khatkah a koi a, Mikaia hong iṭhui rangin a tir a.

⁹Rêng inikahei ruai khah Samaria khopui kotbâi putiang rîzôlah, rêngṭhungmun an idoah khan rêng thluka rithlukin an iṭhung a; zânthla lômhei khan an matonah khan thu an inpuang suai suai a.

¹⁰An lâia khatkah, Kenana naipa Zedekia khan thîrin sarki rilim a siam a, Ahaba ziangah, “PUMAPA khan hingkan a ti, ‘Suria mihei chu amahin doi ni ta, inê ngêt ni ti,’ a ti,” a ti a.

¹¹Zânthla danghei khom khan khangkah ngirah khan an ti a, “Fen la, Ramot khua chu hang rûn roh, inê ngêt ni ti, PUMAPA khan nêna nang pêng a ti,” an ti a.

¹²Mikaia ṭhui ranga an itir khan a ziangah, “Zânthla dang rêng rêngin ṭhat lam tiang rêng ziangah thu an inpuang a, nang khomin kha angkana nî tho ṭhâng a ti,” a ti pêk a.

¹³Khannisela, Mikaia khan, “PUMAPA ring riming ichingin kî ti a nit. Ki Pathianin inpuang ranga a ne îril tak kha ki înpuang rang a nit,” itin a sâm a.

¹⁴Rêng Ahaba ziang an va tlungin chu rêng khan, “Mikai, rêng Jehosafata neh hin Ramot khua kin irûn rang im kin irûn ino rang im?” a ti a. Mikaia khan, “Hang rûn rei ba! Inê ngêt nin ti. PUMAPA khan nêna nang pêng a ti,” itin a sâm a.

¹⁵Nikhomseh, Ahaba khan, “PUMAPA riminga ki ziangah thu ne sîrin thudik bang ne ril ngai roh voi izâkâm kî ti rang?” a ti a.

¹⁶Mikaia khan a sâm a, “Bera â enkoltu nei ino angkan Israel mihei chu itlângah rithek indarin ki mu. Khabanah, PUMAPA khan, ‘Hi mihei hin ruaitu nei mak e; hi mihei hih thlaringamin in tiang kîr nôk tiat ta riseh,’ a ti,” a ti a.

¹⁷Ahaba khan Jehosafata ziangah, “En roh, ki ta rangin thil iṭha îte inpuang tlak ngai mak iti nang ke ril im ki ta; thil ṭhano tiang bang kêng a înpuang ngai,” a ti a.

¹⁸Mikaia khan a la sîr zom mai a, “PUMAPA thu hih lei ringai roh. Rivâna a rêngṭhungmuna ṭhungin PUMAPA chu ki mu a, vân Angelhei khan an rihual tûng a.

¹⁹PUMAPA khan, ‘Tûm Ahaba ziangah zu ṭum a, Ramot irûna thi rangin a zu lêm rang?’ a ti a. Vân Angel a ṭhenin thu khatkah an isîr a, a dangin thu dang an isîr a.

²⁰Rithla khatkah hih matiang a hong a, PUMAPA makungah a va ding a, ‘Keiman zu lêm ki ti,’ a ti a. PUMAPA khan, ‘Ingkan im ni lêm rang?’ itin ardon a.

²¹Rithla khan, ‘Ahaba zânthlahei chu thuno zûn ril ki ti,’ itin a sâm a. PUMAPA khan, ‘Fen la, khangkah khan zu tho roh, lêm thei ngêt ni ti,’ a ti a.

²²“Khaangkah khan a nit PUMAPA khan hi zânthlahei hih ni ziangah thuno a înril a nit. Amah PUMAPA ngêiin ni siatna rang thu khah a înkung thlâm tâk a nit,” a ti a.

²³Zânthla Zedekia khan Mikaia khah a pun a, a mâiah â bên a, a ziangah, “Tiklâia rithoka khan im PUMAPA rithla khan a ne mâk a, ni ziangah thu a îsîr tâk?” a ti a.

²⁴Mikaia khan a sâm a, “Chontan inril takah ribi ranga ni lût tikin riang ni ti,” a ti a.

²⁵Khanchu, rêng Ahaba khan ruaitu khatkah thu a pêk a, “Mikaia khah man inla, khopui optu Amona ziangah ṭhui inla, rêng naipa Joasa khom inmuh roh.

²⁶Idam riamka ki hong kîr nôk mâkah chu tâng ina khum rangin anni chu iril inla, ibai neh tui ringot peh riseh,” a ti a.

²⁷Mikaia khan, “Idam takka ni hong kîr nôkin chu PUMAPA khan a ne îsôn ino nîng a ti. Mi tinin ki ṭong hih reh seng riseh,” a ti a.

²⁸Khanchu, rêng Ahaba neh Juda rêng Jehosafata khah Gilead biala om Ramot khopui irûn rangin an fe tâk a.

²⁹Ahaba khan Jehosafata ziangah, “Rituk ei phutin chu ker vodân indanglam ki ta, nang chu ni rêng thlukin rivo mai roh,” a ti pêk a. Israel rêng khah arvo dân indanglamin rituknaah khan a ṭang tâk a.

³⁰Suria rêng khan a sakor tâli ruituhei khah Israel rêng ti no chu tute doi loi rangin thu a pêk thlâm a.

³¹Khahei khan rêng Jehosafata an mun chu Israel rêng manih an ti a, an hong doi tâk a. Khanniseh, Jehosafata khah â khêk suak a, PUMAPA khan a zuang san isua tâk a, a hong idoituhei khah ân rot pêk tâk a.

³²Sakor tâli ruituhei khan ani khah Israel rêng ni mak iti an mun chu rizûl nuam khâi mak a.

³³Khante, tum bîk nei iloia Suria sipaihei thal kâp ilêng pai pai khan rêng Ahaba khah a râlthluktla rizomna kâr takah a tok fûk rop a. A sakor tâlipu ziangah khan, “Kî pop tâk kêng, rihêl inla, rituk bual ata hih itlân suak ta roh,” itin â khêk suak a.

³⁴An ridoi ṭuk ṭuk lâiah khan Ahaba chu a sakor tâli chungah khan Suria mihei tiang ingatin artung ṭian a, inî a tlâk tenan chu a thi tâk a.