Read Biete 2 RICHISUINA 19 Bible Online

2 RICHISUINA 19 - Biete bible

2 RICHISUINA 19

¹Juda rêng Jehosafata chu a rêng-inah Jerusalemah khan idam takkan a kîr nôk a.

²Zânthla khatkah, Henana naipa Jehua chu ama mu rangin a hong a, a ziangah, “Mi sual iṭangpuia, PUMAPA neltuhei tianga ṭang hih a ṭhatin nî be mani? Ni thiltho khan PUMAPA ningthikna ni chungah a zuang îṭhum a nit hih.

³Khan khomin ṭhatna chu nî nei a nit. Mihein an îsôn ngai pathiannu Aseri rilimhei ni pai vang a, PUMAPA nuamlam isin nî tum hih,” a ti a.

⁴Jehosafata chu Jerusalemah a om a, a takritâi tak tak a; sim mong Beersebaa rithokin mâr tiang Efraim tlâng mong idênin a khuahei khah PUMAPA an chibulhei Pathian tianga inngat nôk rang itumin arfang mai ngai a.

⁵Judai rama kul inei kho tinah khan roirêltuhei a sia a,

⁶anni khah hingka hin thu a pêk a, “Thu nin tanin iṭha takkan ridîn rei, nin sin hih miriam thua tho ni mak chei u a, PUMAPA thua rêl nin nit a, nin thu rêl khah PUMAPA irêl a nit iti reh mai rei.

⁷PUMAPA chu ṭi unla, ridîn takkan châng rei, PUMAPA, ei Pathian hin leprûkna, thleibîkna neh fâkinrûkna hih ai nel a nit,” a ti a.

⁸Jerusalemah khan Jehosafata khan Levia chihei, thiampuhei neh ruaitu lianhei ṭhenkah chu roirêltu rangin a phun a. PUMAPA Dân zôm ino thuhei neh khotlâng dân thuheia kho mihei kâra thubuai ingaituatu rang an nit.

⁹Hingka hin a ti pêk a, “PUMAPA ṭi pumin nin sin hih nin tho rang a nit; nin itho murdi iamom takkan a thu zômin nin tho ngai rang a nit.

¹⁰Tak khua rithok khomin nin chipuihein miriam that thu manih, dân neh thupêk zôm ino thu manih an hong ithluna a nitin chu, an thu nin ngaitua sunga an om rang dân khah iṭha takkan iril ngai rei, PUMAPA chungah thonchâi nôkin thiamno an chang lôiin. Khangkan nin tho non chu nangmani neh nin chipuihei khan PUMAPA ningthik inrît ritem nin ti. Khan nin sintum nin sina a nitin chu thiamno changin om no tin u.

¹¹Sakhua tiang thilah khan thiampu laltak Amaria thu inchung tak a ta, khotlâng thilah chu Judai ram optu Zebadia, Ismaela naipa thu inchung tak a ti. Levia chihei hin roirêltuhei thurêl khah ilenin a om iti rianfel khah an mophurna nîng a ti. Ihâi takkan om unla, hi thupêkhei hih len suak rei; PUMAPA chu mi dik tiang ṭang riseh,” a ti a.