Read Biete 2 RICHISUINA 2 Bible Online

2 RICHISUINA 2 - Biete bible

2 RICHISUINA 2

¹Rêng Solomona khan PUMAPA chubai ûnnah rang Tempil neh ama ta rang rêng-in isin a tum tâk a.

²Thil ibûm rangin mi sîngsarikah â ruai a, lung isuk rangin mi sîngiriatkah ai mang a nit. Sinithohei enkoltu rangin mi sângithumkah rizarukkah a phun sa a.

³Solomona khan Tura rêng Hirama ziangah palâi a tir a, “Ki pa Davida ta ranga sidar thing ni îtol pêk ngai angkah khan kei khom ne zuang itol pêk roh.

⁴PUMAPA ki Pathian chôiinrisâng rangin Tempil kî sin rang a nit a, keimah neh ki mihei rangin mun iser nîng a ta, amakhan namhoihei ihâlin kin Pathian kin îsôn ngai rang a nit; ibai iser khom amakhan lan mai ngai kin ta, zîng neh kholoiah hei, sabatnî hei, thla thar kût heiah neh kût nikhua dangheia hâlrivâm thillan, PUMAPA kin Pathian zianga kin lanna rang kî sin rang a nit. Khangkana amah chôiinrisâng rangin Israelhei chu kin Pathian hin thu ai pêk a nit.

⁵Tempil roinpui tak isin kî tum a nit a, kin Pathian chu pathian dang nêka roinpui a nit a.

⁶Tititakin chu, Pathian rang tutên In isin thei ngai chu ni mak a, rivânah khin khom a îleng ino a nit a; Pathian ranga namhoi hâlna rang mun ti no chu keima mite hin a In rang isin pêk thei ngai chi ni mang e.

⁷Rângkachak hei, tangkarua hei, dâr hei inluan ithiam, thîr isuk ithiam; pat dum hei, senduk hei neh a seninlâr isiam thiam mi ne hong tir pêk inla, ki pa Davidan Judai ram neh Jerusalema kutithiam a lei irthlang suakhei neh munkan sin an itho tlâng rang a nit.

⁸Ni mihei kutthiamzia kha kî riat a nit. Lebanon tlânga sidar thing hei, ifâr thing hei, algum thing hei ne hong thon sa roh. Ni mihei iṭangpui rangin mi khom hong tir zel ki ti.

⁹Tempil isin kî tum hih ai lianin ai roinpui tak tak rang a nit a, iât thing kin inang ok rang a nit.

¹⁰Ni mi sin ni înthohei rang huit ṭin nuaiilikah, barli ṭin nuaiilikah, uain ṭin sângilikah, oliv riak ṭin sîngilikah hong tum ki ti,” a ti a.

¹¹Rêng Hirama khan Solomona chu lekha a thon a, “PUMAPA khan a mihei chu lung a thlung a, an rêng rangin nang ai siam a nit.

¹²Israelhei Pathian, PUMAPA rinêng neh rivân isiamtu chu inpâkin om riseh. Rêng Davida chu naipa vâr tak neh riatthiamna nei tak a pêk a, ani khan PUMAPA Tempil neh ama omna rang in isin ai tum a nit.

¹³Mi vâr, kutithiam tak, Hurama ki hong itir a nit.

¹⁴A nu chu Dana richia mi a nit a, a pa chu Tura kho mi rilun a nit. Rângkachak hei, tangkarua hei, dâr hei, thîr hei, lung hei, thing hei imangin thil siamsuak dân a thiam tak tak a; pat dum hei, senduk hei, seninlâr hei neh a patzâi rimihei khom ai tôn thiam tak tak a nit. Thil inluan a thiam a, ei iril lam angkah takin ai tho thei ngai a nit. Nangma mi kutithiamhei neh ni pa Davida lei imanghei neh khan munkan sin riseh.

¹⁵Khaangkan, atûnah hin huit hei, barli hei, uain hei, oliv riak hei kha chu ne pe ranga nen kung lam angkah khan ne hong thon roh.

¹⁶Lebanon tlânga rithokin ni nang dôrkah sidar thing iphûr kin ta, khit itêl kin ta, Joppa dênin tuipuiah zuang itol kin ti. Khantaka rithokin chu nangman Jerusalemah la chôi ta roh,” a ti a.

¹⁷Rêng Solomona khan a pa lei tho lam angkan Israel rama nam dang iom murdi a tep a, in neh loi inei mi nuaikah neh sîngringakah sângithumkah neh rizarukkah an om a.

¹⁸Mi sîngsarikah chu thil rithak vêl rangin a tir a, mi sîngiriatka khan itlânga lung an hang lâk a, sinithohei enkoltu rang mi sângithumkah neh rizarukkah a sia sa a.