Read Biete 2 RICHISUINA 20 Bible Online

2 RICHISUINA 20 - Biete bible

2 RICHISUINA 20

¹Zoro itôika nungah chu Moabhei neh Amonhei khan Meunhei neh rithlopin Judai ram an hong rûn a.

²Mi ṭhenkah an hong a, Jehosafata ziangah, “Tuipui Ithi râl, Edom ram tianga rithokin sipai itam takka nang idoi rangin an hong a, Hazazon Tamar khua khom an hong ilâk zoi tâk a nit,” an ti a. (Ama hih Engedi khua riming dang a nit sa.)

³Jehosafata chu â lung a zîng tak tak a, a tho rang dân thu-ah PUMAPA ziangah a ṭongṭai tâk a. Khanungchu, ram pumpuiah bu ngei rangin thupêk â sua tâk a.

⁴Judai ram khotina rithokin PUMAPA sôn rangin mi an hong ribûm zut zut a.

⁵Kha mihei neh Jerusalem mihei khah Tempil tual siam itharah khan an ribûm a. Rêng Jehosafata chu a fe a, an matonah khan a va ding a.

⁶Iring takkan a ṭongṭai a, “O PUMAPA, kin chibulhei Pathian, rivâna rithokin rammuala nam tin tinhei chungah roi nî rêl ngai a nit. Nang chu thunei tak neh sinithothei tak ni nit a, tutên nang ikal thei no nih.

⁷Nang chu kin Pathian ni nit. Ni mi Israelhei hi ramah hin an lûtah khan hi rama lei iom ngai mihei khah ni ûm isua a, ni mal, Abrahama richihein kumkhuaka an nei rangin nî pêk a nit.

⁸Hi rama hin an om tâk a, nangmah chubai nang an ûnna rang Tempil khom an sin a.

⁹Kuttum ne thona rangin khandai hei, ripui hei, iṭâm hei, thil ṭhano tinrêng hong tlung khom seh, hi Tempil, nangmah nang isônna ranga ni înkungah hin iding an ta, an lungzîng lâiin ni ziangah ṭongṭai an ta, nangman lei riang ni ta, inzôk ni ti, iti an iriat a nit.

¹⁰“Ringai ta, atûnah hin Amon mihei, Moab mihei neh Edom mihei khan an ne hong doi tâk a. Kin chibulhei Aigupta ram ata an hong suakah khan an rama thleng rangin phal mak che a. Khaangkan kin chibulhei khan an ramhei ilôiin anni chu an înrimang ino a nit.

¹¹Enta, hingka hin kêng an ne ithung tâk, kin dongtum ranga ni ne ipêk ram ata ne ûm isua tumin an hong irthok a nit hih.

¹²O kin Pathian, an chungah hin roirêl roh; ne doi rang sipaihei hih an tam tak tak a, kin ichâng thei viat khâi ino a nit hih. Îm itho rang khom reh khâi mang ung a, ne ṭangpui rangin nang kin ithlîr ṭian tâk a nit hih,” a ti a.

¹³Judai ram mi murdi chu an nupui nainetehei neh khan Tempil tualah khan an ngîr a.

¹⁴Khantaka a om sa Levia chi mi khatkah Zakaria naipa Jahaziela chungah khan PUMAPA Rithla a zuang ṭum a. Ani khah Asafa nama mi a nit a, Zakaria hi Benaia naipa a nit a, Benaia chu Jeiela nai a nit a, a pu chu Matana a nit.

¹⁵Jahaziela khan, “Judai ram mi murdi neh Jerusalema omhei neh nangmah, rêng Jehosafata, PUMAPA khan hingka hin ai ti a nit, ‘Sipai an tam sikin indôp no unla, nin ilung khom inrilak no rei. Ridoina chu Pathian kuta om a nit, nin kuta om ni mak e.

¹⁶Naktûkah Ziz pialikot an hong rô lâiin lei doi rei. Phâizôl tlung maa Jeruel kôl, ram inkhôk takah khan ruang lei chuan rei.

¹⁷Hi ridoina hih nangmanin nin ritha nin mang nang no nih. Nin omna rang takah khan lei ngâk ṭian rei; PUMAPA khan nangni a înê pêk rang a nit. Judai ram neh Jerusalem mihei o, indôp no unla, nin ilung khom inrilak no rei, anmani doi rangin rithok suak rei, PUMAPA chu nin ziangah ai om a nit,’ a ti,” a ti a.

¹⁸Rêng Jehosafata chu a mâi rinênga lingisikin â khûn a, mipui khom khah an ikhûn a, PUMAPA chubai an ûn tâk a.

¹⁹Levia chi, Kohatha neh Kora pôlhei kha an iding a, Israelhei Pathian, PUMAPA chu inpâkin iring takkan zâi an vôr a.

²⁰Atûk zîngah chu Tekoa kho kôl ram inkhôkna tiang ipun ranga an rithok rangto a khan Jehosafatan an ziangah, “Judai ram neh Jerusalem tlangvâlhei o, PUMAPA nin Pathian chungah hin nin iamna ringat rei; khanchu, iding indet thei nin ti. A zânthla thusîr khah iam unla, lôtluk nin ti,” a ti a.

²¹Rêng khan mihei khah â sôn zoiin chu Levia chi zâipôlhei khah nikhua ser banga an îhâk ngai thlukthlahei khah ribela sipaihei ma ruai a, “PUMAPA chu inpâk rei. A lungkhamna chu kumtluanga rang a nit,” itia sak rangin thu a pêk a.

²²Khangkan lâ an hang sakin chu a hong irûntu sipaihei khah PUMAPA khan ân buai chit tâk a.

²³Amonhei neh Moabhei khan Edomhei khah an doi a, an that tâk a; khanchu, anni khom khah an ridoi titak nôk tâk a.

²⁴Judai ram sipaihei khan ramchâra thlîrna inrisâng khah an va tlung a, an irâlhei omna tiang an thlîr a. An rêngkah khan rinêngah an ruak â tâl dûl a, khatka lua khom â tlân suak an iom ino a nit.

²⁵Jehosafata neh a lômahei khah râllâk sum ilah rangin an fe a; serât itam takkah an mu a, ifaruahei, thlukthlahei neh thil ilu danghei khom an mu intam tak tak a. Râllâk sum ilah rang a tam a, sûnthumka sung an lâk bûm a, an pêl zoi loi rang an ilâk a nit.

²⁶A sûnlinin chu Beraka Phâizôlah an ribûm a, an ta ranga thil ai tho murdi sikah khan PUMAPA chu an inpâk a; kha sik takah khan kêng kha phâizôl khah “Beraka”[1] an iti tâk a nit.

²⁷PUMAPA khan an irâlhei â nê pêk tâk sikah khan Jehosafata neh a lômahei chu mitmâi ri-al pamkan Jerusalemah an kîr tâk a.

²⁸Khopui an tlung rangin chu khuanghei neh bekulhei itum pumin Tempil an pan a.

²⁹Israelhei irâl PUMAPA an Pathianin deng ân thei pêk dân khah an kôlvêla namhei khan an lei riatin chu an ṭi tak tak tâk a.

³⁰Jehosafata chu râlringam takkan ân lal tâk a, Pathianin kil tinah ai sunghual khap a nit.

³¹Jehosafata khah kum sômithumkah kum ringaka mi a nitin Judai ramah rêng a chang a, Jerusalemah kum sôminikah kum ringakah a înlal a nit. A nu chu Azubi a nit a, Silhia nainu a nit.

³²A pa Asa angkah khan PUMAPA mitmuah thil idik a tho a.

³³Nikhomsela, nam dang pathian isônna mun risânghei kha chu a rêngkan iseh riai mak a. Mipuihei khomin an chibulhei Pathian chubai iûn rangin an lungrilhei an lai phûm tak tak ino a nit.

³⁴Jehosafata thiltho murdi arphut ata a thi dêna thurchi chu Hanania naipa Jehua thurchi Bu-ah riziak riai a nit. Amakhah Israel Rênghei Thurchi iti Riziakna lekhabua ṭang a nit.

³⁵Ṭumkah chu Judai ram rêng Jehosafata khan Israel rêng Ahazia, thil ṭhano tho ngaitu neh khan rualrichanna a siam a,

³⁶Ezion-Geber rikuang ringam munah khan tuikhangliana inzin ngai rikuang ilianhei an siam a.

³⁷Nikhomseh, Maresa kho mi Dodavahua naipa Eliezera khan a ziangah, “Ahazia neh rualrichanna nin siam sikin PUMAPA khan ni thil siam khah a îsiat rang a nit,” a ti a. Khaangkan rikuanghei chu an puakkoi riai a, Tarsis khua tianga inzin thei ai om khâi ino a nit.