Read Biete 2 RICHISUINA 21 Bible Online

2 RICHISUINA 21 - Biete bible

2 RICHISUINA 21

¹Jehosafata chu a thi a, Davida khopuia rênghei thlânah an phûm a, a naipa Jehorama kha arthûlin ân lal tâk a.

²Judai ram rêng Jehosafata naipa Jehorama khan urêng ipa irukkah Azaria, Jahiela, Zakaria, Azariahua, Mikaela neh Sefatia hei a nei a.

³An pa khan rângkachak hei, tangkarua hei neh thil ilu hei itam takkah a pêk chit a. Judai ram khopui kul inei, an enkol rang khom ân dang pêk chit a. Jehorama kha chu a nai uliantak a nit sikin Jehosafata khan arthûla rêngin a siam a.

⁴Jehorama khah a hong inlal det tenan a urênghei khah an rêngkan a that vang a, Israel lâia ruaitu ṭhenkah khom ai that sa a nit.

⁵Jehorama kha kum sômithumkah kum inikah a nitin rêng a chang a, Jerusalemah khan kum iriatkah a înlal a nit.

⁶Israel rêng Ahaba nai nupanghei lâia khatkah nupuiin a nei sikah khan rêng Ahaba neh Israel rêng dang isual tak takhei omdân khah a lâk a. PUMAPA chungah thil isual a tho a.

⁷Nikhomsela, PUMAPA khan Davida zianga a thu thlung sik neh archi suanpârhei khah inlal mai an ti itia a lei inkung sikah khan, Davida richihei chu a înrimang vang nuam ino a nit.

⁸Jehorama inlal lâiin Edomhei chu Judai ram chungah an rihel a, an khâtin rêngram an inding tâk a.

⁹Jehorama neh a lômahei khan sakor tâli ṭhuiin Edom kha an va rûn a, Edom mihei khan anni khah an lei hual a; nikhomsela, zân inthimah an irel a, an zôk thei tâk a.

¹⁰Kha zoroa rithokin chu Edomhei khah Judahei nuaiah om khâi loiin atûn tenan a ranin rêng an inei mai tâk a nit. Jehorama khan, PUMAPA, an chibulhei Pathian khah a ngaisak no sikin kha lâi ngirah khan Libna khua khom an rihel sa tâk a.

¹¹Judai ram thingtlângram ten khomah nam dang pathian isônna mun risânghei a sin a, Judai ram neh Jerusalem mipuihei kha PUMAPA nung isong a, thilsual itho rangin ai ṭhui insual a nit.

¹²Zânthla Elija khan Jehorama khah hingka hin lekha a thon a, “Ni chibul Davida Pathian, PUMAPA khan ni pa Jehosafata neh ni pu Juda rêng Asa hei omdân angkah khan ni om no sikin thiamno nang a închang tâk a nit.

¹³Israel rênghei omdân angkan ni om a, Ahaban Israel mihei ram dang pathian zianga a inrêpui angkah takin nang khomin Judai ram mi neh Jerusalem mihei chu ni înrêpui a nit. Nangma nêka ṭha, nen zirpuihei tena khom ni that riai tâk a.

¹⁴Hi sikah hin PUMAPA khan ni mihei, ni naihei, ni nupuihei kuttum thông a ta, nî nei murdihei nang a îsiat pêk vang rang a nit.

¹⁵Nang khom sungnatna rivoi ni ta, sûn tin a înrik tîr tîr rang a nit,” a ti a.

¹⁶Filistia mi neh Arab mi ṭhenkah, tuipui rikam Ethiopia mi lei iomhei kôlah an om a. PUMAPA khan khahei khah Jehorama doi rangin â thor a.

¹⁷Judai ram khah an hong rûn a, rêng-in an irok a, rêng nupuihei neh a naihei khah suakin an ṭhui riai a, a nai ithlum tak Ahazia chu an mâk a.

¹⁸Kha thilhei murdi zoiah khan PUMAPA khan sungnatna inrît tak khah rêng chungah khan â ṭhum tâk a.

¹⁹Kum inik ikâi dênin zâm zâm kan a nat tîr tîr a, â ril khah a tlâk tâk a, natna inrik tak ituangin rêng khah a thi tâk a. A puhei thia an tho ngai balam kha a thiah khan mihei khan ama sûn nan meipui khom an isêm ino a nit.

²⁰Jehorama kha kum sômithumkah kum inika mi a nitin rêng a chang a, Jerusalemah kum iriatkah a înlal a nit. A thi nî-ah khan tute beindongin omak. Davida khopuiah khan an phûm a, rêng ithlânah khan an iphûm ino a nit.