Read Biete 2 RICHISUINA 23 Bible Online

2 RICHISUINA 23 - Biete bible

2 RICHISUINA 23

¹Kum irukkah a thleng zoi tenan chu thiampu Jehoiada khan châng zoro a nit tâkin a riat a. Sipai ruaitu ringakahei thu ân rualpui a, khahei khah Jehorama naipa Azaria hei, Jehonana naipa Ismaela hei, Obeda naipa Azaria hei, Adaia naipa Maaseia hei, Zikria naipa Eliasafata hei an nit.

²Judai ram khopui tin an rifang a, Levia chihei neh nam ruaituhei chu Jerusalemah an hong ṭhui bûm a.

³Tempilah khan an ribûm a, rêng naipa Joasa neh khan thuthlungna an nei tâk a. Jehoiada khan an ziangah, “Hi mi hih â thi tâk rêng nai chu a nit hih. PUMAPA khan Davida richihei inlal ranga a lei înkung angkan atûnah hin ani hih rêng rang chu a nit.

⁴Hingka hin thông ei ti u: Sabat nin thiampuhei neh Levia chihei sin itho ranga an hong tikah, mun ithumka ṭhena mun khatkan Tempil kotbâihei rung an ta,

⁵a dang mun ithumka ṭhena mun khatkan rêng-in ngâk an ta, a dang rêng rêng chu ‘Lungphûm Kotbâi’ bulah an om rang a nit. Mipui chu Tempil tualah an hong ribûm rang a nit.

⁶Tempil sungah chu Thiampu neh Levia chi, sintho lâihei ti no chu mi dang tute an lût rang ni mak e. Anni chu serinran an nit a, lût thei an ti; mi dang rêng rêng chu PUMAPA thu zômin putiang an om rang a nit.

⁷Levia chihei khan rêng khah rikul tung an ta, an khandai thuat isaia chôiin rêng khah an rung rang a nit, rêng fena tinah an zui mai rang a nit. Tempila lût itum kangân chu ithat rang an nit,” a ti a.

⁸Levia chihei neh Judai rama mihei khan Jehoiada ti lam angkan an tho a. Sabat nî-a sin lei ringam rang tâkhei khom khah an itûk a, khaangkan ruaituhei khan ringam ife tum neh sinitho hong mihei khah imang rang mi an mu mai a.

⁹Davidan Tempila ai sia, ifei neh iphohei khah Jehoiada khan a sem pêk a.

¹⁰Tempil kottual rêng rêng chu khandai thuat isai ichôia rêng irung rangin mi a sia fur a.

¹¹Khanchu, Jehoiada khan Joasa khah a hong ṭhui suak a, rênglukhum ân khum a, rêng tho rang dânbu khah a pêk a, rêngin an phun tâk a. Thiampu Jehoiada neh a lômahei khan riak an inrithu a, “Rêng chu dam sôt riseh,” itin mi murdi an ipâi a.

¹²Athali khan mipuihein rêng an chôiinrisângna rihu khah a riatin chu mipui ribukna Tempil tiang irang takkan a fe a.

¹³Rêng ithar kha rêng idingna ranga an înrifûk Tempil sung lûtna chopui bula dingin a mu a, sipai ruaituhei neh bekulpuhei khan an rikul tûng a. Mipui chu râiifân takkan an ikhêk dur dur a, bekul an tum a, Tempil zâipôlhei khan an thil mût irîhei neh khan zâi khah an iruai a. Athali khan lunginzîngin a puanhei â potthlêr a, iring takkan, “Rihelna! Rihelna!” itin â khêk a.

¹⁴Jehoiada khan Tempil kôlvêla Athali that khah nuam mak a, sipai ruaituhei khah a koi a, “Vêngtu rân inikah indingin ṭhuisua unla, lei inzôk itum chu that thiai rei,” a ti pêk a.

¹⁵An man a, rêng-inah an ṭhui a, kha muna Sakor Kotbâi an iti-ah khan an that tâk a.

¹⁶PUMAPA mi inih ngêt rangin thiampu Jehoiada khan rêng Joasa neh mipui kha thuthlungna a siampui a.

¹⁷Baal an biakna munah khan an rêngkan an fe a, an that tâk a, khantaka mâichâmhei khah an isim a, mirmilhei khah an itôk inrinôi a, Baal thiampu Matona khah mâichâm bulah an that a.

¹⁸Jehoiada khan thiampuhei neh Levia chihei chu Tempila sintumhei an kutah ân kol a. Rêng Davidan a lei înkung angkan an sintumhei a sem pêk a, Mosia Dân bua riziak angkan PUMAPA ziangah hâlrivâm thillanhei an lan a. Irîhoi itum hei, lâ sak hei, lômna inkhôm iruaihei chu an tho tum a nit.

¹⁹Jehoiada khan Tempil kotbâihei ingâk ngêt rangin vêngtuhei a sia a, sakho thila mi rithiang ino tute an inlût rang ni mak a.

²⁰Sipai ruaituhei, ram ruaituhei neh mipuihei khan Jehoiada lômin lam an rizôp a, rêng khah Tempila rithokin rêng-inah an ṭhui a, inkotpuiah an lûtpui a, rêngṭhungmunah khan rêng chu â ṭhung tâk a.

²¹Mi murdi an râi a fân tak tak a. Athali khah an that tâk sikin khopuiah buaina îte ai om ino a nit.