Read Biete 2 RICHISUINA 24 Bible Online

2 RICHISUINA 24 - Biete bible

2 RICHISUINA 24

¹Joasa kha kum sarika mi a nitin Judai ramah rêng a chang a, Jerusalemah kum sômilikah a înlal a nit. A nu chu Zibiai, Beerseba kho mi a nit.

²Thiampu Jehoiada damsungkah chu Joasa khan PUMAPA lungdo a sin ngai a.

³Jehoiada khan rêng Joasa khah nupui inikah ân nei a, nai nupang nai ipahei an nei pêk a.

⁴Itôikah rêng a chang tenan chu Joasa khan Tempil siaminṭhat a tum tâk a.

⁵Thiampuhei neh Levia chihei kha Judai ram khopuihei rifang rangin a tir a, kum tina Tempil siaminṭhatna inrup tholôm ân rifuang a. Rimot rangin â ril a; khanniseh, Levia chihei khah an rivuak zâm a.

⁶Khasikin, an ruaitu Jehoiada khah a koi a, “Levia chihei hin Judai ram neh Jerusalem mihei zianga rithokin Ritongna Puan-In enkolna ranga PUMAPA som Mosia ituk chôitum khah an rifuang inṭhat neh inṭhatno ithôm ni enpui no?” a ti pêk a.

⁷Mi sualnu Athali zuituhei khan Tempil an isiat a, thil rithiang itam takkah Baal chubai ûnnaa mang rangin an ilâk suak a nit.

⁸Rêng khan Levia chihei khah tholôm bôm isiama Tempil lûtna kotbâi kôla seh rangin thu a pêk a.

⁹Jerusalemah neh Judai ram pumpuiah, Pathian mi Mosian ramchâra mipui chôi rang zâk bituk a siam pêk lam angkana hong ichôi mai rangin thang ân thei a.

¹⁰Mipuihei neh an ruaituhei khan ilôm takkan an chôi rang zâk bituk khah an hong chôi a, tholôm bôm khah an thun inbit tâk a.

¹¹Levia chihei khan tholôm bôm khah nîn tin, â enkoltu ranga rêngin ai be ziangah khan an chôi ngai a. Tholôm bôm khah a sip fengin thiampu laltak Jehoiada mi phun neh rêng mi be ziaktu khan sum khah an lâk suak a, bôm chu a sia munah an sia nôk ngai a. Khangkah khan sum itam takkah an ibûm tâk a nit.

¹²Rêng neh Jehoiada khan Tempil siaminṭhat sin enkoltuhei ziangah sum khah an pêk ngai a; anni khan lung isuk ngaihei, thing isin ithiamhei, thîr isuk ngaihei khah Tempil siaminṭhatna sin itho rangin an îruai ngai a nit.

¹³Zâltak isongin an rêngkan sin an tho a, Tempil kha masaa angkah dôra detin an siaminṭhat nôk tâk a.

¹⁴Siaminṭhat sin khah an zoiin chu rângkachak neh tangkarua an mangbânhei khah thiampu laltak Jehoiada neh rêng khah an pêk a; anni khan Tempila mang rangin tâbor neh bûrbêl dang siamna rangin an mang a. Jehoiada dam sungkah chu sûn tin Tempilah khan ribôlnahei an lan ngêt mai ngai a.

¹⁵Tar ikhûnin a dam a, kum rizalei sômithumkah a nitin chu a thi tâk a.

¹⁶Israel mihei lâiah Pathian ta rang neh Tempil ranga a sintho ṭhat inlutnan Davida khopuia rêng ithlânah an phûm sa tâk a.

¹⁷Jehoiada a thi tâk nungah khan chu Judai ram mipui ruaituhei khan rêng chu an thu zôm ual rangin an ithlêm inê tâk a.

¹⁸Mipuihei khan an chibulhei Pathian PUMAPA chu Tempilah khan chubai ûn nuam khâi mak a, mirmilhei neh pathiannu Aseri rilimhei an isôn ual tâk a. An sualna sikin Judai ram mihei neh Jerusalem mihei chungah PUMAPA chu a ning a thik tâk a.

¹⁹PUMAPA khan anni chu a tianga ikhîr nôk rangin zânthlahei a tir a; khanniseh, mihei khan an thu lei ringai pêk nuam mak a.

²⁰Khanchu, thiampu Jehoiada naipa Zakaria chungah PUMAPA Rithla a zuang ṭum a, mipuiin an mu theina rang mun takah â ding a, iring takkan â khêk a, “PUMAPA Pathianin îrang sika a thupêkhei zôm loia nin chungah vânduaina inrît nin îthlun rang im ai nit, iti nangni a irdon a nit. Ani chu nin mâk tâk a, amah khomin nangni ai mâk tâk a nit,” a ti a.

²¹Rêng Joasa khom Zakaria an phiarrûknaah khan a ṭang sa a, rêng thupêkin Tempil tualah khan Zakaria chu mihei khan lungin an dêng that tâk a.

²²Rêng khan Zakaria pa Jehoiada khah a ta ranga a iamomzia khah arngil a, Zakaria khah a înthat tâk a nit. Zakaria khan a rangchat rangto a khan, “Ni sintho hi PUMAPA khan mu sela, ni chungah phuba la riseh,” a ti a.

²³Kum a hong boi tiang chu Suria sipaihei khan Judai ram neh Jerusalem an hong rûn a, ruaituhei murdi an that a, râllâk sum itam takkah Damaska khuaah an chôi a.

²⁴Suria sipaihei khah roichek khom sela, an nêka tam Juda sipaihei khah an înê a nit. An chibulhei Pathian PUMAPA khah nung an song tâk sikin inên an iom tâk a nit. Khangkah khan Rêng Joasa khah intuangin a om tâk a.

²⁵Joasa khan popliam natinsat tak a tuang a; khante, irâlhei an ṭin nungah khan a milianhei inikan an phiarrûk a, Jehoiada naipa ai that phuba khah an lâk a, zâlmunah a zâl lâiin an that a. Davida khopuiah an phûm a, khan rêng thlânah chu an iphûm ino a nit.

²⁶Â phiarrûka â thattuhei khah Amon nupang Simeati naipa Zabada neh Moab nupang Simriti naipa Jehozabada hei an nit.

²⁷Rênghei lekhabu rilfiana bu-ah Joasa naihei thurchi, a chungchânga zânthla thûnpuanghei neh Tempil a siaminṭhat thuhei ai chuang a nit. A naipa Amazia khah arthûlin rêng a chang tâk a.