Read Biete 2 RICHISUINA 25 Bible Online

2 RICHISUINA 25 - Biete bible

2 RICHISUINA 25

¹Amazia khah kum sôminikah kum ringaka mi a nitin rêng a chang a. Jerusalemah kum sôminikah kum ikuakkah ân lal a, a nu chu Jerusalem mi Jehoadini a nit.

²PUMAPA lungdo a sin ngai a; khanniseh, lung-ôk rikâi takkan ai sin ngai a nit.

³A dingmun a siaminṭhat kaneh chu a pa lei ithattu milianhei khah a that a.

⁴An naihei kha chu tôn mak e, Mosia Dan bua PUMAPA thu, “Nu neh pahei chu an naihei thonsual sikin ithat an nit rang ni mak a; naihei khom an nu neh pahei thonsual sikin ithat an nit rang ni mak e; mi mahni sualna sik bangah khan ithat rang a nit,” iti khah ai zôm a nit.

⁵Rêng Amazia khan Juda mihei neh Benjamin mihei chu an richi risui dân dung izuiin sipai dang dangah a buk a; sângkah bukin, rizakah bukin, ruaitu rang a phun pêk a. Ipa kum sôminika ten chungtiang chu an ṭang riai a, an rêngkan nuaiithumkah an ikâi a nit. Anni khah sipai rithlang ngat, ridoi ranga risiam ṭian, ifei neh ipho mang ithiam korong an nit.

⁶Hihei banah mâr tiang Israelhei, sipai nuaikah, tangkarua her sângithumkah rizalikah man itlukin a îruai sa a nit.

⁷Khanniseh, zânthla khatkah rêng ziangah a fe a, “Hi Israel sipaihei hih ṭhui no roh, PUMAPA chu mâr tiang rêngram mihei ziangah hin omak e.

⁸Ridoina munah irât ualin nang siam an ti itin ni ngaitua khom a nit thei a, khan nêna nang ipeh rang neh nang intlôm ranga ritha neitu chu Pathian kêng ai nit, ne râlhein nang an inêna nang inchang pêk duai a ti,” a ti pêk a.

⁹Amazia khan zânthla ziangah, “Tangkarua an zianga kî pêk tâk khah ingkam ai nit rang tâk?” a ti a. Zânthla khan, “PUMAPA khan kha nêka tam nang ai pêk nôk thei a nit,” itin a sâm a.

¹⁰Kha angkan Amazia khan sipai a îruaihei khah an in tiang a tir ikhîr nôk tâk a; Judahei chungah ningithik zap pumin an ikîr nôk tâk a nit.

¹¹Amazia khan lungkhir risakin a sipaihei chu Ichi Phâizôl tiang a fepui a. Edom sipaihei neh khan an ridoi a, sipai sîngkah an that a.

¹²Mi sîngkah an man a; Sela khua rôlbôkah an ṭhui a, an nam iṭhul a, lungah zurden an thi riai tâk a.

¹³Kha zoro ngirah khan Amazian ridoinaa fe ranga ai phal ino Israel sipai ai tir ikhîrhei khan Samaria neh Beth-Horon kâra Juda khopuihei khah an rûn a, mi sângithumkah sar an that a, râllâk sum itam takkah an lâk a.

¹⁴Amazian Edomhei inê a, a hong kîr nôkah khan an mirmilhei a hong chôi a, a siana mun ai siamah khan ân ṭhung a, chibai iûnin an maah namhoi a hâl tâk a.

¹⁵Hi sikah hin PUMAPA khah a ning a thik a, Amazia ziangah zânthla a tir a. Zânthla khan, “Ni kuta rithoka an mihei ilua inzôk theiino nam dang pathianhei chu îtho rang im chubai nî ûn tâk?” a ti a.

¹⁶Amazia khan, “Tiklâia rithokah khan im rêng zianga roisaktu rangin nang kin iphun? Dâirek ta roh, anitnon chu nang kî that rang kêng,” a ti a. Zânthla khan, “Ki thu ringai loi a, hihei hih ni tho sikin Pathianin nang inrimang ai tum a nit, iti ki riat tâk,” a la ti a; khanchu, a dâirek tâk a.

¹⁷Judai ram rêng Amazia neh a roisakpuituhei khan Israel idoi an inlung a. Rêng Amazia khan Jehua naipa, Jehoahaza nai Israel rêng Jehoasa ziangah, “Ipa neh ipa chu lei risual rei,” itia zu sarai rangin mi a tir a.

¹⁸Jehoasa khan hingka hin a sâm a, “Voikah chu Lebanon tlânga sâisorling kungin sidar thing ziangah, ‘Ki naipa nupui rangin ni nainu ne peh roh,’ a ti pêk a. Ramsa a hong thleng a, sâisorling khah a sirpol neng tâk a.

¹⁹Amazia atûnah hin Edom mihei ni înê khah ni irsongpui tâk a nit hih; inah om ṭiṭian roh. Nangmah neh ni mihei chunga vânduaina rikhêl ithlun thei buaina ithôm ni îsua rang,” a lei ti a.

²⁰Amazia khan a thu khah lei uksak nuam mak a, Edom mihei pathian rilim a biak sikah khan Pathianin Israelhei kuta ipe a lei itum a nit.

²¹Khanchu, Israel rêng Jehoasa neh Juda rêng Amazia chu ridoi rangin an rithok suak a, Judai ram Beth Semes kho kôlah an ritong tâk a.

²²Juda sipaihei chu an dôk tâk a, mahni in tiang ipanin lâizâm an tho tâk a.

²³Israel rêng Jehoasa khan Juda rêng Amazia kha a man a, Jerusalemah a ṭhui a. Khopui kulpui bang khah Efraim Kotbâi ata Bangkil Kotbâi ten idênin kul bang mûk rizalikah khah a ṭhet a.

²⁴Râllâk sumin Tempila rângkachak neh tangkarua hei, Obed Edoma richihein an irung ngai Tempil mangruahei neh rêng richonhei khah Samaria tiang a chôi riai a. Siakhama mang rang khomin mi a ṭhui sa a.

²⁵Juda rêng Amazia chu Israel rêng Jehoasa nêkan kum sômleiringakan a ring sôt ual a.

²⁶Ân lal phut ata ân lal mong idêna Amazia thil thohei chu Juda neh Israel Rênghei Thurchi Riziakna Bu-ah ai chuang a nit.

²⁷PUMAPA chungah arhel tena rithokah khan chu ama that itum Jerusalem kho mi an om mai tâk a. A nungkhôn takah chu Lakis khuaah a rot a; khanniseh, â râlhein an rizûl a, kha munah khan an ithat tâk a nit.

²⁸A ruak khah sakorin Jerusalemah an pêl a, Davida khopuia rêng ithlânah an phûm tâk a.