Read Biete 2 RICHISUINA 26 Bible Online

2 RICHISUINA 26 - Biete bible

2 RICHISUINA 26

¹Judai ram mi murdi khan Amazia naipa Uzia kum sômlei kum irukka mi chu a pa rithûla rêng rangin an rithlang a.

²Amazia thi nungin Uzia khan Elath khua a lâk kîr nôk a, khopui khah ai siaminṭhat nôk a nit.

³Uzia chu kum sômlei kum irukka mi a nitin rêng a chang a, Jerusalemah kum sômringakah kum inikah ân lal a. A nu khah Jerusalem mi Jekoli a nit.

⁴Amazia angkan PUMAPA lungdo a sin ngai a.

⁵Pathian thu tianga â kâiruaitu Zakaria damsungkah chu iamom takkan PUMAPA sin a tho ngai a, Pathian khan vângisak takkan ai siam a nit.

⁶Uzia khan Filistiahei khah a rûn a, Gath khopui kulpui banghei, Jamnia neh Asdod khopui kulpui banghei â sim riai a; Asdod kôlah neh Filistia ram mun tinah khan kulpui inei khopuihei a siam a.

⁷Pathianin Filistia mihei, Gurbaala om Arabhei neh Meunhei kha inê rangin a ṭangpui a.

⁸Amon mihei khomin Uzia ziangah sia an chôi a; a hong roinpui a, Aigupta ram idênin arming ân thang tâk a.

⁹Uzia khan Jerusalem kulpui a siaminṭhat ual a; Bangkil Kotbâi hei, Phâizôl Kotbâi hei neh kul bang kôina munheiah khan thlîrna inrisâng a sin a.

¹⁰Ram iôl murdiah khom thlîrna in risânghei kulpui ineiin a siam sa a, tuikhur itam takkah khom a choih sa a, tlâk lam tianga itlâng bula phâizôlheiah khan serât itamkah a vâi a. Loi itho tiang hih artha fânna a nit a, tlângramah khom grephei ân phun a, phâi ram rinêng ṭhatna munhei khah loiin a întho ngai a nit.

¹¹Sipai itam takkah, ridoi ife thei zel a nei a. An thurchi riziakna chu ziaktu Jeiela neh Maaseia hei khan, rêng milian Hanania iruaina nuaiah an vong a.

¹²Sipaihei khah ruaitu sânginikah rizarukkan an îrui a nit.

¹³An nuaiah khan rêng ta ranga irâl idoi thei zel sipai nuaiithumkah sângsarikah rizarngakah an iom a nit.

¹⁴Uzia khan a sipaihei khah ipho hei, ifei hei, thîr lukhum hei, thîr zakua hei, phel neh thal hei, vailungdênga mang rang lung ichênghei a pêk a.

¹⁵Jerusalemah khan a mi kutithiamhei isiam thal kâpna khôlhei neh lung ilianpa pa zuk ivirna rang khôlhei khah thlîrna in risângheiah neh kul bang ikilheiah an buk a. Arming khah mun tinah ân thang tâk a, Pathianin a ṭangpui sika khangkah taka roinpui thei a nit.

¹⁶Rêng Uzia chu a hong roinpui ok tenan chu a lârripâk tâk a, amakhah a siatpuina khom ai nit tâk a nit. PUMAPA a Pathian khah ngaisak loiin namhoi hâlna mâichâma namhoi ihâl rangin Tempilah a lût a.

¹⁷Thiampu laltak Azaria neh thiampu rât ihâi tak tak mi sômiriatkan ikhap itumin rêng khah an zui a,

¹⁸“Uzia, PUMAPA zianga namhoi ihâl rangin tlukna îte nei mak che. Arona richia thiampuhei bang kêng hi sin itho ranga serinran chu an init. Hi mun rithiang hih mah roh; PUMAPA Pathian ning nen thik a, a ditsakna dong ual khâi no tin,” an ti pêk a.

¹⁹Uzia khah Tempil sung namhoi hâlna mâichâm bulah khan â ding a, namhoi hâlna bûr khah â chôi a, thiampuhei chungah khan a ning a thik tak tak a; khanniseh, an makung ngêiah, Tempil sunga namhoi hâlna mâichâm bul zelah khan â chalah iphâr rî a hong kop tâk a.

²⁰Azaria neh thiampuhei khan rêng ichal khah an en a, an ilâi rak tâk a; khanungchu, Tempil sung ata an ûm isua tâk a. PUMAPA khan kuttum a tho tâk sikah khan rimot takkan a suak tâk a.

²¹A natna sikah khan rêng Uzia kha a damsungkah mi bor a chang tâk a, Tempila a lût arthiang khâi no sikin a inah a om ṭian tâk a, a sin khom tho khâi mak a, a naipa Jothaman a ram khah a op tâk a.

²²Ân lal sunga Uzia thiltho murdi chu Amoza naipa zânthla Isaian arziak a.

²³Uzia chu a thi a, rênghei thlân mualah an phûm a, â phâr rî rivoi sikah khan rênghei thlânah chu an iphûm ino a nit. A naipa Jothama khah arthûlin rêng a chang tâk a.