Read Biete 2 RICHISUINA 28 Bible Online

2 RICHISUINA 28 - Biete bible

2 RICHISUINA 28

¹Ahaza kha kum sôminikah mi a nitin rêng a chang a, Jerusalemah kum sômlei kum irukkah a înlal a nit. A pu Davida tho dân iṭha khah zôm nuam loiin PUMAPA nuamno lam a sin a.

²Israel rênghei tho dân khah a lâk a, thîrin Baal rilim a siam a.

³Hinom Phâiah namhoi a hâl a, Israel mihei maa PUMAPA iûm isua nam danghei tho dân porinche tak takhei ten khom khah a tho a, a naipahei ten khom mirmil maah hâlrivâm thillanin a that a.

⁴Itlângheia nam dang pathian biakna mun risângheiah neh thing dâilîm nuaiheiah Ahaza khan ribôlnahei ilanin namhoihei ai hâl ngai a nit.

⁵Ahaza khan thil isual a tho sikah khan Suria rêng kutah PUMAPA a Pathian khan a pêk a; Damaska khua tiang Juda mi itam takkah suakin a ṭhui tâk a.

⁶Israel rêng Remalia naipa Peka khomin Ahaza khah a doi a, â nê a, Juda sipai ihâi tak tak mi nuaikah neh sînginikah sûnka sungin a that a. Judai ram mihei khan PUMAPA an chibulhei Pathian an mâk tâk sikin PUMAPA khan kha thil khah an chungah a îthlun a nit.

⁷Israel sipai Efraim pasalṭha Zikria khan Ahaza naipa Maaseia khah a that a, rêng-in ienkoltu Azrikama a that sa a, rêng thuai zela milian Elkana khom ai that sa a nit.

⁸Judahei chu an suapuihei ni khom sela, Israel sipaihei khan nupang neh naipang nuai inikah suakin an man a, Samaria khuaah an ṭhui a, râllâk sum itamkah an ichôi sa a nit.

⁹Samaria khuaah khan PUMAPA zânthla khatkah a om a. Israel sipaihein Judai rama rithoka an suak manhei neh Samaria khua an lût rang khah a lei mu a, an ziangah, “Nin chibulhei Pathian PUMAPA chu Judahei chungah a ning a thik a, anni chu nin kutah nangni ai pêk a nit; khannisela, nin that a, an chunga nin nunter tliahei khah ai mu mai a nit.

¹⁰Jerusalem neh Judai rama om ipa neh nupanghei suaka siam nin la itum nôk a nit a. Nangni khomin PUMAPA, nin Pathian chungah thil isual nin itho a nit iti nin iriat ino mani?

¹¹Ki thu hih ringai rei, hi nin mi manhei hih nin suapuihei neh suapuinuhei kêng an init. Isua riai rei, a nitnon chu PUMAPA a ning thik a ta, kuttum nangni ai tho rang a nit,” a ti a.

¹²Mâr tiang rêng rama ruaitu lian ilikah, Jehohanana naipa Azaria hei, Mesilemota naipa Berekia hei, Saluma naipa Jehiskia hei, Hadlaia naipa Amasa hei khomin sipaihei thiltho khah an sêl a.

¹³An ziangah, “Nin suak manhei khah hin hong ṭhui no rei. PUMAPA chungah thilisual ei itho pial tâk a nit, kuttum ne tho rang khopin a ning ei înthik tâk a nit. Atûnah hin ei thil isual tho tâk banah la tho sa nôk mai nin itum mani?” an ti a.

¹⁴Khanchu, sipaihei khan an suak manhei neh râllâk sumhei khah mipui neh ruaituhei kutah an lan tâk a.

¹⁵Khante, râllâk sum ata khah suaka an imanhei zianga thlukthla peh rangin mi ilikah khah an inkung a. Thlukthlahei neh pheikok ribun rang an pêk a; an fâk neh an in rang rup an pêk a, an sabehei inâl rang oliv riak an pêk sa a. Mahni kea lôn theiloi rakka rizalhei chu sakuartung chungah an inchuang a; an suak man murdi khah Judai ram Jerikoah an ṭhui kîr nôk riai a. Khanchu, Israelhei kha chu Samaria tiang an kîr nôk tâk a.

¹⁶Edom mihei khan Judai ram irûn an phut nôk a, mi itam takkah suakin an man a, hi sikah hin rêng Ahaza khan Asuria rêng Tiglat Pilesera chu ama ṭangpui rangin a ngên a.

¹⁸Hi zoro ngirah hin Filistiahei khomin tlâk lam tianga itlâng bul phâia khuahei neh sim tiang Judai ram Negebhei an lei hong rûn a. Anni vâng hin chu Beth-Semes hei, Aijalon hei, Gaderot hei, Soko neh a kôlvêl khuahei, Timna neh a kôlvêl khuahei, Gimzo neh a kôlvêl khuahei khah an lâk a, an lua khap tâk a.

¹⁹Juda rêng Ahaza khan a mihei ṭhatna rang ngaitua viat mak a, PUMAPA khah a ngaisak viat no sikin PUMAPA khan Judai ram khah a întlôm tâk a nit.

²⁰Asuria rêng Tiglat Pilesera khan Ahaza khah isan nêkan intakna a siam pêk ual tâk a.

²¹Ahaza khan Tempila rângkachak hei, rêng-ina rângkachakhei, mipui ruaituhei ina rithoka rângkachakhei a lâk a, Asuria rêng ziangah a pêk a, hi khom hin rifena ai nei pêk ino a nit.

²²A buai inrik lâi tak khomin Ahaza chu PUMAPA chungah â sual tîr tîr a.

²³Ama nêtu Suriahei pathian khah chubai a ûn tâk a, “Hi Suria pathianhei hin Suria rêng an ṭangpui a; khasikin, an ziangah ribôlna lan inlang chu ne ṭangpui ngêt an ti,” a ti a. Amakhah amah neh a mihei chunga siatna â thlun ualna a nit.

²⁴Khahei banah khan Tempil mangrua murdi a lâk suak a, â khoi isiat riai a. Tempil khah a khâr a; Jerusalema khuaah mun tinah mâichâmhei a siam a.

²⁵Judai rama khopui neh khoteheiah khan nam dang pathian isônna mun risânghei a siam a, amakhan nam dang pathianhei rang namhoi hâlna rang a siam a. Hingkana thoah hin a chibulhei Pathian PUMAPA, ningthik a chungah a îṭhum a nit.

²⁶Ân lal sunga thil dang â tlung rêng rêng chu a phut ata a mong idênin Juda neh Israel rênghei thurchi riziakna Bu-ah a chuang a.

²⁷Rêng Ahaza chu a thi a, Jerusalemah an phûm a, khan rêng thlânah chu phûm mak e. A naipa Hezekia khah arthûlin rêng a chang tâk a.