Read Biete 2 RICHISUINA 29 Bible Online

2 RICHISUINA 29 - Biete bible

2 RICHISUINA 29

¹Hezekia kha kum sôminikah kum ringakah mi a nitin rêng a chang a, Jerusalema kum sôminikah kum ikuakkah a înlal a nit. A nu chu Zakaria nainu Abijai a nit.

²A pu Davida angkan PUMAPA lungdo a sin ngai a.

³Ân lal phut kum, a thla masa takah, Hezekia khan Tempil kotbâihei â ong nôk a, a siatnahei ân siam inṭhat a.

⁴Tempil sak tiang tualah khan thiampuhei neh Levia chihei khah a koibûm a.

⁵An ziangah, “Nangni Levia chihei o, rithâr rithiang unla, nin chibulhei Pathian PUMAPA Tempil hi thâr inrithiang rei. Tempila rithokin thil porinche rêng rêng pai vang rei.

⁶Ei chibulhei khah PUMAPA ei Pathian chungah iamom mak a, a nuam no lam an sin a. Nung an song a, a omna In khah imarakin nung an song tâk a.

⁷Tempil inkhârhei khah an ikal a, meiser an sêm that a, namhoi hâl mak a; Tempilah khan Israelhei Pathian rang hâlrivâm thillanhei lan khâi mak a.

⁸Hi sikah hin PUMAPA khah Judai ram neh Jerusalem mihei chungah a ning a thik a, mi tin rikhêl ti neh rilônthing rakkan kuttum ai tho tâk a nit. Amahih nangni khomin nin iriat infel a nit a.

⁹Ei pahei khah ridoina munah ithatin an om a, ei nupui neh ei naihei khah suaka iṭhui paiin an iom tâk a nit.

¹⁰“Ei chungah hin a ning a thik mai khâi nona rangin PUMAPA Israelhei Pathian neh thuthlungna siam kî tum tâk a nit.

¹¹Ki naihei o, om ṭian khâi no rei, PUMAPA khan a makunga dinga, a sin itho rangin nangni a irthlang a nit a; khasikin, a ziangah namhoi hâl unla, amah chubai iûn rangin mipui iruai rei,” a ti a.

¹²Kha zoroah khan Levia richi, hi mihei hih an inṭel a: Kohatha richia rithokin Amasaia naipa Mahata neh Azaria naipa Joela. Meraria richia rithokin Abdia naipa Kisa neh Jehalalela naipa Azaria. Gersona richia rithokin Zimna naipa Joa neh Joa naipa Edena. Elijafana richia rithokin Simria neh Jeuela. Asafa richia rithokin Zakaria neh Matania. Hemana richia rithokin Jehuela neh Simeia. Jeduthuna richia rithokin Semaia neh Uziela.

¹⁵Hi mihei hin an suapui Levia chihei an bûm a, an rithâr rithiang a. Khanchu, rêng thupêk angkah khan Tempil khah an thâr tâk a, PUMAPA Dân bua riziak lam angkah takin an ithâr a nit.

¹⁶PUMAPA Tempil sungah thiampuhei an lût a, thil rithiang ino an imu rêng rêng chu Tempil tualah an hong chôi suak a; Levia chihei khan khahei murdi khah an lei lâk a, khopui putiang Kidron vadungah an pai a.

¹⁷A thla khatna, sûn masa takah Tempil ithâr an phut a, a sûn iriatnî tenan chu Tempil tongtîr chontan ten idênin an ithâr riai tâk a nit. Sûn iriatkah dang, a sûn sômleiirukka dênin Tempil sung kha Pathian isônna mun inrupin an thâr inrithiang tâk a.

¹⁸Levia chihei khah rêng Hezekia ziangah an fe a, “Tempil sung chu kin thâr inrithiang zoi tâk a, hâlrivâm thillan hâlna mâichâm hei, ibai iser siana docham hei neh mangrua tinrênghei khom kin thâr inrithiang zoi vang tâk.

¹⁹Ahazan PUMAPA ngaisak loia a om lâia Tempil bûrbêl ai lâk suakhei murdi kin hong chôi kîr nôk a, kin thâr inrithiang nôk riai tâk a, PUMAPA mâichâm bulah tinrêng isianfel riai a nit tâk,” an ti a.

²⁰Rêng Hezekia khan Jerusalema ruaitu ual ualhei khah a koibûm a, PUMAPA Tempilah khan an fe a.

²¹Rêng insungkuahei neh Judai rama mipuihei sual ribôlna rang neh Tempil thâr inrithiangna rangin serâtchal sarikah, berachal sarikah, berate sarikah neh kêlchal sarikah an hong kâi a. Rêng khan Arona richi thiampuhei khah ribôlna thillan mâichâma lan rangin â ril a.

²²Thiampuhei khan amasa takah serâtchalhei khah an that a, an thisen khah mâichâm an rithe a, khanung berachalhei, khanung nôkah beratehei an that a, an thisen khah mâichâm an rithe a.

²³A nungkhôn takah rêng neh mi dang ribûmhei maah kêlchalhei khah an hong kâi a, an lu-ah khan an kut an lei ringat a.

²⁴Khanchu, thiampuhei khan kêlhei khah an that a, an thisen khah sual ribôlnan an lan a, Israel mi murdi sual ribôlnan an ilan a nit. Rêng thupêk angkan hâlrivâm thillan neh sual ribôlna thillan khah Israel mi murdi rangin an ilan a nit.

²⁵Rêng zânthla Gada neh zânthla Nathana manga Davida zianga PUMAPA thu sîr angkah khan Levia chihei khah perkhuang neh dârribuhei ichôiin Tempilah khan a sia a.

²⁶Rêng Davidan a lei imang ngai irîhoi mangruahei khom khah an chôi sa a. Thiampuhei khom bekulhei ichôiin an iding a.

²⁷Rêng Hezekia khan hâlrivâm thillan chu ilan rang tâkin thu a pêk a; an hang lanin chu mipuiin PUMAPA inpâkna lâ an sak a, bekulhei an tum a, imût ngai irîhoi chi dang dang khom an tum a.

²⁸Khantaka om murdi khan Pathian chubai an ûn a, lâ an sak a, an ribôlna thillan a kâng zoi mâkah chu irîhoi an tum rizom mai a.

²⁹Rêng Hezekia neh mipui an rêngkan rikhûk an dil a, Pathian chubai an ûn tâk a.

³⁰Rêng neh ruaituhei khan Davida neh zânthla Asafa lâ phua, PUMAPA inpâkna lâ khah isak pêk rangin Levia chihei khah an iril a. Mi tinin rikhûk idil pumin râiifân takkan an sak a, Pathian chubai an ûn tâk a.

³¹Rêng Hezekia khan mipuihei ziangah, “PUMAPA ta rangin nin rithâr rithiang zoi tâk a; ribôlna thillanhei, PUMAPA zianga lômthu sîrnahei, Tempilah hin hong lan ta rei” a ti pêk a. A thu an zôm a, mi ṭhenkan mahni lungsuakin hâlrivâm thillan rang ranhei an hong chôi a;

³²serâtchal sômsarikah, berachal rizakah, berate rizanikah PUMAPA zianga hâlrivâm thillan rangin an hong ichôi a nit.

³³Serâtchal rizarukkah neh bera sângithumkah khom mipui ribûmhei fâk rangin thillan chi dangin an hong chôi sa a.

³⁴Â that rang thiampu an ridum no sikin an that zoi mâkah chu Levia chihei khan an san a. A mong tiangah khan chu thiampu itam ualkah khom an rithâr rithiang phâk tâk a. Levia chihei chu thiampuhei nêkah khan an irvong rithiang thei ual a nit.

³⁵Mipui thillan hâl inrivâm hih thiampuhei tho tum a nit. An ran that mipui ifâk thâihei khom khah an hâl rang a nit a; hâlrivâm thillan ruala uain an hong ilanhei khom thiampuhein an bun suak rang a nit. Ama angkah khan Tempila Pathian chubai iûn khah an iphut nôk tâk a nit.

³⁶Pathianin hingkana tho nôk thei ranga rimot takka Tempil khah izoi thei ranga anni khah a ṭangpui sikah khan rêng Hezekia neh mipuihei khah an ilômin an râi ai fân tak tak a nit.