Read Biete 2 RICHISUINA 3 Bible Online

2 RICHISUINA 3 - Biete bible

2 RICHISUINA 3

¹Solomona pa, rêng Davida khan Jerusalem kho sung Moria tlânga Jebus mi Ornana rîzôlah Tempil sinna rang mun a lei inrifûk diam tâk a, amakhan Solomona khan,

²ân lal kum ilina thla niknaah khan Tempil chu isin a phut tâk a.

³Rêng Solomonan Pathian ta ranga Tempil a irkal khah a dung mûk sômirukkah, a khang mûk sôminikah a nit.

⁴A thapuk kha mûk sôminikah a nit a; a chung chu mûk rizalei sôminikah a nit. A chontan sungtiang khah rângkachaka inluan a nit.

⁵A chontan inlâina kha sidar thinga thlop a nit a; itûm thing neh zingziri rilim rângkachak iṭha taka siam ibel suak vang a nit.

⁶Rêng khan lungmantam enihoi tak tak neh Parvaim rama rângkachakin Tempil kha a inrivo a nit.

⁷A bang, a phakilâi, a thapuk neh a inkothei kha rângkachakin ân tuam a. Bangheiah khan kutithiamhei khan Cherub rilim an siam sa a.

⁸Chontan inril, Mun Rithiang tak an iti chu a dung neh a khang mûk sôminika ri-el bang a nit a, Tempil khang lian dôrka rizat a nit. Mun Rithiang tak ituam vang rangin rângkachak her sînginikah an mang a;

⁹rângkachak perek rizarngakah neh sômsarikah imang a nit a; chontan sungtiang khom rângkachaka tuam riai a nit.

¹⁰Rêng khan kutithiamhei khah dârin Cherub inika rilim ân siam a, rângkachakin ân tuam a, Mun Rithiang takah khan ân sia tâk a;

¹¹rinâi tengkan kotbâi masongin ân ding a. Rithla inikah an nei seng seng a, an rithla kha mûk sôm sômka sei seng seng an nit. Chontan inlâinaah khan an rithla môr kha artôn a, a môr kiangtianga khan bang a tôn seng seng theina rangin an rithla an iphar suak a nit. Khaangkan Cherub rithla phar kha mûk sôminikah a nit.

¹⁴Mun Rithiang tak lûtna puanzâr kha patzâi rimi a nit a, a dumpôl hei, a senduk hei neh a seninlâr hei imanga ikhông a nit; Cherub rilim an izep sa a nit.

¹⁵Rêng khan dâr chopui inikah, mûk sômithumkah ringaka risâng, Tempil maton tiangah khan a phun a, chopui sîp ipo khah mûk ringaka risâng a nit.

¹⁶A chopui sîp ipo khah zingziri angkana rikuala inrivo a nit a, zingziri rilim sunga khan theisen rilim a chuang a, a rêngkan rizakah ai om a nit.

¹⁷Chopuihei chu Tempil ikot bula phun an nit a, sim tianga chopui khah Jakina chopui an ti a, mâr tianga chopui khah Boaza chopui an ti a.