Read Biete 2 RICHISUINA 30 Bible Online

2 RICHISUINA 30 - Biete bible

2 RICHISUINA 30

¹Mipuihei khan a zoro thapah Kalkan Kût mang thei mak a, thiampuhei itam takkah rithâr rithiang phâk mak a, mipuihei khom Jerusalemah ribûm tam phâk sa mak a.

²Khanchu, rêng Hezekia neh a milianhei neh Jerusalema mihei khah an risôn inrual a, a thla khatnah ni loiin a thla niknaah Kalkan Kût imang rangin an rêl ithlûk a; khanchu, rêng khan Israel ram neh Judai ramah thu a thon indar tâk a.

³Efraim namhei neh Manasea namhei vâng chu Jerusalem Tempilah ihong a, PUMAPA Israelhei Pathian chôiinrisângna Kalkan Kût imang rangin lekhathonin an ifial bîk a nit.

⁴Rêng neh mipuihei khan an thil rêl khah an inrifûk ṭhatin an riat a.

⁵Mâr tiang Dana rithokin sim tiang Beerseba kâra Israel mi murdi chu Jerusalemah a tam thei dôrkah ihong a, zoro thlenga nêka tam uala dân ti lam angkana Kalkan Kût imang rangin an ifial a nit.

⁶Rêng neh a milianhei khan Judai ram neh Israel ramah mi an tir a, fialna lekha hingka hin an thon dar a: “Israel mihei o, Abrahama hei, Isaka hei, Jakoba hei Pathian, PUMAPA tiang hong ngat ta u; eimani Asuria kut tuang ino ringdama la omhei tiang a zuang ingat nôk rang a nit.

⁷Nin chibulhei neh nin suapui Israelhein PUMAPA, an Pathian chungah iamom loia an iom angkah khan chu om no rei. Nin iriat angkan kuttum inah tak ai tho a nit.

⁸Anmani angkah khan chu nin tuklul inlian no unla, PUMAPA thu chu zôm rei. PUMAPA nin Pathianin a înrithiang tâk, Jerusalema a Tempilah hong unla; nin chunga a ningthik arkiangna rangin amah chu chubai hong ûn rei.

⁹PUMAPA tiang nin kîr nôk ngânin chu nin irâlhein suaka an iman tâk nin suapuihei kha lunginkham an ta, in tiang hong tir kîr nôk an ti. PUMAPA nin Pathian chu lungrivuai tak neh lungkhamlianaa sip a nit a, a tiang nin kîr nôk ngânin chu nangni lei iham ngêt a ti,” itin an riziak a.

¹⁰An mi tirhei khah Efraim neh Manasea richihei omna khotinah an fe a, Zebulun ram khom an tlung a; khanniseh, mihei khan an lei nuiso bit a.

¹¹Khan khoma, Aser hei, Manasea hei neh Zebulun mihei Jerusalema fe nuam izâka manih chu an lei om a.

¹²Judai ramah khom Pathianin sin a tho a, rêng neh a milianhei thupêk angkana lunginrual taka Pathian lungdo sin itum ngit an tam ok a.

¹³A thla niknaah khan Bairiam kût imang rangin Jerusalemah mi itam takkah an hong ribûm a.

¹⁴Jerusalema pathian dang isônna mâichâm iom murdi; namhoi an hâlna mâichâmhei neh khan an lâk a, Kidron vadungah an pai riai tâk a.

¹⁵A sûn sômleiilinî takah khan Kalkan Kût ribôlna thillan beratehei an that a. Thiampu neh Levia chi, a lar thâr inohei khah an izak tak tak sikin PUMAPA ta rangin an lei rithâr rithiang infel riai tâk a, hâlrivâm thillan khom Tempilah khan an lan thei tâk a.

¹⁶Pathian mi Mosia Dân bua ti lam angkah khan an omna rang mun inkungah an om riai a, Levia chihei khan thillan thisen khah thiampuhei an pêk a, anni khan mâichâmah an lei rithe a.

¹⁷Mi tam takkah chu an inim sikin Kalkan Kût berate that thei mak a, Levia chihei khan an that pêk a, PUMAPA ziangah an lan a.

¹⁸Efraim namhei, Manasea namhei, Isakar namhei neh Zebulun namhei lâia mi tam takka vâng chu an rithâr rithiang no sikin dân angkan ni loiin Kalkan Kût kha an imang a nit. Rêng Hezekia khan khahei ta rangah khan hingkan a ṭongṭai a:

¹⁹“O PUMAPA, kin chibulhei Pathian, inim ikop an nit ṭian pum khoma lungril taka chubai nang iûntuhei chu ni ṭhatna sikah khan izâ roh,” a ti a.

²⁰PUMAPA khan Hezekia ṭongṭai khah a lei ringai a, mihei khah â zâ a, îte ai lo no a nit.

²¹Râiifân takkan sûn sarika sung chu Jerusalema honghei khan Bairiam Kût khah an mang a, sûn tin Levia chihei neh thiampuhei khan theidôr rôl isuan PUMAPA inpâkna lâ an sak a.

²²PUMAPA chubai ûnna inkhôm khah irîhoihei imanga ruai an thiam tak tak sikah khan Levia chihei khah rêng Hezekia khan ân pâk a. An chibulhei Pathian PUMAPA khah sûn sarikah ribôlna lana an inpâk nungin,

²³sûn sarikah dang la mang nôk rangin an rêngkan an nuam a, râiifân takkan an mang nôk tâk a.

²⁴Rêng Hezekia khan serâtchal sângkah neh bera sângsarikah mipuiin ithata ifah rangin a pêk a, a milianhei khomin serâtchal sângkah neh bera sîngkah an pêk sa a. Thiampu itam takkah an rithâr rithiang tâk a.

²⁵Tu mi khom, Judai rama mi hong ribûmhei, Levia chihei, thiampuhei, Israel ram ata hong ribûmhei, Judai ram neh Israel rama nam dang iom â hong sahei neh khan an lôm tak tak a.

²⁶Jerusalem khopui chu râifân nan a sip a, Davida naipa Solomona thi nungah khan hingkah dôra lômna hih a la iom ino a nit.

²⁷Levia chihei neh thiampuhei khan mipui rang ṭhatvurna PUMAPA ziangah an ngên pêk a. A mun rithiang rivâna rithokin Pathianin an ṭongṭaina a lei ringai a, a lei iham pêk a.