Read Biete 2 RICHISUINA 31 Bible Online

2 RICHISUINA 31 - Biete bible

2 RICHISUINA 31

¹Kût a hekin chu Israel mi murdi Judai ram kho tinah an fe a, an lungphunhei, an pathiannu Aseri rilimhei khah an nam inkûi a, mâichâmhei neh mun risâng, nam dang pathian biakna munhei khah an isiat chit a. Judai ram banah, Benjamin hei, Efraim hei neh Manasea hei ram bialah khom hingka ngirah hin an tho a; khanchu, mahni in tiang an kîr tâk a.

²Rêng Hezekia khan thiampuhei neh Levia chihei chu sin an risem ngai lam angkah khan an sin rang dân a rêl infel pêk nôk a. An tho rang chu hâlrivâm thillan ilan hei, ringeina thillan ilan hei, Tempila inkhômna ruai hei neh Tempil kotbâi kôl mun tina PUMAPA inpâkna lâ sak a, lômthu sîr hei a nit.

³Hezekia khan ama ran lômhei lâia rithokin serât neh berahei zîng tin neh kholoi tina hâlrivâm thillan rang hei, Sabat nî hei, Thla Thar Kût hei neh kût dang dang heia hâlrivâm thillan PUMAPA Dân bua ilan rang ai tihei khah a tum riai a.

⁴PUMAPA Dânin ai phût angkah khan, an zoro murdi an mang theina rangin, Levia chihei dongtum thillan chu ipeh ngai rangin Jerusalema mihei khah Hezekian â ril a.

⁵Khaangkana thu a pêk zoi kaneh chu Israel mihei khan an thilpêk ibaidi ṭha chi hei, uain hei, oliv riak hei, khuaitui hei, an chimu invâng hei neh an inei murdi a sôma khatkah an hong chôi a.

⁶Judai ram khopuia om murdi khomin an sial neh bera sômka khatkah hei, PUMAPA an Pathian ziangah thil itam takka an ipêkhei khah an hong chôi a.

⁷A thla thumna rithokin an hong pêk phut a, thla sarina dêna an hong ipêk khah a pông ngut tâk a.

⁸Rêng Hezekia neh a milianhei khan thilpêk riting bûm tamzia khah an mun chu PUMAPA an chôiinrisâng a. Israel mipuihei khom an inpâk a.

⁹Rêng khan thiampuhei neh Levia chihei ziangah thilpêk riting bûm khah an inrup neh inrup no chungchângah a ṭongpui a.

¹⁰Zadoka richia thiampu laltak Azaria khan, “Mihein an thil pêkhei Tempila an hong chôi tâk nungah hin chu ifah rang kin nei tak a, fâk zoi ban khom itamkah a lai om sa a nit. PUMAPA khan a mihei ṭhat a vur a, hihei murdi hih kin inei thei tâk a nit,” a ti a.

¹¹Rêng thupêkin Tempil ram sungah khan fasiarpui an sin a.

¹²Thilpêkhei neh sômka khatkahei khah an rimang nona rangin an rê inṭhat tâk a. Â ngâktu rangin Levia chi Konania an phun a, ân zirpuipa Simeia chu â ṭangpui rangin an iphun sa a nit.

¹³An iruina nuaia sin itho rangin Levia chi Jehiela hei, Azazia hei, Nahata hei, Asahela hei, Jeremota hei, Jozabada hei, Eliela hei, Ismakia hei, Mahata hei, Benaia hei khah rêng Hezekia neh thiampu laltak Azaria khan an phun a.

¹⁴Imna naipa Korea, Tempila Sak Kotbâi ingâktu liantak khah PUMAPA zianga an lungsuak thillan neh thil serinran bîkhei idonga sem ngai rangin an iphun a nit.

¹⁵Khopui dang, thiampuhei omna munah khan chu hi Levia chi Edena hei, Miniamina hei, Jesua hei, Semaia hei, Amaria hei, Sekania hei khan ifarua khah iṭha takkan an sempui ngai a, an Levia chipuihei khom, â nang ual neh â nang ual ino ti loiin an sem sîp sîp ngai a.

¹⁶Ipa, kum sômithumka chungtiang, Tempila sinitho theihei khan an dingmun izirin rangtum an dong a.

¹⁷Thiampuhei chu a panam nam a rithlâk rangin sin inkot an nit a; Levia chi kum sôminika neh chungtianga mihei chu a pôl pôla sin itho rangin inkot an nit.

¹⁸An riming kha an nupuihei, an naihei neh an zianga â deta omhei neh riziak riai an nit, tik zoroah khom an sin rithiang itho rangin ikoi thei zel an nit.

¹⁹Arona richihei omna rang indang khopuihei manih, kha khopuihei kôlvêl ran vâina muna om thiampuhei zianga fâknêk isempêktu rang mi an phun sa a, Levia chihei riming riziaknaa chuanghei khom an ipêk ngai a nit.

²⁰Judai ram pumpuiah rêng Hezekia khan PUMAPA a Pathian rang thil iṭha neh a lungdo a sin ngai a.

²¹Lungril neh tititakin a Pathian sin a tho a, Tempil ranga sin ai tho manih, Dân zôm rang dân chungchânga ai tho manih murdi khah a Pathian ziangah ripeh thlepkan a tho sikin lam tinrêngah thluan ai tlung a nit.