Read Biete 2 RICHISUINA 32 Bible Online

2 RICHISUINA 32 - Biete bible

2 RICHISUINA 32

¹Hezekia khan PUMAPA sin iṭha takka a sin tâk nungah khan, Asuria rêng Senakeriba khan Judai ram a hong rûn a. Kul inei khuahei khah a sipaihei khan an hual a, an lûtna rangin kulbanghei khah iṭhet rangin thu a pêk a.

²Hezekia khan Jerusalem khom hong idoi rangin a tum iti a riatin chu,

³a milianhei neh khan an risôn a, Jerusalem an hong nai tenan tui iinrua an nei nona rangin khopui putiang inâia om tuinârhei rêng rêng chu nêl insip vang rangin an rêl a.

⁴Khanchu, ruaituhei khan mi itam takkah an ṭhui a, tuinâr rêng rêng â luangsuak rang om loiin an nêl insip vang a.

⁵Rêng khan kho kulbang ân derna munhei khah a siaminṭhat nôk a, a chungah thlîrna in risânghei a siam a, a putiang bang khom a siam a. Jerusalem khua lui Milo an iti, rinêng an bun insipna mun kul banghei khom khah a siaminṭhat sa a. Ifei neh ipho itam takkah khom ân siam sa a.

⁶Kho mihei khah sipai ruaituhein an irui a, khopui lûtna kotbâi tualzôl rizat takah khan an hong ṭhui bûm a, a lei ithor a. An ziangah,

⁷“Tum inru takkan om unla, lungrizoiin om rei; Asuria rêng manih, a îruai sipaihei manih ṭi no rei. Tharâtna a man ai nei nêkan eimanin ei inei ual a nit.

⁸Aman chu miriam tharâtna a nei a, khan eimanin chu PUMAPA ei Pathian, ne ṭangpui rang neh ridoina ne doi pêk rang ei inei a nit,” a ti a. Mipui khah an rêng ṭongtlia khan lungngam a sak ok a.

⁹Senakeriba neh a sipaihei Lakis khuaah an om nungin itôika nungah khan Hezekia neh Judai ram mi, ama lôma Jerusalema omhei ziangah khan palâi a tir a;

¹⁰“Asuria rêng Senakeriban hingka hin a ti, ‘Jerusalem ihuala a om nungah im lungrizoina nangni pe a, a sungah nin lai om nuam mai? PUMAPA ei Pathianin Asuria rêng kut ata nen zôk a ti itin,

¹¹Hezekia hin tui rihâl neh voniṭâma thi rangin nangni ai lêm a nit hi.

¹²Nin pathian biakna mun risânghei neh mâichâmhei iṭhetin Jerusalem neh Judai ram mihei chu, mâichâm khatkatah Pathian chu chubai ûn nin ta, amakhan thil nin lan rang a nit,’ â titu khah hi Hezekia hih ai nit ni mak im a?

¹³Keimah neh ki chibulhei khan ram tina nam tinrêng deng kin inthei ngaizia khah nin riat im? An pathianhei khan kin kuta rithokin anni khah an inzôk ngai im a?

¹⁴Tik ngânah khan im ram danghei murdi an pathianhei khan kin kuta rithokin an ram an înzôk ngai? Nin Pathian khom hin kin kut ata nangni inzôk thei a ti iti tûngna nin inei mani?

¹⁵Khasikin, Hezekia hin nangni lêm no riseh, nangni dôi invêt no riseh, a ṭong khom iam pêk no rei. Asuria rêng kut ata a chubai iûntuhei inzôk theitu nam pathian zel om ngai mak a. Nin Pathian khom hin nangni a vân zôk no rang tlia chu na!” itin ṭong a thon a.

¹⁶Asuria sipai ruaituhei khan PUMAPA Pathian neh â som Hezekia chu an isîr insiat nôk ual a.

¹⁷Asuria rêng khan a lekha riziakah khan PUMAPA, Israel Pathian khah ân dôi tak tak a, “Nam dang pathianhei khomin ki kut ata an mihei inzôk thei mak a, Hezekia Pathian khomin a mihei khah ki kut ata inzôk thei ual no nih,” itin a irziak a nit.

¹⁸Jerusalem khopui khah iol tengka an lâk theina rang nîng a ti tûngin Jerusalem kulbang kôla omhei khah lungindôpa siam a tum a, Hebrai ṭongin thu a îsîr a nit.

¹⁹Jerusalem Pathian chu nam danghei pathian, miriam kuta siam angkah paiin a îsîr a nit.

²⁰Rêng Hezekia neh Amoza naipa zânthla Isaia khah an ṭongṭaia; Pathian an isam a.

²¹PUMAPA khan vântirtôn a zuk tir a, Asuria sipaihei neh an ruaituhei chu a zuang that a. Asuria rêng chu mualinphoi takkan a ram tiang a kîr nôk tâk a. Sûnkah chu an pathian biak inah a om lâiin a nai ṭhenkahei khan khandaiin an sât that tâk a.

²²Rêng Hezekia neh Jerusalema mihei khah khangkah takah khan Asuria rêng Senakeriba neh an irâl danghei kut ata PUMAPA khan ai sanisua a nit. An kôlvêla ramhei neh ringei takkan a în-om a nit.

²³Jerusalemah PUMAPA zianga thillan ilan rangin mi itam takkah an hong a, Hezekia ziangah khom thilpêk an hong pêk a; nam tinin Hezekia chu an irngai inlut a nit.

²⁴Hi lâi zoro vêlah hin Hezekia chu ithi lôkkan dam mak a. A ṭongṭaia, a dam nôk rang thu richikna PUMAPA khan a siam pêk a.

²⁵Nikhomsela, PUMAPA thiltho pêk khah lôm nachâng ilua khom reh mak a, arpâk sikah khan Judai ram neh Jerusalem khan an tuang tâk a.

²⁶A nungkhônah chu Hezekia neh Jerusalem mihei khah an insîr a, an ringai an intlôm a, Hezekia dam sungkah chu PUMAPA ningthikna an chungah tlung khâi mak a.

²⁷Rêng Hezekia chu archong tak tak tâk a, mi tinin an ringai inrisâng a. A rângkachak hei, tangkarua hei, lungmantam hei, thil namhoi hei, ipho hei, thil dang ilu tak tak hei siana rang inhei a sin a.

²⁸A bu hei, uain hei, oliv riak hei siana rang fasiar a sin a; serât in, bera rikul hei a siam sa a.

²⁹Hihei banah hin Pathianin bera hei, sial hei neh richon dang itam takkah a pêk a, khopui itam takkah ân ding a.

³⁰Hezekia hin Gihon dung tui a tial a, tui kong a siam a, Jerusalem khosunga khur khatkatah a înluang lût a nit. Hezekia chu ai tho tinrêngah lo a tluk thiai mai a.

³¹Ram pumpui chunga thil rikhêl itlung ridon infel ranga Babilon rêngin palâi a hong tir lâiah khan, ama fiana rang neh a lungrila om murdi riat theina rangin Pathianin a khâtin a îthla a nit.

³²Rêng Hezekia thiltho danghei, a thiltho ṭhathei khah Amoza naipa zânthla Isaia inlârna lekhabuah neh Juda neh Israel rênghei thurchi riziakna Bu-ah inchuang a nit.

³³Hezekia chu a thi a, rêng thlânmual chuanchungah an phûm a. Judai ram neh Jerusalema mihein a thiah khan an ichôiinrisâng tak tak a nit. A naipa Manasea chu arthûlin rêng a chang tâk a.