Read Biete 2 RICHISUINA 33 Bible Online

2 RICHISUINA 33 - Biete bible

2 RICHISUINA 33

¹Manasea kha Judai ramah rêng a changah khan kum sômlei kum inikah mi a nit a, Jerusalemah khan kum sômringakah kum ringakah a înlal a nit.

²PUMAPA zâra an ram an iluapêk tâk namhei thiltho ngai porinche tak takhei khah a tho a. Manasea khah PUMAPA chungah a îsual tak tak a nit.

³A pa Hezekian a îsiat tâk, nam dang pathian biakna mun risânghei khah a siaminṭhat nôk a. Baal zianga ribôlna lanna rang mâichâmhei a siam a, pathiannu Aseri rilimhei a siam a, ârsihei chubai a ûn a.

⁴Kumkhuaka PUMAPA chubai ûnna rang Tempilah khan nam dang pathian mâichâmhei a siam a.

⁵Tempil chontan inikatah khan ârsi biakna rang mâichâmhei a siam a.

⁶Hinom Phâiah hâlrivâm thillanin a naipahei a that a; thlasân thiam hei, dôithiam hei, kutzia enthiam hei, mithi sôn thiamhei a pan ngai a. PUMAPA chungah thil a thonsual a, ningthik a sak tak tak tâk a.

⁷A mirmil siam khah Tempil sungah a sia a, Pathianin Davida neh Solomona ziangah, “Israel namhei ram pumpuiah Jerusalem neh hi In hih ker ming rilamna mun ranga ki irthlang a nit.

⁸Kumkhuakan ki thupêk murdi an zôm a, ki Dânhei, ke som Mosian anni ai pêk khah an zômin chu Israelhei hih an richibulhei zianga kî pêk ram ata hih ûmisuaa an om rang phal no ning,” a lei iti thlâm tâk a nit.

⁹Manasea khan Judai ram neh Jerusalema mihei chu thil dikino ân tho a, Israelhei maa PUMAPA lei iûmisua namhei itho ngai nêka sual ilian ual an itho tâk a nit.

¹⁰PUMAPA khan Manasea neh a mihei ziangah khan thu â sîr ngai a, anni lak khan ringai nuam mak a.

¹¹Khasikah khan Asuria sipai iruituhei khah PUMAPA khan Judai ram khah ân rûn tâk a. Manasea chu an man a, zingzirin an khit a, Babilon tiang thîr kuaikimin an kâi a.

¹²A dengthei tuang sikah khan PUMAPA Pathian maah khan arngai ân tlôm tâk a, ṭangpuina a ngên a.

¹³Pathianin Manasea ṭongṭaina khah a lei ringai pêk a, a ngênna khah isâmin Jerusalemah ân fe khîr nôk a, roi ân rêl nôk tâk a. Hi sikah hin Manasea khan PUMAPA chu Pathian a nit ngêt iti a riat infel tâk a.

¹⁴Kha rizoiin chu Manasea khan Davida khopui, sak tiang panga kul bang putiang ita ual khah a zomin risâng ual a, Gihon tui omna phâi mâr tiang Inga Kotbâi bul Ofel an iti mun idênin a siam a. Judai ram kul inei kho tinah sipai pôl khatkah, â ruitu khatkah neh a sia chit a.

¹⁵Tempil ata nam dang pathian rilim neh mirmil inluan, ai siahei khah a khâi pai a. Tempil mual neh Jerusalem khuaa nam dang pathian biakna mâichâm iomhei khom khah a lâk a, a pai tâk a.

¹⁶PUMAPA chubai ûnna mâichâm ithlamhei khah a siaminṭhat nôk a, Ringeina thillan hei, lômthusîrna thillan hei a lan a. Judai rama mi murdi khah PUMAPA Israelhei Pathian chu chubai iûn rangin thu a pêk a.

¹⁷Mihei khan mahni omna mun chitah thillan la lan mai khom sela PUMAPA ziang bangah khan an ilan tâk a nit.

¹⁸Manasea thiltho dang murdi, Pathian zianga a ṭongṭaina hei, PUMAPA Israelhei Pathian riminga zânthlahein a zianga thu an îsîrhei khah Israel rênghei thurchi riziakna Bu-ah ai chuang a nit.

¹⁹Rêng Manasea ṭongṭaina neh Pathian sâmna hei, arlet maa thilisual ai tho thurchi hei, nam dang pathian biakna mun risâng hei, Aseri rilim a siam a, a mirmil inluan chubai a ûn thu hei kha zânthlahei thurchi riziakna bu-ah ai chuang riai a nit.

²⁰Manasea chu a thi a, rêng inah an phûm a, a naipa Amona chu arthûlin rêng a chang tâk a.

²¹Amona kha Judai ram rêng a changah khan kum sôminikah kum inikah mi a nit a, Jerusalemah khan kum inikah a înlal a nit.

²²A pa Manasea angkah ngirin PUMAPA chungah thilisual a tho a, a pa mirmil inluanhei chubai a ûn tâk a.

²³Khan a pa angkah khan ringai intlôm nuam mak a, PUMAPA tiang khom mâi ngat nuam mak a; a pa nêkah khan a îsual a nit.

²⁴A milianhein an phiarrûk a, rêng inah khan an that a.

²⁵Judai rama mihei khan Amona thattuhei khah an that a, a naipa Josia chu rêngin an siam tâk a.