Read Biete 2 RICHISUINA 34 Bible Online

2 RICHISUINA 34 - Biete bible

2 RICHISUINA 34

¹Josia kha Judai ram rêng a changah khan kum iriatkah mi a nit a, Jerusalemah kum sômithumkah khatkah a înlal a nit.

²PUMAPA lungdo a sin ngai a; a chibul Davida omdân angkan a om a, Pathian dânhei khah iṭha takkan ai zôm ngai a nit.

³Josia khah kum iriatkah ân lal kumah khan, la naiinpang ok khom sela, a chibul Davida Pathian khah isôn a phut tâk a. Kum ilika nungah vâng chu nam dang pathian isônna mun risânghei, Aseri rilim neh mirmil danghei khah â siat vang tâk a.

⁴A thupêkin a mihei khan Baal biakna mâichâmhei chu an itôk inrinôi a, a kôla namhoi hâlna mâichâmhei khom an isiat a. Aseri rilim neh mirmil danghei khah an itôk indi riai a, an zianga ribôlna lan ngaihei thlân chungah khan an ithek indar a.

⁵Nam dang thiampuhei rû khom an pathian biakna mâichâmah khan an hâl a. Hihei hih ithon Judai ram neh Jerusalem chu a thâr inrithiang nôk tâk a.

⁶Hi angkah ngirah hin Manasea hei, Efraim hei, Simeon hei ram, mâr tiang Naftali ram idênin an khopuia om neh an khorama omhei khom khah â siat riai a.

⁷Israel mâr tiang bial sunga mâichâmhei neh Aseri rilimhei â siat a, mirmilhei chu â tôk indi a, namhoi an hâlna mâichâmhei khom â siat riai a; khanchu, Jerusalemah a kîr nôk tâk a.

⁸Nam dang pathian ibia inmong a nit tâk a, ram neh Tempil a thâr inrithiang zoi, ân lal kum sômleiiriatna kumah khan Tempil sung siaminṭha rangin mi thumkah: Azalia naipa Safana hei, Jerusalem khua optu Maaseia hei, Joahaza naipa ruaitu liantak Joa hei a tir a.

⁹Levia chi, kotbâi vêngtuhein Tempil sum an irfuang ngai khah Thiampu laltak Hilkia ziangah an pêk ngai a. Efraim mihei, Manasea mihei neh Israel mâr tiang ram mihei zianga rithok neh Judai ram, Benjamin ram hei neh Jerusalem mihei zianga rithoka rifuang ngai a nit.

¹⁰Hi sum hih hi mi ithumkahei kutah ipe a nit a,

¹¹anni khan kutithiamhei neh in isintuhei kutah lung neh thing richona rang hei, thil lei ithlam tâk, Juda rênghein an lei ingaisak ino, bangru hei, phakilâi hei siaminṭhatna rangin an pêk a.

¹²Sin ithotuhei khan takritâi takkan sin an tho a, Levia chi mi ilikah: Meraria richia mi Jahata neh Obadia hei; Kohatha richia mi Zakaria neh Mesulama hei khan an enkol a. Hi Levia chihei hih irîhoi tum ithiam korong an nit.

¹³Levia richia mi ṭhenkah khan thil rithaktuhei khah an enkol a, sin dang danghei khom an enkol a, ṭhenkan thâmna an lei riziak infel a, ṭhenkah vêngtu sin an tho a.

¹⁴Sum bukna in ata sum an lâk suak lâiah khan PUMAPA Dân bu Mosia zianga Pathian ipêk khah Hilkia khan a mu a.

¹⁵Safana ziangah, “PUMAPA Tempil sungah hin Dân bu ki mu tâk,” a ti a. Lekhabu khah Safana a pêk a.

¹⁶Safana khan rêng ziangah a fepui a, “Ni thupêk lam angkah takin tinrêng kin tho zoi tâk.

¹⁷Tempila irê sum khah kin lâk suak a, sinthotuhei neh anmani enkoltuhei kutah kin pêk tâk.

¹⁸Khanchu, Hilkia ne ipêk, lekhabu ki hong ichôi a nit,” a ti a. Khante, rêng riat rangin a tep tâk a.

¹⁹Dan thu an itep khah rêngin a hang riatin chu a puanhei â potthlêr a,

²⁰Hilkia hei, Safana naipa Ahikama hei, Mikaia naipa Abdona hei, lekha ziaktu Safana hei, rêng enkoltu Asaia hei khah a koi a, hi thupêk hih a pêk a:

²¹“Hi Dân bu chungrichân thu-ah ki rang neh Judai rama la dam isunhei rangin PUMAPA chu ne sôn pêk ta u. Ei chibulhei khan PUMAPA thu zôm nuam mak a, hi lekhabua itho ranga itihei chu an tho nuam no sikin ei chungah PUMAPA ning ai thik tâk a nit,” a ti a.

²²Rêng thupêkin Hilkia neh mi danghei khah Tikva naipa Saluma nupui zânthla Huldaii ziangah an fe a. Tikva hi Harhasa naipa a nit a, Saluma chu Tempila thiampu thlukthla enkol ngai a nit. Thil omdân khah an isîr pêk a. Ani khah Jerusalem khua bung ithara om a nit.

²³Rêng ziangah ikîr nôk rangin anni khah â ril a,

²⁴PUMAPA ziang ata thucha hingka hin rêng a thon a: “Rêng riata itepa om lekhabu rizuata vânisalna murdi khah Jerusalem neh a sunga mihei chungah ki îṭhum rang a nit.

²⁵An ne heng a, pathian dang ziangah thillanhei an lan a, an sintho khan ki ning an înthik tâk a nit. Jerusalem chungah ki ning a thik tak tak a, dâi pai no nih.

²⁶Rêng chungchângah chu, Keimah, PUMAPA, Israelhei Pathianin hingka hin ki ti a nit. Lekhabua thu riziak chu ner ngai a,

²⁷ner let a, ki makungah ner ngaiintlôm tâk a. Jerusalem neh a sunga mi kuttum kî tho rang ki tiah khan ni puan ne potthlêr a, ni ṭap a. Ni ṭongṭaina chu ki lei riat tâk a.

²⁸Ni thi mâkah chu Jerusalem chunga dengtheina iṭhum rang kî ti khah zuang tlung no nih. Rithlaringam takkan nang ki înthi rang a nit,” itin. Kha thu khah ichôiin mihei khah Rêng Josia ziang tiang an kîr nôk tâk a.

²⁹Rêng Josia khan Judai ram neh Jerusalema upahei khah a koibûm a.

³⁰Thiampuhei khah Levia chihei neh khan Tempilah an fe a, mi richonghei neh mi inrianghei khomin an zui a. Rêng khan Tempil sunga an imu thuthlung bu khah mipui maah khan iring takkan a tep suak a.

³¹Rêng idingna ranga mun ibîk chopui bulah khan â ding a, PUMAPA ziangah thu a thlung a: a thu zôm a, lungril taka a dânhei neh a thupêkhei ivong rangin ṭong ân kung a, lekhabua thu chuang murdi izôm riai rangin a înkung a nit.

³²Benjamin mihei neh Jerusalema om murdi chu thuthlung ivong rangin ṭonginkungna a înnei a nit. Khaangkan an chibulhei Pathian neh thuthlung an lei isiam tâka itho rang iomhei chu an zôm tâk a.

³³Rêng Josia khan Israel mihei ram sunga mirmil itiriom tak takhei chu â siat riai a, a dam sungkah khan mihei khan an chibulhei Pathian PUMAPA sin khah a intho a nit.