Read Biete 2 RICHISUINA 35 Bible Online

2 RICHISUINA 35 - Biete bible

2 RICHISUINA 35

¹Rêng Josia khan PUMAPA chôiinrisângin Jerusalemah Kalkan kût a mang a. Thla khatna sûn sômleiilika nî-ah khan Kûtna rang ran an that a.

²Thiampuhei chu Tempila an tho rang sin a sem pêk a, iṭha takka sin rangin â thor a.

³PUMAPA ranga iserinran, Dân inriseitu Levia chihei khom hingka hin â ril a, “Davida naipa Solomona isin Tempil sungah Thuthlung Bôm hih seh rei, rizôna ithon mai nang khâi no nia, nin Pathian PUMAPA neh a mi Israelhei sin kha nin tho rang a nit.

⁴A panam namin Tempila nin omna rangah om unla, nin tho rang rêng Davida neh a naipa Solomonan nangni an înkot khah tho rei.

⁵Sin nin risem tikin Israel insungkua tin nin ṭangpui theina rangin ṭangpuitu rang mi ṭhenkah nin phun rang a nit.

⁶Kalkan Kût sa rang bera neh kêl nin that rang a nit. Atûnah hin rithâr rithiang unla, ribôlna thillan ranghei lanpui unla, Mosia zianga PUMAPA thupêk angkana tho rang khah nin suapui Israelhei khomin an zôm theina rangin ribôlna thillan khah inrifûk rei,” a ti a.

⁷Kalkan Kûta mipui mang rangin Josia khan ama ran lâia rithokin berahei, beratehei, kêltehei sîngithumkah neh serâtchal sângithumkah a pêk a.

⁸A milianhei khom khan mipuihei, thiampuhei neh Levia chihei fâk rang an pêk sa a. Tempil ruaitu thiampu laltak Hilkia hei, Zakaria hei neh Jehiela hei khan beratehei neh kêltehei sînginikah sângirukkah neh serâtchal rizathumkah Kût sunga thillana an lan rangin thiampuhei khah an pêk a.

⁹Levia chi ruaitu Konania hei, Semaia hei neh ân zirpuipa Nathanela hei, Hasabia hei, Jeiela hei neh Jozabada hei khan berate neh kêlte sângringakah neh serâtchal rizarngakah Levia chihein ribôlnaa an lan rang an pêk sa a.

¹⁰Kalkan Kût mangna rang tinrêng an infel zoiin chu rêng thupêk angkan thiampuhei neh Levia chihei chu an om mun rang chitah an om a.

¹¹Kêl neh bera an that zoiin chu Levia chihei khan a vun an lâi a, thiampuhei khan a thisen khah mâichâm chungah an rithe a.

¹²Hâlrivâm thillanna mang rang kha a insungkua kua rangin Mosia Dân bua riziak angkana an lan rangin an sem a.

¹³Levia chihei khan Dân thupêk dungizuiin Kalkan Kût sa khah an ri-em inmin a, thillan sa rithiang ṭhenkah chu bêlah hei, bêlpuiah hei, thîrbêlah hei an but a, a sa chu mipui an sem pêk a.

¹⁴Kha rizoiah khan anmani fâk rang neh Arona richi thiampuhei rang sa an inrifûk nôk a, thiampuhei khan hâlrivâm thillan neh an thillan thâi hâlna mei khah zân zîng mâkah an ibuaipui mai a nit a.

¹⁵Levia richi, Asafa panama mi irîhoi itum ngaihei khah rêng Davida thupêk lamin an omna rang munah, Asafa hei, Henana hei, rêng zânthla Jeduthuna hei hin sin an tho a. Tempil vêngtuhei rang khomin an munhei ima nang pêk mak a, an champui Levia chi mi danghei khan an ta rang khom Kalkan Kût sa khah an lei înrifûk pêk a nit.

¹⁶Khaangkan rêng Josian thupêk angkah takin PUMAPA khah chubai an ûn a, itho rang murdi, Kalkan Kût imang hei, mâichâma hâlrivâm thillan ilanhei khah an tho a.

¹⁷Sûn rukka sung Kalkan Kût neh Bairiam Kût khah Israel mi murdîn an mang a.

¹⁸Zânthla Samuela thi zoi ata chu hingkah taka roinpuiah hin Kalkan Kût khah an imang ngai ino a nit. Rêng Josia hei, thiampu hei, Levia chihei, Juda neh Israel rama omhei neh Jerusalema omhei khan Kalkan Kût an imang angkah hin rêng masahei khan an lei imang ngai ino a nit.

¹⁹Rêng Josia kum sômleiiriatkah ân lal kumah khan an imang a nit.

²⁰Rêng Josian hingkah taka Tempil ta ranga a tho zoi nungah khan Aigupta rêng Nekoa khan Eufratis vadung panga Karkhemisah ridoi rangin a sipaihei a ṭhui a. Josia khan lei idan a tum a.

²¹Khanniseh, Nekoa khan palâi hong itirin hi thu hih Josia a thon a, “Nangmah Juda rêng, hi thilah hin ni lei hong ṭangna rang omak. Nang idoi ranga hong ni mang a, ke râl idoi ranga hong kêng kî nit. Pathianin rimot rangin a ne îril a nit, ani chu ki tiang a ṭang a; khasikin, ne lei idan no roh; khanonchu, nang isehchit duai a ti,” a ti a.

²²Josia khan lei idoi a tum ngit a, Nekoa manga Pathianin thu a îsîr khah ringai nuam mak a, arvo indanglamin Megido phâiah khan ridoi rangin a fe sa tâk a.

²³An ridoi lâi takah khan Aigupta sipai thal khan Josia khah a tokfûk tâk a, â somhei ziangah khan, “Kî nat ok tâk kêng, ridoina mun ata hih ne ropui ta rei,” a ti a.

²⁴Ama tâli ata khah an rizôn suak a, kha muna ai chôi tâli dangah khan an bâng a, Jerusalem tiang an ṭhui tâk a. Khan a thi a, rênghei thlânah an phûm a, Judai rama neh Jerusalema mi murdi khan an ṭâ a.

²⁵Zânthla Jeremia khan rêng Josia ṭâna la a phua a, Israelhei lâiah khan lâ sak ngai mi, ipa neh nupanghein rêng ṭâna lan an isak ngai a nit. Sûnna lâhei riziakna bu-ah hi lâ hih ai chuang a nit.

²⁶Josia thiltho rêng rêng, PUMAPA arngaiinnat ziahei, Dân thu a zôm ziahei khah

²⁷a bula rithokin a mong idênin, Israel neh Juda rênghei thurchi riziakna Bu-ah ai chuang riai a nit.