Read Biete 2 RICHISUINA 36 Bible Online

2 RICHISUINA 36 - Biete bible

2 RICHISUINA 36

¹Juda rama mihei khan Josia naipa Joahaza khah rêngin an rithlang a, Jerusalemah riak an inrithu a.

²Joahaza khah kum sôminikah kum ithumkah mi a nitin Judai ramah rêng a chang a, Jerusalemah thla thumkah a înlal a nit.

³Aigupta rêng Nekoa khan suakin a ṭhui a, Judai ram chu tangkarua her sângithumkah rizalikah neh rângkachak her sômithumkah ilikah sia an închôi a nit.

⁴Nekoa khan Joahaza inzirpuipa Eliakima khah Judai ram rêngin a phun a, arming khah Jehoiakima itin ai thleng pêk a nit. Joahaza kha Aigupta ramah Nekoa khan a ṭhui a.

⁵Jehoiakima khah Judai ram rêng a changin kum sôminikah kum ringakah mi a nit a, Jerusalemah kum sômleikhatkah a înlal a nit. PUMAPA, a Pathian chungah thil ai thonsual ngai a nit.

⁶Babilon rêng Nebukadnezara khan Judai ram a hong rûn a, Jehoiakima khah a man a, zingziria khit pumin Babilonah a ṭhui tâk a.

⁷Nebukadnezara khan Tempila thil ilu ṭhenkah a chôi sa a, Babilona a rêng inah a sia tâk a.

⁸Jehoiakima thiltho murdi, thil tir iom tak tak ai thohei neh sual ai sinhei khah Israel neh Juda rênghei thurchi riziakna Bu-ah ai chuang a nit. A naipa Jehoiakina khah arthûlin rêng a chang tâk a.

⁹Jehoiakina kha Judai ram rêng a changin kum sômlei kum iriatkah mi a nit a, Jerusalemah thla thumkah neh sûn sômkah a înlal a nit. Ani khom PUMAPA chungah thil a thonsual ngai a.

¹⁰Kholum a hong riphutin chu rêng Nebukadnezara khah a hong a, Babilonah suakin a ṭhui a; Tempila thil iluhei khom a chôi riai a. Khanchu, Nebukadnezara khan Jehoiakina pangâk Zedekia khah Judai ram neh Jerusalemah rêngin a siam tâk a.

¹¹Zedekia kha Judai ram rêng a changah khan kum sôminika khatkah mi a nit a, Jerusalemah kum sômleikhatkah a înlal a nit.

¹²PUMAPA chungah thil isual a tho a; PUMAPA thu thluntu zânthla Jeremia thu khom ringai inrup khomin ai be no a nit.

¹³Zedekia chu rêng Nebukadnezara chungah arhel tâk a. Pathian rimingin iamomna thu ân rikhâma, rênga ai siam a nit a. A tuklullian â sua a, rilet nuam mak a, PUMAPA, Israelhei Pathian tianga kîr nôk ai nuam ino a nit.

¹⁴Juda ruaituhei, thiampuhei neh mipui khomin an kôlvêla nam isualhei tho dân an lâk a, PUMAPA înrithiang tâk Tempil khah mirmil chubai iûnin iborin an siam tâk a.

¹⁵Tempil neh a mihei izua a nuam sikin PUMAPA, an chibulhei Pathian khan a mihei riningna ṭong ipeh rangin zânthlahei a tir mai ngai a.

¹⁶Khanniseh, Pathian mi tirhei khah an nuiso a, an thuhei lak khah chanlamboiin an be pêk a. Zânthlahei khah nuizabûrin an mang a, a nungkhônah chu zôkna rêng rêng om khâi loiin mipui chungah khan PUMAPA ningthikna natinsat tak chu ai ṭuang tâk a nit.

¹⁷Khanchu, PUMAPA khan anmani denginthei rangin Babilon rêng khah a hong ṭhui a, rêng khan Judai ram tlangvâlhei khah Tempil sung ten iluah khom a that a. Naipang khom ulian khom, a nupang â pan, â dam neh â dam ino khom tute chungah lungkhamna nei loiin Pathianin an rêngkan a kutah ai pêk riai tâk a nit.

¹⁸Babilon rêng khan Tempil khah â rok a, thil ilu an isiahei khah a lâk a, rêng-in neh milianhei ina thil iom murdi khah Babîlon tiang a thôt vang tâk a.

¹⁹Tempil neh khuaa rêng inhei neh richonhei murdi khah a hâl inrivâm vang a, khopui kulbanghei khom a ṭhet isim a.

²⁰Â thi bânhei khah Babilonah suakin a ṭhui a, Babilon rêng neh archihei bôiin kha ramah khan an om a, Persia râl a hong lian idênin bôi an ichang mai tâk a nit.

²¹Jeremia bâia PUMAPA thu lei rillôk, “Kum sômsarika[2] sung nin ram khah arngam riam rang a nit,” iti khah a hong itlung tâk a nit.

²²Persia ramah rêng Kura ân lal kum khatna kumin PUMAPA khan a zânthla Jeremia manga thu a lei înpuang khah a takin â thlun tâk a. Rêng Kura khah a zêk a, hingka hin thu ân pêk a; a rêng ram mun tinah iring takka tep rangin hi thupêk hih ân sua a:

²³“Amahih Persia rêng Kura thupêk chu a nit. PUMAPA rivân Pathian khan rammual pumpuia roirêltun a ne siam a. Judai ram Jerusalemah a rang Tempil isin pêk rang khomin a ne iti a nit. Atûnah hin nangmani Pathian mihei o, kha munah khan fe ta rei, PUMAPA nin Pathian khan nangni ompui riseh,” itin.