Read Biete 2 RICHISUINA 4 Bible Online

2 RICHISUINA 4 - Biete bible

2 RICHISUINA 4

¹Rêng Solomonan dâr mâichâm mûk sôminika chêng a, mûk sômka risâng a siam a.

²Tuipang, a vêlka rikhîa mûk sômithumkah, a khang mûk sômka leng, mûk ringaka risâng, dârin a siam a.

³Tuipang bang putiang kha serâtchal rilim rân inika ivo a nit a, a tuipang inluan ruala inluan sa zel a nit.

⁴Tuipang kha serâtchal rilim sômleiinika chungah inṭhung a nit a, ithumkan mâr tiang an ngat a, ithumkan sim tiang an ngat a, ithumkan sak tiang an ngat a, ithumkan thlang tiang an ngat a, an inungtiang chu artôn korong a nit.

⁵Tuipang bang kha zabokka sa a nit a, â rei kha kilât bâi ipar, pâr angkana pâr a nit.

⁶Dâr tâbor sômkah a siam sa a, ringakah kha Tempil sim tianga iseh rang a nit a, ringakah dang kha mâr tianga seh rang a nit. An kût mang zoroa hâlrivâm thillan rang risûk infâina rang a nit; tuipang iliana tui kha chu thiampuhei mang rang a nit.

⁷An siam ngai dân angkana siam rângkachakin meiser siana sômkah neh docham sômkah an siam a.

⁸Tempil chontanpuiah khan kilka tiang ringakah, kilka tiang ringakah meiser siana neh docham kha an sia a. Rângkachak berbu rizakah an siam sa a.

⁹Thiampuhei omna rang chontanhei neh tual zôlhei an siam a. Chontanhei kâra kotbâi chu dâra tuam korong an nit.

¹⁰Tuipang chu sim sak tiang Tempil ikilah khan an inṭhung a.

¹¹Hurama khan bêlhei, rivut luakhei neh kurihei a siam sa a. Rêng Solomona zianga Tempila mangrua isiam ranga a lei înkung murdi khah a siam zoi riai tâk a: Dâr chopui inikah chopuihei sîpa a lubôkhei, a lubôkhei chunga zingziri phiara vohei, a lubôkhei ivêlka rân inika siam theisen rizalikahei, tâbor sômkahei neh a nôlna tâli sômkahei, tuipang ilian, tuipang inṭhungna serâtchal sômleiinikahei; bêlhei, rivut luakhei, dâr ikhênṭâkhei kha ai siam a nit. Kha thilhei khah PUMAPA Ina mang rangin Hurama, kutithiam tak khan dâr ritle mangin rêng Solomona thupêk lam angkah takin ai siam a nit.

¹⁷Sokot neh Zereda kâr, Jordan dung phâizôl thîrsiamna khurah khan kha thilhei khah rêng khan kutithiamhei a însung a nit.

¹⁸Hi bûrbêlhei hih a tam rai sikin dâr an imang rik zâk her zon khah ireh thei ai nit ino a nit.

¹⁹Rêng Solomona khan Pathian Tempil sunga thil iom murdi kha a siam a, rângkachak mâichâm, ibai iser siana rang hei,

²⁰Mun Rithiang taka chok mai rang rângkachak inthâra siam meiser neh a siana hei,

²¹pâr rilima vonahei, meiserhei, châichehei,

²²meiser hup thatnahei, berbuhei, namhoi hâlna khêngtehei, mei ri-al chôina meiluakhei. Hi thilhei murdi hih rângkachak inthâra siam rong a nit. Tempil lûtna putiang inkhârhei neh Mun Rithiang tak lûtna inkhâr khom kha rângkachaka tuam a nit.