Read Biete 2 RICHISUINA 6 Bible Online

2 RICHISUINA 6 - Biete bible

2 RICHISUINA 6

¹Rêng Solomona chu a ṭongṭai a, “PUMAPA sûm neh izîng kâra om rangin ni lei rithlang a,

²atûn chu, Tempil iṭha tak nang kî sin pêk a nit tâk, kumkhuaka ni omna rang chu,” a ti a.

³Israel mi murdi amakhan an iding a, Solomona khan an tiang a ngat a, Pathian ṭhatvurna a ngên pêk a.

⁴An ziangah khan, “Israelhei Pathian, PUMAPA chu inpâk rei. Ani khan ki pa Davida zianga a ṭonginkung a zuang ilen tâk a nit hih.

⁵“PUMAPA khan, ‘Ki mihei Aigupta rama rithoka ki hong ṭhui isua ata khah atûn tenan Israel khopui tak munah khom chubai an ne ûnna rang Tempil sinna rang mun lar thlang ngai mang. Kha sin rangah khan ki mi Israel tukhom lar thlang ngai mang e.

⁶Atûn chu chubai ne ûnna mun rangin Jerusalem hi ker thlang tâk a, nangmah Davida, ki mihei chunga rêng rangin nang ki irthlang tâk a nit,’ a ti a.

⁷“Ki pa, Davida khan Israelhei Pathian, PUMAPA isônnah rang Tempil isin a tum a;

⁸Khanniseh, PUMAPA khan a ziangah, ‘Ki omna rang In ne sin pêk rang nî tum hi ni thôn ṭhat a nit,

⁹khan nangman chu sin no tin a, ni naipa, ni nai ngêi khan a nit Tempil chu ai sin rang,’ a ti pêk a.

¹⁰“Atûnah hin PUMAPA khan a ṭonginkung khah a len tâk a, ki pa Davida rithûlin rêng ki hong nit a, a rêngṭhungmunah â thûlin ke ṭhung tâk a; hi Tempil hih Israelhei Pathian, PUMAPA riming omna rangin kî sin zoi tâk a nit.

¹¹Israel mihei neh thuthlung ai siam lungphêkhei siana Thuthlung Bôm khom Tempil sungah kî sian fel tâk a nit,” a ti a.

¹²Mipui maah Solomona chu ifen mâichâm matonah â ding a, â bân ipharin a ṭongṭai a.

¹³(Solomona khan dâr docham a dung neh a khang mûk ringaka ri-el bang a, mûk ithumka risâng a siam a, Tempil tual inlâinaah khan a sia a. Docham chungah khan a lui a, mi tinin an mu theina rangin arkhûk a dil a, rivân tiang â bân a phar a.)

¹⁴A ṭongṭai a, “O PUMAPA, Israelhei Pathian, rinêng neh rivânah nangmah angkana pathian zel omak. Ni mihei neh ni thuthlung ni vong ngai a, ni thu an zôm ngânin chu lung ni thlung zia nen lang ngai a.

¹⁵Ki pa, Davida zianga ni ṭonginkung khah ni len a, vuanah hin lo ni întluk tâk a nit.

¹⁶Atûnah hin O PUMAPA, Israelhei Pathian, ki pa Davidan ni dânhei a zôm a, archihei khomin an zôm ngânin chu, ‘archihei lâia khatkah chu Israel rêng chang mai an ti,’ iti ni lei înkung khah zuang len ta roh.

¹⁷Khasikin, atûnah hin, O PUMAPA, Israelhei Pathian, ni bôi Davida zianga ṭong ni lei înkung murdi khah hong tlung idik ta riseh.

¹⁸“Pathian tak chu nuai miriamhei lâiah hin ni om nuam rang mani? Rivâna lua ileng mak che a, ingka ngân im ki Tempil sinah hin ileng thei tâng ni tîm na?

¹⁹O PUMAPA, ki Pathian, ni bôi ki nit a, ni zianga ki ngênnahei hih lo ne tluk pêk roh.

²⁰Ner ming omna ranga ni irthlang, hi Tempil hih sûn neh zânin vêng inla, hi Tempil ma songa ki ṭongṭai zoron ne lei ringai pêk roh.

²¹Ki ṭongṭaina hih ner ngai pêk roh, ni mi Israelhei, hi Tempil ingata an ṭongṭaina lei ringai pêk roh. Ni in rivân risânga rithokin lei rian la, kin sualhei ne zâ roh.

²²“Tukhom, thilisual ithoa intum, ni mâichâm maah ihong a, thonchâi a nei nozia riatna rangin vâni arsâmin chu,

²³O PUMAPA, rivânah khan lei ringai inla, ne som chungthu khah idik takkan rêl pêk inla, mi sual khah kuttum thon la, thonchâi nei ino khah isua roh.

²⁴“Ni chungah an isual sika ni mi Israelhei chu an irâlhein an inê a, ni tiang ingata hi Tempilah hin an hong a, izâna zonga ringaiintlôm takka an ṭongṭaiin chu,

²⁵rivâna rithokin lei ringai pêk roh. Ni mihei sual chu izan la, anni neh an chibulhei nî pêk ramah khan ṭhui ikhîr nôk roh.

²⁶“Ni mihei isual sika khua nen kang a, an sual rileta hi Tempil ingatin ringaiintlôm takka ni ziangah an ṭongṭaia a nitin chu,

²⁷O PUMAPA, an ngênna khah rivâna rithokin lei ringai pêk inla, ni bôi Israelhei sual khah izan la; thil idik itho inrisei roh. Khante, O PUMAPA, ni mihei chu an lua thal ranga nî pêk ramah hin rua zuang insûr nôk roh.

²⁸“Ṭâm itla hei, ripui inlêng hei, phâivua lumin chimu a sêm isiat a, ikhâihei an pung a, irâl hong ilianin manih, rîrâi neh damnona an lâiah a lêng zoron,

²⁹an ṭongṭainahei khah lei ringai pêk roh. Ni mi Israel, a tukhom riletna dik taka ni Tempil tiang ingata an ibân iphara an ṭongṭaiin chu,

³⁰an ṭongṭainahei khah lei ringai pêk roh. Ni omna rivân risânga rithokin lei ringai pêk inla, anni chu izâ roh. Nangmah bang hin miriam lungril inthûk taka ringaituanahei â reh theitu ni nit a.

³¹Kin chibulhei nî pêk ramah an om sungkah chu nangmah hih nang an ṭi a, ni thu an zôm theina rangin an inrup lam angkah takin an chungah tho pêk roh.

³²“Nam dang, Israel mi ni no, ram ilah taka omhei khan ni roinpuizia neh ni sinthotheizia kha an riat a, iṭangpui rangin ner siam ṭian iti iria a, hi Tempilah hin iṭongṭai ranga an hongin,

³³an ṭongṭaina khah lei ringai pêk roh. Ni omna rivâna rithokin lei ringai pêk inla, an ngênna khah tho pêk roh; khanchu, rammuala mi tin tinin nang riang an ta, ni mi Israelhei angkan ni thu an izôm rang a nit. Khante, hi Tempil kî sin hih nangmah chubai nang ûnna rang mun a nit, iti riang an ti.

³⁴“An irâlhei idoi ranga ni mihei ni tir tikin tak muna rithok khomin ni irthlang hi khua manih, ni ranga kî sin Tempil tiang manih ingata ni ziangah an ṭongṭaiin chu,

³⁵an ṭongṭainahei khah lei ringai pêk roh. Rivâna rithokin lei rian la, an irâlhei khah inêpui roh.

³⁶“Ni mihei, ni chungah an isual a, â sual ino zel an om noa, ni ningthikin an irâlhei nen nê a, ram dangah suaka tâng rangin anni chu nen ṭhui a, an ṭhuina ram khah lah vit khom seh,

³⁷ni mihei ṭongṭaina khah ringai pêk roh. Kha ramah khan an rilet a, ni ziangah an ṭongṭaia, an sual neh an thonchâinahei an inpuangin chu, O PUMAPA, an ṭongṭainahei khah lei ringai pêk roh.

³⁸Kha ramah an om nungin an sual an rilet titak a, insîr a, an chibulhei zianga nî pêk ram tiang hei, ni ta ranga ni khopui rithlang tiang hei, ni ta ranga kî sin hi Tempil tiang hei ingata an ṭongṭaiin chu,

³⁹an ṭongṭainahei khah ringai pêk roh. Ni omna rivâna rithokin lei rian la; lung inkham inla, ni mihei chu an sual murdi izâ roh.

⁴⁰“O Ki Pathian, ne zuk thlîr inla, hi muna kin ṭongṭaina hih lei ringai roh.

⁴¹“O PUMAPA Pathian, thoi inla, Ni omna rang Tempilah hin zuang inla, Ni roinpuizia langna Thuthlung Bôm neh hin lût roh. O PUMAPA Pathian, ni thiampuhei chu an sintho tinrêngah ṭhatvur inla, Ni mi Rithianghei chu ni ṭhatnahei sikah khan lôm mai riseh.

⁴²O PUMAPA Pathian, ni riak inrithu-ah hih nungsong non la, Ne som Davida thil iṭha thohei khah remai roh,” a ti a.