Read Biete 2 RICHISUINA 7 Bible Online

2 RICHISUINA 7 - Biete bible

2 RICHISUINA 7

¹Rêng Solomona a ṭongṭai zoiin chu rivâna rithokin mei a zuang a, ribôlna thillanhei khah a zuang kâng riai tâk a, PUMAPA ompuina vâr ri-el khan Tempil khah a sip zit tâk a.

²Tempil sung kha PUMAPA roinpuina khan a sip zit tâk sikin thiampuhei khah lût thei khâi mak a.

³Rivâna rithoka mei zuang iṭum neh PUMAPA roinpuina vâr khan Tempil khah a sip zit tâk iti an mun chu Israel mipuihei kha tualah khan an mâi lingisikin an ibok a, Pathian chubai an ûn a, a ṭhatna sik neh a lungkhamlianna sikin an inpâk a.

⁴Khanchu, Solomona neh mipuihei khan PUMAPA ziangah ribôlna thillan an lan a.

⁵Ringeina thillan rangin serât sînginikah neh sânginikah, bera nuaikah neh sînginikah an lan a. Khangkah takah khan Solomona neh mipuihei khan Tempil khah an ilan tâk a nit.

⁶Thiampuhei chu an idingna mun ranga indangah khan an iding a, Levia chihei khan Davida ipêk irîhoi mangruahei imangin Pathian inpâkna lâ, “A lungkhamlianna chu kumtluanga rang a nit,” iti la Davidan isak ranga a ti lam angkah takah khan an sak dur dur a. Thiampuhei khomin mipui idinghei maah khan bekul an mût vung vung a.

⁷Solomona khan Tempil kot tualzôl khom khah thâr inrithiangin a lan a, hâlrivâm thillan, bubâl thillan, ringeina thillana sathâihei kha a hâl a. Dâr mâichâm ai siam khah hi thil murdihei lanna rangin a chîn rai sikah khan tualah hin an ihâl a nit.

⁸Rêng Solomona neh Israel mi murdihei khan Dângdi Kût khah sûn sarikah an mang a. Israel mâr mong tiang Hamath pialikot neh sim tiang Aigupta ramrîa mi murdi khah an hong ribûm a, mi an itam tak tak a nit.

⁹Mâichâm ilanin sûn sarikah a lût a, Dângdi Kût hin sûn sarikah dang ai lût nôk a nit. Kût sûn nungkhôn takah khan chu ṭinnah inkhôm roinpui an nei a,

¹⁰atûk sûn, a thla sarina sûn sôminikah thumnaah khan Solomona khan mipuihei kha â ṭhîn tâk a. PUMAPA khan a mi Israelhei ṭhat a vur a, Davida hei, Solomona hei ṭhat a vur sikah khan mipui kha an lôm tak tak a.

¹¹Rêng Solomonan ân rifûk lam angkah takin Tempil neh rêng-in a sin zoi diam tenan chu,

¹²zânah PUMAPA chu a ziangah a zuang inlâr a. A ziangah khan, “Ni ṭongṭaina ki lei riat a, Tempil hih ki zianga ribôlna thillanhei nin hong lanna mun rangin ki îham tâk a nit.

¹³Khua ken kangin manih, chimu ifâ seh rang ikhâihei ken pungin manih, ki mihei chungah ripui ki tirin manih khomin,

¹⁴Ker ming ripu ki mihei hin ringaiichîn taka ki ziangah an ṭongṭaia, an rileta, an sualna ata ki tiang mâi an hong ngat nôkin chu, rivâna rithokin lei ringai pêk ki ta, an sualhei chu izâng ki ta, an ram chu indam nôk ki ti.

¹⁵Tempil hih op mai ki ta, hi muna an ṭongṭaina murdiheiah ke kuar lei sung ki ti.

¹⁶Kumkhuaka chubai an ne ûnna mun rangin ker thlang a, ki thâr inrithiang tâk sikin op mai ki ta, ihoih mai ki ti.

¹⁷Nang khom, ni pa Davidan iam iom taka ki sin ai tho angkan ni tho a, ki dânhei ni zôm a, ki thu nang pêk murdi ni zômin chu,

¹⁸ni pa Davida zianga ki ṭonginkung khah len ki ta; archihei chu Israelhei rêngin iṭhung mai an ti iti ki lei înkung a nit.

¹⁹Nin ta ranga ki thupêkhei neh ki dânhei khah nangmah neh ni mihei khan nin zôm nuam no a, Pathian danghei chubai nin ûn a, a sin nin thon chu,

²⁰ram nangni kî pêka rithokah hin nangni ûm isuang ki ta, chubai nin ne ûna ngai ranga ki Tempil kî thâr inrithiang khom hih kî mâk rak rang a nit. Mi tinin nangni nuiso an ta, nangni musit an ti.

²¹“Atûnah hin hi In hih mi tinin an ringai inlut a, khatik tenan chu a kôla thleng rilôi murdi kan arkhêl tîng an ta, ‘Îtho sik im PUMAPA hin hi ram neh hi Tempil hih hingka taka ai tho tâk,’ la tîng an ti.

²²Mi ṭhenkahein, ‘An chibulhei Aigupta rama rithoka ṭhuisuaktu PUMAPA an Pathian khah nung an song tâk sika a nit hih; pathian danghei an itûk a, an sinhei an tho pêk sikin PUMAPA khan an chungah hi vânduaina rikhêl hih a îṭhum a nit hih,’ itin la sâm an ti,” a ti a.