Read Biete 2 RICHISUINA 8 Bible Online

2 RICHISUINA 8 - Biete bible

2 RICHISUINA 8

¹Solomonan PUMAPA Tempil neh a rêng-in a sin sung kha kum sôminikah a lût a.

²Hiraman khopui ai pêkhei khom khah a siaminṭhat a, kha muna om rangin Israelhei a tir a.

³Solomona khan Hamath neh Zoba ram bial a doi a, a lâk a.

⁴Ramchâra om Palmura khopui kulpui khom kha a siam a. Hamath biala khuahei kha fasiarpui omna mun rangin a siaminṭhat a.

⁵Solomona khan Beth-Horon chuanchung neh chuannuai kul banghei kha a siaminṭhat nôk a, inkhârhei khom a kalhei neh a siam a.

⁶Baalat khopui neh fasiarpui omna khopui hei, a sakorhei neh a tâlihei a siana khopuihei khom a siaminṭhat nôk riai a. Jerusalemah hei, Lebanonah hei neh a ram sung rêng rênga in isin a tumna mun ikipah khan in a sin khai a.

⁷Israel mi nino, Hit mi hei, Amor mi hei, Periz mi hei, Hiv mi hei, Jebus mi hei, Kanan rama lei iom, Israelhein Kanan ram an lua a, an that bânhei khah Solomona khan bôi angkana mang rangin sinitho pôl ân ding a, khahei khah atûn tenah hin an lai om mai a nit.

⁹Israel mihei kha chu sinitho ranga dânde ni mak; sipaiheiah ruaituheiah, sakor tâli ruaituheiah, sakor chuangmiheiah an irmang a nit.

¹⁰In isin enkoltu mi rizanikah sômringakah an iom a nit.

¹¹Solomona khan a nupui, Aigupta rêng nainu rangin in a sin a, Davida khopui ata khah a ṭhui suak a, in ai sin pêkah khan ân om tâk a. “Ki nupui hih Israel rêng Davida inah hin a om rang ni mak e, Thuthlung Bôm a omna kangân chu mun rithiang kêng a nit a,” a ti a.

¹²Tempil kottuala mâichâm ai siamah khan Solomona khan hâlrivâm thillanhei a lan a.

¹³Mosia dân bua chuang angkah takah khan sûn tina lan rang hei, sabatnîa lan rang hei, thla thara lan hei neh kumka sunga kût voi thumkah, chol pol ino bairiam kût hei, Pentikos Kût hei neh Dângdi kût heia lan rang bitukhei khah a lan a.

¹⁴A pa Davida lei inrifûk dân dungizuiin thiampuhein sûn tina an tho rang kha ân felpui a, inpâkna lâ saknaa thiampuhei lei ithlop rang Levia chihei tho rang khom ân fel pêk a. Tempil vêngtuhei sûn tina a pôl pôla an tho rang hei, kotbâi an vêng rang hei, Pathian mi, Davidan thu a lei pêk lam angkah takah khan ân rifûk riai a.

¹⁵Fasiarpui neh thil dang chungchânga thiampuhei neh Levia chihei zianga Davida thupêk murdi khah îtinrêng a tho riai a.

¹⁶PUMAPA Tempil sinna rang lung an phûm nî-a rithoka arzoi vang riai idêna Solomonan itho ranga a înkung murdi chu an tho zoi vang tâk a, sin tinrênghei chu a irzoi vang tâk a nit.

¹⁷Edom rama Agaba tuiikil rikuang ngammunhei, Ezion-Geber hei neh Elath khua heiah khan Solomona chu a fe a.

¹⁸Rêng Hirama khan rikuang neh rikuangpu thiam tak tak a hong thon a, Solomona mihei neh khan Ofir ramah an fe a, rângkachak her sînglei sângringaka nêka tam ual an hong chôi a, rêng Solomona ziangah an hong ithlun a.