Read Biete 2 RICHISUINA 9 Bible Online

2 RICHISUINA 9 - Biete bible

2 RICHISUINA 9

¹Seba rêngnun Solomona riming inthangzia a riatin chu thu khir tak tak ridona ifia rangin Jerusalemah a hong a. Champui itam takka a hong ṭhui a, namhoi ipêl saringsei itam takka a ṭhui sa a, lungilu neh rângkachak khom itam takka ai pêl a nit. Solomona neh an rimun chu ṭongridon rua ai nei murdi ardon riai tâk a.

²A irdon murdi khah Solomona khan a sâm thei vang a, sâm intak ai ti zel îte omak a.

³Seba rêngnu khan Solomona vârzia khah a riat a, a rêng-in sin roinpuizia khah a mu a.

⁴A dochama bukhêng an ido hei, a milianhei ranga omna in hei, a rêng-ina sinthotu risem dân hei, an rivo rikhî dân hei, ruaiṭhe muna ama ngâktu â somhei thlukthla hei, Tempila hâlrivâm thillan a lan tamzia hei a mun chu arngai arkhêl tak tak a.

⁵Rêng ziangah khan, “Ni sinthohei neh ni vârzia kin rama rithoka ki lei iriat khah a lei idik ngêt a nit hih.

⁶Ki hong a, ki hong mu maah khan chu an îsîr khah taksôn mang a; khanniseh, ni vârzia hih arzâtkah khom an îsîr ino kêng ai nit, an îsîr nêk khomin ai roinpui a nit.

⁷Ni nupuihei chu an vân nei vang na! Ne som, ni sinthotu zoro tina ni kôla om a, ni vârna thu ringaituhei khom hi an ham a ṭhat vang na!

⁸PUMAPA ni Pathian chu inpâkin om riseh. Ani chu ni chungah a lôm a, arthûla roirêltu, rêngin nang ai phun a nit. Ni Pathianin Israelhei hi lung ân kham a, an rêngin, idik takka an chunga roirêltu rangin nang ai phun a nit hih,” a ti a.

⁹Thilpêk a hong ichôi rângkachak her sângilika ranga tam, namhoi itamkah neh lungmantam itam takkah kha rêng Solomona ziangah a pêk tâk a. Seba rêngnun rêng Solomona zianga ai pêk angkana namhoi iṭha dang zel la om ngai mak.

¹⁰Rêng Hirama mihei neh rêng Solomona mihei khan Ofira rithokin rângkachak an hong pêl a, Junipar thing neh lungmantam khom an hong pêl sa a.

¹¹Junipar thing khah imangin Tempil chontan luina rikal neh a rêng-In luina rikal a siam a, perkhuang neh seranda siamna rangin a mang sa a. Judai ramah hingkana thing rêng rêng hih an lai mu ngai ino a nit.

¹²Rêng Solomona khan Seba rêngnu kha a îdit neh ai nî murdi chu a pêk a; khabanah thilpêk a hong ichôipêk inrithungna thilpêkhei khom ai pêk sa a nit. Khanchu, an ramah a champuihei neh an kîr nôk tâk a.

¹³Solomona khan kum tin rângkachak her sînginikah sângithumkah vêl a dong ngai a.

¹⁴Rivai mihei neh dukân inei mihein sia an ipêk banah Arabia rênghei neh Israelhei ram bial tin optuhei khan tangkarua neh rângkachak an hong ipêk ngai a nit.

¹⁵Solomona khan iphopui khah rângkachak suk inphêk rizanikah a siam a, ipho khatkah khan rângkachak her sarikah vêl an imang a nit.

¹⁶Ipho chîn khah rângkachak suk inphêk her thumka rika tuam rizathumkah a siam a. An rêngkan, “Lebanon Rampui In,” an iti chontanah khan ai sia a nit.

¹⁷Rêng khan rêngṭhungmun ilianpa artiakah saihaa tuam, a dang ritiakah rângkachak inthâra tuam a siam a.

¹⁸Rêng ṭhungmun luina rang rângkachak kalbi irukkah, chuangna rang sirbi neh a siam a. Ṭhungmun khan kiang ruaikan ibân a nei a, sakeibaknei rilim khom a kiang ruaikah khan an iding a,

¹⁹sakeibaknei rilim sômleiinikah kalbi sîrtiang chit seng sengah khan an inbok a, khangkana roinpui rêngṭhungmun khah tak rêngram khomah la om ngai mak.

²⁰Rêng Solomona kilâthei rêng rêng chu rângkachaka siam rong a nit a, “Lebanon Rampui In,” an iti chontana an bûrbêl murdi khom kha rângkachak ronga siam a nit. Solomona zoro lâiah khan chu tangkaruahei hi chu îte luan an ibe no a nit.

²¹Rikuang lôm a nei a, rêng Hirama rikuang lômhei neh khan an rithlop a, Tarsis-ah ifen kum ithumka danah hong ikîrin, rângkachak hei, tangkarua hei, saiha hei, izông hei, varho hei an hong pêl ngai a.

²²Rêng Solomona chu rammuala rêng dang dang nêkan archong ual a, ivâr khom ai var ual a nit.

²³Pathianin vârna ai pêk khah ireh rangin an hong pan ngai a.

²⁴Tangkarua neh rângkachaka siam thil hei, rêngpuan hei, râlthluk hei, namhoi hei, sakor hei, puak ipêl chi sakor hei, an hong pêk zut zut ngai a. Kum tin hingkana hong itho hih an irzom mai ngai a nit.

²⁵Rêng Solomona khan a sakor tâli neh a sakor siana chontan sângilika a nei a; sipaihei chuangna ngai sakor sînglei sânginikah ai nei a nit. A ṭhen chu Jerusalemah a sia a, a danghei chu khopui dang dangah a sia a.

²⁶Eufratis vadung neh Filistia ram kâr, Aigupta ramrî dên ram sunga rêng ilian tak a nit a.

²⁷Solomona inlal lâiin Jerusalem khuaah khan tangkarua khah lungchirit angkah dôra ringai a nit a, sidar khom Judai ram phâia theipui kung angkah dôra tam a nit.

²⁸Solomona khan Aigupta ram neh mun dang danga rithokin sakor a hong itol inlût ngai a.

²⁹Solomona thurchi dang chu a bula rithoka a mong idênin zânthla Nathana lekhabuah hei, Silo mi Ahija thusîr riziakna Bu-ah hei, Nebata naipa Israel rêng Jeroboama chungchânga zânthla Idoa inlârna riziakna bu-ah hei ai chuang a nit.

³⁰Solomona chu Jerusalemah Israel pumpui chungah kum sômilikah ân lal a,

³¹a thi a, Davida khopuiah an phûm a, a naipa Rehoboama chu arthûlin rêng a chang tâk a.