Read Biete EZRA 1 Bible Online

EZRA 1 - Biete bible

EZRA 1

¹Persia rêng Kura[1] inlal phut kumin Zânthla Jeremia manga PUMAPA lei îsîr tâk khah a tlung rikip theina rangin PUMAPA khan Kura lungril kha â chok thoi a, a ram pumpuiah riziakin thupêk hingka hin â sua a:

²“Persia rêng Kura khan hingka hin thu ai pêk a nit: Rammual pumpui chu PUMAPA, rivân Pathian khan a ne pêk tâk a; khante, Judai rama Jerusalemah khan a rang in isin pêk rangin thu a ne ipêk tâk a nit.

³Nangni, ama mi murdihei ziangah khan Pathian chu om riseh. Judai rama Jerusalem khuaah khan hang fe ta unla, PUMAPA Israelhei Pathian, Jerusalema chubai nin iûn ngai PUMAPA Tempil khah hang sin inṭha nôk rei.

⁴Tukhom ama mi an omna la châm, ikîrna ranga isan ringai kangân chu an bungtualbômhei khan hingkan ṭangpuina an pêk rang a nit. Tangkahei, rângkachakhei, ranhei banah Jerusalem khuaa Pathian Tempila tholôma peh rang thilhei an pêk rang a nit,” itin.

⁵Khanungchu, Juda neh Benjamin nam ruaituhei, thiampuhei, Levihei neh mi dang, Pathianin an lungril a ichok thoi murdihei kha Jerusalema PUMAPA in hang isin rangah khan an risiam tâk a.

⁶Khante, an bungtualbôm murdihei khan tangkaruaa siam bûrbêlhei, rângkachakhei, mangruahei, ranhei, thil ilu tak takhei an pêk a, khabanah khan Tempil sinna ranga an tholômhei khom an pêk sa a.

⁷Nebukadnezaran PUMAPA ina rithoka bûrbêl ai lâk murdi kha an pathian inah a sia a; khahei khah rêng Kura khan,

⁸rêng sum vongtu Mithredata kha ân lâk suak a, ân riziak tap a, Judai ram optu Sesbazara ziangah a lan a.

⁹Khante, a zon chu hingka hin a nit: Rângkachak rihûm sômithumkah, tangkarua rihûm sângkah, rihûm dang dang sôminika ikuakkah, rângkachak kilât sômithumkah, tangkarua kilât rizalika sômkah, bûrbêl dang sângkah a nit.

¹¹Rângkachak neh tangkarua bûrbêl murdi a rêngkan sângringaka rizalikah a nit. Sesbazara neh bôia tânghei khan khahei khah Babilon ata Jerusalemah an ichôi kîr nôk a nit.