Read Biete EZRA 10 Bible Online

EZRA 10 - Biete bible

EZRA 10

¹Khante, Ezra chu sual thupha chôi a, Pathian Tempil tuala boka iṭap puma a ṭongṭai lâiah khan Israel mi itam takka ipa, nupang neh naipanghei kha an hong ribûm a, anni khom natinsat takkan an ṭap tâk a.

²Khanungchu, Elama richi lâia mi Jehiela naipa Sekania khan Ezra ziangah, “Ei Pathian chungah khan thil chu ei thonsual ngêt tâk a, hi rama nam dang nupanghei kha nupuiin ei nei a; nikhomsela, Israel mihei ta rangin hi chungchâng thu-ah hin sabeina a lai om a nit.

³Atûnah hin nangmah neh mi dang Pathian thupêk izômtuhei roisak angkah takin hi nupanghei neh an naihei hi ûmisua rangin ei Pathian ziangah thu thlung ei ti u; Pathian dân ti lam angkah takin zôm ei ti.

⁴Hi thil itho rang hih nangma dâra ringat a nit, keini khomin nang kin ithlop a nit. Khasikin, ihâi takkan om inla, itho rua chu tho zel roh,” a ti a.

⁵Khanchu, Ezra khah a thoi a, thiampuhei, Levia chihei neh Israel ruaituhei khah Sekania thu ti lam angkana tho rangin ṭong ân rikhâm tâk a.

⁶Khanungchu, Tempil kot tual ata khah a thoi a, Eliasiba naipa Jehohanana chontanah a lût a, amakhan bôia tâng hong ikîr nôkhei siatna sikin zântluanin ngaiinsian bu khom ne loiin neh tui khom in loiin a om tâk a.

⁷Khante, nam ruaituhei khan Jerusalem neh Judai ram pumpuia om, bôia tâng hong ikîr nôkhei chu Jerusalema ribûm vang rangin thupêk an thon a.

⁸“Tukhom ruaituhei thupêk angkana sûn thumka sunga hong ino kangân chu a neinun murdi isut vang nîng a ta, ani khom Israel nam lâi ata ṭhângsena vôr nîng a ti,” an ti a.

⁹Khangkan sûn thumka sungah khan Jerusalemah an hong ribûm riai a; amakhah thla kuakna, sûn sôminika nî a nit. Juda neh Benjamina richihei rama om murdi kha Jerusalemah an hong a, Tempil tualzôlah khan mipuihei kha an iṭhung a. Rua a sûr inrik tak tak a, a rammual dâi sik neh an thu khah thu poimo a nit sikah khan mi tin an inthing an inthing a.

¹⁰Khante, Thiampu Ezra khah â ding a, an ziangah, “Thil nin thônsual tâk a, Israel mihei thiamnona inribôkin nam dang nupanghei nupuiin nin nei a.

¹¹Khasikin, PUMAPA, nin pi neh puhei Pathian ziangah khan thupha chôi unla, a lungdo sin rei; hi rama nam danghei neh an nupangheia rithokin rikiang rei,” a ti a.

¹²Khante, mipuihei khan an sâm a, iring takkan, “Kin chungchâng thu chu ni ti lam angkah takah khan tho ngêt kin ti.

¹³Khannisela, mipui itampa kin nit a, rua lak a sûr mai a, tolâiah hin iding mai thei no ning ung a, sûnkah sûn nika sunga hang itho infel zel chi ni mak a, hi siatnaah hin mi itam takkah a lei riphûm tâk kin nit a.

¹⁴Khasikin, mipui rithûlin kin ulianhei hi Jerusalemah la châm sela, hi thu hih infel riseh. Khanungchu, nam dang nupang nupuia neituhei kangân chu an kho ruaituhei neh roirêltuhei hong iṭhui san, an hong rang zoro khitin hong riseh. Khangkah khan Pathian ningthik natinsat tak chu rikiangin ai om rang a nit,” an ti a.

¹⁵Kha thu khah Asahela naipa Jonathana neh Tikva naipa Jahzeia hei bangin an sêl a; an sêlna khah Levia chi Mesulama neh Sabethaia hei khomin an thlop a.

¹⁶Bôia tâng hong ikîr nôkhei khan kha thu khah an ipom a. Khanchu, thiampu Ezra khan panam lupuihei lâia mi ṭhenkahei khah arthlang a, an riming chit arziak a. Khante, thla sômna, a sûn khatna nî-ah khan kha thu ngaitua khah an phut a,

¹⁷thla khatna, a sûn khatna nî tenan chu nam dang nupang nupuia neituhei thu khah an isui infel tâk a nit.

¹⁸Hihei hih nam dang nupuia neituhei chu an nit: Thiampuhei, an rui chita riziak a nit: Josua neh a urênghei ruia Jehozadaka naipahei: Maaseia, Eliezera, Jariba neh Gedalia.

¹⁹Anni khan an nupuihei iṭhen rangin ṭong an inkung a, an sual ribôlnan berachal an ilan a nit.

²⁰Imera ruia: Hanania neh Zebadia.

²¹Harima ruia: Maaseia, Elija, Semaia, Jehiela neh Uzia.

²²Pasura ruia: Elioenaia, Maaseia, Ismaela, Nathanela, Jozabada neh Elasa.

²³Levia chihei lâia nam dang nupuia neihei chu: Jozabada, Simeia, Kelaia (Kelita khom an ti ngai), Pethahia, Juda neh Eliezera hei an nit.

²⁴La saktuhei: Eliasiba; Tempil kotkhâr vêngtuhei: Saluma, Telema neh Uria.

²⁵Mi danghei: Parosa ruia: Ramia, Izia, Malkija, Mijamina, Eleazara, Malkija neh Benaia.

²⁶Elama ruia: Matania, Zakaria, Jehiela, Abdia, Jeremota neh Elija.

²⁷Zatu ruia: Elioenaia, Eliasiba, Matania, Jeremota, Zabada neh Aziza.

²⁸Bebaia ruia: Jehohanana, Hanania, Zabaia neh Atlaia.

²⁹Bani ruia: Mesulama, Maluka, Adaia, Jasuba, Seala neh Jeremota.

³⁰Pahat Moaba ruia: Adna, Kelala, Benaia, Maaseia, Matania, Bezalela, Binuia neh Manasea.

³¹Harima ruia: Eliezera, Isija, Malkija, Semaia, Simeona, Benjamina, Maluka neh Semaria.

³³Hasuma ruia: Matenaia, Matata, Zabada, Elifeleta, Jeremaia, Manasea neh Simeia.

³⁴Bani ruia: Madaia, Amrama, Uela, Benaia, Bedeia, Keluhia, Vania, Meremota, Eliasiba, Matania, Matenaia neh Jaasua.

³⁸Binuia ruia: Simeia, Selemia, Nathana, Adaia, Maknadebaia, Sasaia, Saraia, Azarela, Selemia, Semaria, Saluma, Amaria neh Josefa.

⁴³Neboa ruia: Jeiela, Matithia, Zabada, Zebina, Jadaia, Joela neh Benaia.

⁴⁴Hi mi murdihei hin nam dang nupang nupuiin an inei a nit. An nupuihei neh an naihei an imâk a nit.