Read Biete EZRA 3 Bible Online

EZRA 3 - Biete bible

EZRA 3

¹Thla sarika sungin Israel mihei chu anmani khua chitah an om fel tâk a; khanchu, mi murdi inrual takkan Jerusalem khuaah an ribûm khai a.

²Khanchu, Jozadaka naipa Jesua neh a thiampu champuihei neh Sealtiela naipa Zerubabela neh a urênghei kha an thoi a, Israelhei Pathian mâichâm, Pathian mi Mosia dân bua riziak angkan hâlrivâm thillan lanna rang an siam a.

³Kha rama mi lei iomhei khah bôia hong isuakhei khan an ṭi tak tak a; nikhomsela, mâichâm kha matona a mun ngirah khan an inding a; mâichâmah khan zîngah neh kholoiah PUMAPA rang hâlrivâm thillan kha an ilan nôk tâk a nit.

⁴Dângdi Kût an mang a, riziaka om angkan nîn tina tho rang tlia inkung kha rikip takkan nîn tin thillan kha an lan a.

⁵Nîn tina hâlrivâm thillanhei an ilan banah, thla thar thillan hei, PUMAPA riminga inkhômpui an nei zoroa an thillan ngaihei; khante, mahni lungsuaka thillan PUMAPA zianga ilôm takka an ilan ngaihei khah an lan nôk tâk a.

⁶PUMAPA Tempil lungphûm la phûm no khom sela, thla sarina, a sûn khatnî ata hâlrivâm thillanhei kha PUMAPA ziangah ilan an iphut tâk a nit.

⁷Mipuihei khan tholôm an tho a, lungsuktuhei neh kutithiamhei kha thalo pen sin an intho a; khabanah, Lebanona rithoka sidar thing neh kâirithlenga Sidon neh Tura kho mihei ithon rangin ifaruahei, iinruahei neh oliv riakhei kha an pêk a. Kha sidar thing khah Joppa dêna tuikhangliana zuang itol rang a nit. Khahei murdi khah Persia rêng Kura phalna koronga sin a nit.

⁸Jerusalem khuaa PUMAPA Tempil omna an tlung a kum inikna, thla niknaah khan Sealtiela naipa Zerubabela hei, Jozadaka naipa Jesua hei neh an suapui dang thiampuhei, Levia chihei, neh bôia rithoka Jerusalema hong ikîr nôk murdihei khan sin an iphut tâk a nit. Levia chihei chu kum sôminika ta chungtianga mihei chu PUMAPA in sinna ruaitu rangin an phun a.

⁹Levia chi Jesua chu a naipahei neh a suapuihei neh, Kadmiela neh a naipahei (Hodavia richihei an nit) khan Tempil sinna mophurna kha an lâk a. Anni kha Levia richi Henadada neh a naipahei banah an suapuihei khom khan an ṭangpui a.

¹⁰Khante, PUMAPA Tempil lungphûm an phûm rang nî-ah khan, thiampuhei khan an thiampu zakua an ihâk a, bekul ichôiin an mun chitah an iding a, Israel rêng Davida hun lâia tho dân inkung angkan Asafa richi Levihei khom kha PUMAPA inpâk rangin têngrep ichôiin an iding a.

¹¹PUMAPA chu an inpâk a, lômthu an ril a, lâ sakin an ridon risak a, “PUMAPA chu a ṭhat a, a lungkhamlianna chu Israelhei chungah ai om kumtluang a nit,” an ti a. PUMAPA in lungphûm an phûm tâk sikin PUMAPA inpâkin mipui murdi chu an ikhêk dur dur a.

¹²Thiampuhei, Levihei neh panam lupuihei itam takkah, Tempil masa mutu itarhei khan chu Tempil lungphûm an iphûm kha an mun an ṭap ngûi ngûi a. Nikhomsela, mi danghei chu an lôm sikin an îkhêk dur dur a nit.

¹³Lôm sika mipui khêk rihu neh ṭap irî kha tutên ithlei ual mak a, mipuihei kha iring tak takkan an ikhêk a, an rihu chu ilah taka rithok khomin ireh thei a nit.