Read Biete EZRA 4 Bible Online

EZRA 4 - Biete bible

EZRA 4

¹Juda neh Benjamina richi doituhei khan bôia tâng ata zôkhein PUMAPA, Israelhei Pathian Tempil an sin iti an riat a.

²Khanchu, Zerubabela neh panam lupuihei rimupui rangin an fe a, an ziangah, “Tempil hi nangni sinpui kin ti, nin ibiak ngai Pathian ngir hi keini khom kin ibiak a nit. Asuria rêng Esarhadonan hi muna om ranga a ne tir nung vângah hin chu a ziangah korong kin irbôl mai ngai a nit,” an ti a.

³Nikhomsela, Zerubabela, Jesua neh Israel panam lupuihei khan an ziangah, “PUMAPA, kin Pathian rang Tempil sinnaah hin nangmani ne san nang mang ung e. Persia rêng Kura thu ne pêk lam angkan keimani khât ringotin sin kin ti,” an ti a.

⁴Khanungchu, kha rama mi lei iomhei khan Judahei kha zâmzal an sak a, an in sin kha an inbuai a.

⁵An thiltum ikhap pêk rangin Persia rama milianhei kha an iphung a. Persia rêng Kura inlal lâi sung murdi neh Persia rêng Daria inlal idênin khangkah khan Israelhei chungah an itho a nit.

⁶Ahasuera a hong inlal tenan vâng chu an irâl, Judai ram neh Jerusalema omhei khan an nôna lekha riziakin an pêk a.

⁷Khanung, Artazerzia kha Persia rama Babilon rêng a hong changah khan Bislama hei, Mithredata hei, Tabeela hei neh an rual danghei khan Persia rêng ziangah riziakin an nô nôk a. Kha lekha khah Aramaik ṭongin, Aramaik horopa riziak a nit.

⁸Ram optu Rehuma neh kha rama ziaktu Simsaia khan Jerusalema mihei nôna lekha hingka hin Persia rêng Artazerzia kha an thon sa a.

⁹Lekha thontuhei: Ram optu Rehuma neh Lekha ziaktu Simsaia neh an sinthopui roirêltuhei neh milian danghei, Persia ram Elam biala om Erek mihei, Babilon mihei neh Sosan mihei neh,

¹⁰Asurbanipala, mi roinpui neh inthangan an in neh loia rithoka ai ṭhui a, Samaria khua neh Eufratis vadung thlang tianga a în-om tâkhei an nit.

¹¹Rêng Artazerzia chu hingkan lekha an thon a, “Rêng inthang Artazerzia chu ni bôi, Eufratis vadung thlang tiang ram mihein chibai nang kin bûk.

¹²Juda mi, ni ram mun dang danga rithoka hong ikîr, Jerusalema om tâkhei khan khopui isual tak neh rihel ngai kha inding ṭhat nôk an tum a, a kulpuihei kha an siam phut tâk a, sôtnote sungin zoi zel an ti iti nî riat kin inuam a nit.

¹³Hi khua hih an inding a, a kulpuihei an siam zoiin chu sia chôi nuam khâi no ni a, thil dang neh rinêng manhei khom chôi nuam khâi no nih, nakanah chu rêng sum rang rikâina hong nîng a ti iti rêngin lei reh riseh.

¹⁴Rêng ina ichi liak kin nit sikin rêng rang thil ṭhano hong itlung rang hi kin inuam ino a nit.

¹⁵Khasikin, ni pi neh puhei thil richik riziakna bu khah inzong suak inla, kha thu riziakna bu-ah khan mûng ni ti; hi khopui hih rihel ngai khua a nit a, tianlâia rithokin rênghei neh ram optuhei ta rang khoma iop intak tak buaina lei isiam ngai an nit a, khasikah khan hi khua hih an lei îsiat a nit.

¹⁶Hi khopui hih an inding nôk a, a kulbanghei an siam zoi riai tenan chu Eufratis vadung thlang tiang ram rêng rêngah hin chu thuneina îte nei khâi no tin iti rêng kin inriat a nit,” an ti a.

¹⁷Khante, rêng khan sâmna a thon a: “Ram optu Rehuma, Lekhaziaktu Simsaia neh an rual dang Samaria ram neh Eufratis vadung thlang tianga omhei murdi chibai.

¹⁸“Ki zianga nin lekha hong thon kha ki makungah ifel takkan an tep a.

¹⁹Khante, thurchi riziaknahei kha isui rangin thu ki pêk a; kha angkan tianlâia rithokin Jerusalem khua chu an rênghei chungah an rihel ngai a, khopui sungah khan rihel inuam neh buaina siam nuam an sip khap iti khah kin imu suak a nit.

²⁰Rêng inthang tak takhei khan Eufratis vadung thlang tiang ramheiah khan roi an rêl a; siahei neh rinêng manhei an ilâk ngai a nit.

²¹Khasikin, kha mihei khah inringam unla, thu ki pêk mâkah chu khua inding no riseh.

²²Rivuak tlak no rei, rêng ranga siatna thil inkhôk tak kha a tlung nona rangin,” a ti a.

²³Khanchu, rêng Artazerzia lekha kha Rehuma neh Simsaia neh an rualhei makungah an tep zoi kaneh chu rimot takkan Jerusalema Judahei ziangah an fe a, khopui isiam khah zâlrâtin an inringam tâk a.

²⁴Persia rêng Daria inlal kum inikna dênin Tempil isin kha an irngam a nit.