Read Biete EZRA 5 Bible Online

EZRA 5 - Biete bible

EZRA 5

¹Kha lâiah khan zânthla inika Hagaia neh Idova naipa Zakaria hei khan Israelhei Pathian rimingin Jerusalem neh Judai rama om Judahei ziangah thu an isîr a.

²Khante, Sealtiela naipa Zerubabela neh Jozadaka naipa Jesua khan an thuril kha an riatin chu Jerusalema Tempil kha an sin phut nôk tâk a; zânthla inikahei khan an san a.

³Sin an hong phut kaneh khan Eufratis vadung thlang tiang ram optu Tatenaia hei, Sethar Bozenaia neh an sinthopuihei kha Jerusalemah an hong zel a, an ziangah khan, “Hi Tempil isin rang neh hi kulpui isin zoi rangah hin tûm thu nangni peh chei u?” an ti a.

⁴Khabanah, Tempil isintuhei murdi riming khom kha an ridon sa a.

⁵Nikhomsela, Juda ruaituhei kha Pathianin a vêng mai a, ram optuhei khan rêng Daria zianga lekha thona, a sâmna an mu mâka chu îte tho tum ual mak a.

⁶Rêng ziangah khan hingka hin thu an riziak a:

⁷“Rêng Daria khan thlangam takkan roirêl mai riseh.

⁸“Amahih rêng inthangin lei reh sela kin iti a nit. Judai ramah kin fe a, Pathian roinpui tak Tempil kha lung tum ilian tak tak imangin an siam a, thingthluan iṭha tak tak bang chungah iliangin an intâl a, sin khom takritâi tak neh itluang takkan an lei sin mai kin mu a.

⁹“Khanchu, hi in isin rang neh hi kulpui isiam zoi ranga hin tûm thu nangni pe? itin an ulianhei kin ridon a.

¹⁰An ruaituhei riming kha ifel takka kin riat theina rangin an riminghei khom kha kin ridon a, kin riziak a.

¹¹“Khante, anni khan hingka hin an ne sâm a, ‘Rinêng neh rivân Pathian isom kin nit a, Israel rêng roinpui tak khatkan a lei isin zoi tâk khaten kum sunga a lei ivo diam tâk kha kin isin inṭhat nôk a nit.

¹²Khannisela, kin pi neh puhein rivân Pathian ning an inthik sikin, Kaldai mi, Babilon rêng Nebukadnezara kutah a pêk a, ani khan hi in hih â siat a, a mihei kha Babilon tiang suakin ai ṭhui a nit.

¹³Nikhomsela, Babilon rêng Kura inlal phut kumin rêng Kura khan hi Tempil hih sin inṭha nôk rang thu a pêk a.

¹⁴Jerusalem Tempila rithoka Nebukadnezaran ai lâk suak, Babilona pathian ina ai sia tâk rângkachak neh tangkarua bûrbêl kha rêng Kura khan Babilona Tempil ata a lâk suak a, mi khatkah arming Sesbazara, ram optu ranga ai siama kutah khan a pêk a.

¹⁵Khante, a ziangah hi bûrbêl hih lan la, fen la, Jerusalema Tempilah seh roh; Tempil chu a mun ngirah isin ni riseh, a ti a.

¹⁶Khanchu, Sesbazara ngêi kha a hong a, Tempil lungphûm khah a phûm a; khantak ata khah atûn ten idênin isin ai nit mai tâk a nit a; nikhomsela, Tempil hi la zoi ai nit ino a nit,’ an ti a.

¹⁷“Khasikah khan rêng ṭhat ti lam a nitin chu rêng thurchi riziakna lekhabua Tempil isin nôk rangah hin rêng Kuran thupêk a lei siam neh siam no ien ni sela; khanungchu, rêng khan hi thu chungchângah hin ṭha a ti lam kha ne hong iril nôk riseh,” itin.