Read Biete EZRA 6 Bible Online

EZRA 6 - Biete bible

EZRA 6

¹Khanchu rêng Daria khan thu a pêk a, Babilona an rêng thil ilui sia khômna, lekhabu siana in kha ân zong tâk a.

²Khannisela, Media biala Akbatan khuaah khan lekhabu rizuat khah an mu a, hingka hin riziak inchuang a om a;

³“Jerusalem Tempil chungchângah rêng Kura khan ân lal kum khatnaah khan hingka hin thu a pêk a; ribôlna neh hâlrivâm thillanhei lanna ngai mun ngêiah khan Tempil chu isin ni riseh.

⁴Arsâng dân mûk sômirukkah, arzat dân mûk sômirukkah a nit rang a nit. A bang chu lungtum ilian tak tak thua thumka inrichuan nungin thingphêk thuaka zol rang a nit. A sinna hi rêng suma rithoka peh rang a nit.

⁵Jerusalem Tempila rithoka rângkachak neh tangkarua bûrbêl Nebukadnezaran Babilona a zuang ichôihei khom ipeh kîr ni sela, Jerusalema Tempilah a mun thap thapa iseh nôk ni riseh,” itin.

⁶Khanungchu, rêng Daria khan hingka hin sâmna a thon a; “Eufratis vadung râl thlang tianga ram optu Tatenaia neh Sethar Bozenaia neh vadung râl thlang tiang rama om murdihei: “Tempil ata kha rikiang rei,

⁷hi Tempil an sin nôknaah khan inrol no rei. Judai ram optu neh Juda ulianhei khan Pathian Tempil kha matona a mun ngirah khan sin riseh.

⁸Kha in sin nôkna ṭangpui rangin thu nangni kî pêk a nit. Sin a châi nona rangin a sinna rang khom Eufratis vadung thlang tiang ram bunga rithoka sia an hong ipêk rêng suma rithokin ipeh zel rang a nit.

⁹Khante rivân Pathian rang hâlrivâm thillan rang an inang murdi, serât chaltuaihei, bera chalhei, bera chaltuaihei, ibaidihei, ichihei, uainhei, riakhei kha Jerusalema Thiampuhei thu angkah takin nîn tin nin pêk ngêt rang a nit.

¹⁰Khangkan rivân Pathian lômlam ribôlnahei lan thei an ta; khanchu, rêng neh a naipahei hi kin dam sôtna rangin ne ṭongṭai pêk thei an ti.

¹¹Tukhom hi thupêk indanglam kangân chu a insun ridoka, a kiangtiang môr rizum a, ani khah amakhan isun that a, a in chu nimnok buka siampêk rang a nit iti thu kî pêk sa a nit.

¹²Hi thupêk zôm nuam loia Tempil isia tum namhei neh rênghei chu, amah chubai ûnna mun ranga Jerusalem rithlangtu Pathian khan khâi inrimang riai riseh. Keimah Daria hin hi thupêk hih kî pêk a nit; zôm rikip thlap rang a nit,” itin.

¹³Khanungchu, ram optu Tetanaia neh Sethar Bozenaia neh an sinpuihei khan rêng Daria lekhathon angkah thlapin thil tinrêng an tho zel tâk a.

¹⁴Khante, zânthla Hagaia neh Zakaria thusîr khan â thor mai sikin Juda ulianhei khan itluang takkan Tempil isin khah ma an fôn mai a. Israelhei Pathian thupêk angkan neh Persia rêng Kura neh Daria neh Artazerzia hei thupêk angkah khan an sin a, Tempil khah an zoi tâk a.

¹⁵Khanchu, Tempil chu rêng Daria inlal kum irukna kum, Adar thla, a sûn thumnî-ah khan an izoi infel vang tâk a nit.

¹⁶Israela richi, Thiampuhei, Levihei neh bôi ata hong ikîr danghei khan kha Tempil lanna khah ilôm takkan an mang a.

¹⁷Khante, kha Tempil lannaah khan serâtchal rizakah, berachal rizanikah, berate rizalikah an lan a; sual ribôlnan Israel nam lukipin kêlchal sômleiinikah an lan sa a.

¹⁸Mosia lekhabua chuang angkan Jerusalema Tempila sinitho rangah khan thiampuhei neh Levihei kha a pôl pôla siamin an sin rang an sem infel pêk tâk a.

¹⁹Khante, bôi ata hong ikîr nôkhei khan a kum nôk thla khatna, a sûn sômleiilinî-ah khan Kalkan Kût an mang a.

²⁰Thiampuhei neh Levihei kha an rithâra an rêngka khan an hong rithiang tâk a. Khanchu, Levihei khan bôi ata hong ikîr nôkhei murdi rang neh thiampuhei rang neh anmani rang Kalkan Kût beratehei khah an that a.

²¹Khante, Israel mihei bôi ata hong ikîr nôkhei murdi neh kha rama nam dang sanong lampui imah phara PUMAPA, Israelhei Pathian chubai iûn ranga honghei murdi khan an fâk a.

²²Bairiam Kût kha ilôm takkan sûn sarika sung an mang a. PUMAPA khan anni khah ân lom a; Asuria rêng ditsakna khom ân dong a, Israelhei Pathian Tempil sinna khomah ai ṭangpui a nit.