Read Biete EZRA 7 Bible Online

EZRA 7 - Biete bible

EZRA 7

¹Kha thilhei rizoi kum itam takka nungah Persia rêng Artazerzia inlal lâiin mi khatkah arming Ezra a om a. Ani khah a chibul chu Thiampu laltak Arona a nit. Ezra kha Seraia nai a nit a, ani kha Azaria nai a nit a, ani kha Hilkia nai a nit a,

²ani kha Saluma nai a nit a, ani kha Zadoka nai a nit a, ani kha Ahituba nai a nit a,

³ani kha Amaria nai a nit a, ani kha Azaria nai a nit a, ani kha Meraiota nai a nit a,

⁴ani kha Zerahia nai a nit a, ani kha Uzia nai a nit a, ani kha Bukia nai a nit a,

⁵ani kha Abisua nai a nit a, ani kha Finehasa nai a nit a, ani kha Eleazara nai a nit a, ani kha Thiampu laltak Arona nai a nit.

⁶Ezra kha lekhaziaktu, PUMAPA, Israelhei Pathian ipêk Mosia dân ithiam tak a nit a. PUMAPA Pathianin a ditsakna sikin ai ngên murdi rêng khan a pêk a.

⁷Khante, rêng Artazerzia inlal kum sarina kumah khan Israel richi, thiampuhei, Levihei, Lâ saktuhei, Tempil kotkhâr vêngtuhei, Tempil sinthotuhei neh khan Babilon ata Jerusalemah an hang fe a.

⁸Khante, rêng inlal kum sarina kum, a thla khatna, a sûn khat nî-ah khan Babilona rithokin an suak a, Pathian ṭangpuina zârin a thla ringana, a sûn khat nî-ah khan Jerusalem an itlung a nit.

¹⁰Ezra khan PUMAPA dân khah a dam sunga risei rangin arpêk a, izôm mai rang neh Israelhei kha dânhei neh roirêlnahei inrisei rangin a lungril a siam ngit a.

¹¹Rêng Artazerzia khan Ezra thiampu neh lekhaziaktu, PUMAPAN Israel mihei ranga dân neh thupêk ai pêk irianchialtu ziangah khan hingka hin lekhathon riziak a pêk a.

¹²“Rêng inthangtak Artazerzia hin thiampu Ezra, rivân Pathian dân irianchialtu ziangah:

¹³“Ki ramsunga Israel mi, thiampuhei neh Levia chihei neh â nuam murdihei chu Jerusalem khuaah an fe kî phal a nit.

¹⁴Keimah neh ki roisakpuitu sarikahei khan Jerusalem neh Judai rama thil om dân hang en infel rangin nang kin itir a nit, Pathian dân ni kuta inkola om kha an zôm inṭhat im en infel roh.

¹⁵Jerusalem Tempila om, Israelhei Pathian ipeh ranga mahni lungsuaka keimah neh ki roirêltuhein kin ipêk rângkachak neh tangkarua khah ni chôi rang a nit.

¹⁶Khabanah, Babilon biala tangkarua neh rângkachak ni irfuang murdi neh Israel mipuihei neh thiampuhein mahni lungsuaka, Jerusalema an Pathian Tempil ranga ilôm takka an ipêkhei kha ni chôi sa rang a nit.

¹⁷“Khante, hi sum hih ridîn takkan ni mang rang a nit a, sechalhei, berachalhei, berate hei, ibaihei neh uainhei kha richông ni ta, amakhah Jerusalem Tempila mâichâmah khan ni lan rang a nit.

¹⁸Tangkarua neh rângkachak mang bânhei chu nin Pathian lungdo lamin nangmah neh ni suapuihein ṭha nin ti lam angkah takin mang rei.

¹⁹Pathian ina mang rang bûrbêl ni zianga kî pêk murdi kha Jerusalemah Pathian ziangah khan ni lan rang a nit.

²⁰Tempil ranga nî nang a om ngânin chu rêng sum ina rithokin mang thei ni ti.

²¹“Keimah, rêng Artazerzia ngêiin thu nangni kî pêk a nit: Eufratis vadung râl thlang biala sum enkoltu murdihei khan thiampu Ezra, rivân Pathian dân irianchialtu hin nangni ai nî kangân chu,

²²tangkarua her sângithumka rizalika tenah, ibaidi her sîngka tenah, uain litar sânginika tenah, oliv riak litar sânginika tenah neh ichi chu a nang dôrkah nin pêk zel rang a nit.

²³Rivân Pathianin a Tempil ranga ai nang kangân chu itho ngêt rang a nit; keima chunga manih, ke nunga la hong inlal ranghei chunga manih a ningthikna om tlak no riseh.

²⁴Thiampuhei, Levihei, Lâ saktuhei, Tempil kotkhâr vêngtuhei, Tempil sinthotuhei rêng rêng ziangah chu sia nin dôl rang ni mak.

²⁵“Khante nangmah Ezra, ni Pathianin vârna nang ai pêk imangin Eufratis vadung râl thlang tianga om, nin Pathian dân izôm nuamhei rangin roirêltuhei phun inla, anmani optu rang mi ni phun rang a nit. Nin Pathian dân khah a la rianohei murdi nen risei rang a nit.

²⁶Mi tukhom nin Pathian dân zôm nuam inotu manih, ram dân zôm nuam inotu manih kangân chu ithatin manih, ramsung ata ûmisuan manih, an neinun ilah pêkin manih, tâng ina khumin manih a chungah roirêlna ithlun zel rang a nit,” a ti a.

²⁷Ezra khan, “PUMAPA kin pi neh puhei Pathian chu inpâkin om riseh. Jerusalema PUMAPA Tempil en ihoi takka siam rangin rêng kha riphalna lungril ân riput tâk a.

²⁸Rêng neh a roisakpuituhei kha ki chungah lungkhamna ân nei a, ruaitu lian danghei khomin an ne ditsak a; PUMAPA, ki Pathianin lung a nen kham a, ihâina a ne pêk a, khasikah khan ki zianga fe sa rangin Israel lâia mi ruaitu ual ualhei kha kî bûm thei tâk a nit,” a ti a.