Read Biete EZRA 8 Bible Online

EZRA 8 - Biete bible

EZRA 8

¹Hihei hi Israel nam, Babilon suaka tâng, rêng Artazerzia inlal lâia Ezra lôma Jerusalema kîr nôkhei chu a nit.

²Finehasa richihei lâia mi Gersoma; Ithamara richi lâia mi Daniela. Davida richihei lâia mi Sekania naipa Hatusa. Parosa richihei lâia mi Zakaria neh ipa rizalei sômringakahei (an richi riziakna bu a om). Pahat Moaba richihei lâia mi Zerahia naipa Eliehoenaia neh ipa rizanikahei. Zatua richihei lâia mi Jahaziela naipa Sekania neh ipa rizathumkahei. Adina richihei lâia mi Jonathana naipa Ebeda neh ipa sômringakahei. Elama richihei lâia mi Athalia naipa Jesaia neh ipa sômsarikahei. Sefatia richihei lâia mi Mikaela naipa Zebadia neh ipa sômiriatkahei. Joaba richihei lâia mi Jehiela naipa Obadia neh ipa rizanika sômleiiriatkahei. Bania richihei lâia mi Josifia naipa Selomita neh ipa rizalei sômirukkahei. Bebaia richihei lâia mi Bebaia naipa Zakaria neh ipa sôminika iriatkahei. Azgada richihei lâia mi Hakatana naipa Johanana neh ipa rizalei sômkahei. Adonikama richihei lâia mi Elifeleta, Jeuela, Semaia hei neh ipa sômirukkahei(...)

¹⁵Ahava khuaa luanglût tuikong rikamah khan bôia tâng hong isuakhei kha an rêngkan ki bûm a, amakhan sûn thumkah kin châm a. Khahei lâiah khan thiampuhei kha chu an om a; nikhomsela Levia chihei rêng rêng chu omak e.

¹⁶Khanchu, an ruaitu ual ual mi ikuakkah: Eliezera, Ariela, Semaia, Elnathana, Jariba, Elnathana, Nathana, Zakaria, Mesulama hei khah ki koi a, minriseituhei inikah Joiariba neh Elnathana hei khom ki koi a.

¹⁷Kasifia muna an ruaitu liantak Idova neh a sinpuihei Tempil sinthotuhei ziangah Pathian sinitho rang, Tempila sinitho rang ne zuk itir pêk rangin kha mihei khah ki tir a.

¹⁸Pathianin lung a nen kham sikin Levia richi Mahlia richihei lâia mi fel tak Serebia neh a naipahei neh a urênghei mi sômleiiriatkah an ne zuk tir pêk a.

¹⁹Meraria richihei lâia mi Hasabia neh Jesaia khom an suapuihei mi sôminikah an ne zuk tir pêk sa a.

²⁰Khabanah khan Davida neh a milianhein Levihei rithloppui ngai ranga an chibulhei an lei inkunghei lâia Tempil sinthotuhei mi rizanika sôminikah an zuang ṭhui sa a. An rêngka riming riziak chit a nit.

²¹Ahava khua tuikong rikamah khan kin rêngka bu ngei rang thu ken puang a; kin Pathian maah ringaiinchîn a, lampuiah ne ruaia, kin naihei neh kin neinun murdi ne vênginzôk rangin kin ṭongṭai a.

²²“Kin Pathian ditsakna chu ama zongtuhei murdi chungah an ṭhatna rangin a om mai a; amah nungisongtuhei chungah lôm ngai mak a, kuttum a tho ngai,” iti rêng ziangah kin lei isîr tâk sikin lampuia kin irâlhei ata ne rung ranga sipai neh sakor chungchuang mihei rêng zianga inih rang khah ke zak tâk a.

²³Khanchu, bu kin ngei a, ne vêng inzôk rangin Pathian ziangah kin ngên a; khangkan kin ngênna khah a ne sâm tâk a.

²⁴Thiampuhei lâia ruaitu ual ual Serabia, Hasabia neh mi dang sômkah ker thlang suak a.

²⁵Khanungchu, rêng neh roirêltuhei, a milianhei neh Israel mipuihein Tempila mang ranga an thillan rângkachakhei, tangkaruahei, bûrbêlhei kha ki var a, thiampuhei kutah ki lan a.

²⁶An kuta ki lan kha hingka hin a nit: Tangkarua kha her sîng inika sânginikah neh rizakah, Tangkarua bûrbêl rizakah, her sômsarika rik, Rângkachak her sângithumka rizalikah, Rângkachak rihûm sôminikah, her iriatka neh gram rizalika rik, Sum-eng rihûm inikah, rângkachak rihûm angkana lu a nit.

²⁸An ziangah, “PUMAPA nin pi neh puhei Pathian ta ranga serinrithiang nin nit, hi bûrbêlhei khom hi bûrbêl rithiang an nit; hi thiltlongpêk tangkarua neh rângkachak bûrbêlhei hi PUMAPA nin Pathian ta rang a nit.

²⁹Tempil nin tlung mâkah iṭha takkan nin enkol rang a nit. Jerusalem Tempila thiampuhei chontanah khan var nin ta; khanchu, thiampuhei neh Levihei lâia ruaituhei neh Israel nam ruaituhei kutah khan nin lan rang a nit,” ki ti a.

³⁰Khanchu, thiampuhei neh Levihei khan Jerusalema Tempila chôi rangin tangkarua neh rângkachak neh bûrbêlhei kha an lâk tâk a.

³¹Khangkan, Jerusalema fe rangin thla khatna, sûn sômleiinikna nî-ah khan Ahava khua tuikonga rithokah khan kin suak tâk a. Kin Pathianin a ne ompui mai a, irâlhei lampuia ruang ne chuantuhei kut ata a nen zôk mai a.

³²Jerusalem kha kin hang tlung a, khan sûn thumkah kin ringam a.

³³Khanchu, a sûnli nî-ah khan chu tangkaruahei, rângkachakhei, bûrbêlhei kin ichôi kha kin var suak a, Uria naipa thiampu Meremota kutah kin lan a. Khante, a ziangah khan Finehasa naipa Eleazara a om a, khabanah, Levia chi mi inikah Jesua naipa Jozabada neh Binuia naipa Noadia khom an om sa a.

³⁴Thilhei kha itep riai neh ivar riai a nit a, a nit lam tak kha riziak inchuang zel a nit.

³⁵Bôia tâng hong ikîr nôkhei khan Israelhei Pathian ziangah hâlrivâm thillan an lan a. Israel nam riming ikipin serâtchal sômleiinikah, berachal sômikuakka irukkah neh berate sômsarika sarikah an lan a; khabanah khan sual ribôlnan kêlchal sômleiinikah an lan sa a. Kha sahei murdi khah PUMAPA rangin hâlrivâm riai a nit.

³⁶Rêngin lekha a închôi khom kha Eufratis vadung râl thlang tiang ram optu neh milian danghei ziangah khan an pêk a; khanchu, anni khan Tempil sinna neh Pathian biaknaah mipuihei an ṭangpui mai tâk a.