Read Biete EZRA 9 Bible Online

EZRA 9 - Biete bible

EZRA 9

¹Kha thilhei murdi kin tho zoiah khan, Israel ruaitu ṭhenkahei an hong a, “Israel mihei hin, thiampuhei neh Levia chihei khomin an kôlvêl nam Amon hei, Moab hei, Aigupta mihei, Kanan mihei, Hit mihei, Periz mihei, Jebus mihei, Amor mihei ata hih rikiang ual loiin thil porinche an tho lam angkan an tho sa a.

²Anmani neh an naihei khomin nam dang an nei a; khangkan richi rithiang kha an innim tâk a, nam ruaituhei neh milianhei kha tho masa a lu hêm ual an nit,” itin an ne ril a.

³Khante, kha thil khah ki riatin chu ki silbomhei ke potthlêr a, ki sam neh ker khamul ki voi inkol a, ngaiinsian ke ṭhung ṭian tâk a.

⁴Amakhan kholoi hâlrivâm thillan zoro dênin ngaiinsia takkan ke ṭhung a; khante, bôia tâng hong ikîr nôkhei siatna sika Israelhei Pathian ṭongbâi suak iṭia rilônthinghei murdi kha ki ziangah an hong ribûm tâk a.

⁵Kholoi tiang hâlrivâm thillan an lan lâiah khan bu ngeia ke ṭhungna ata khah ki thoi a, ki zakua ṭethei khah ihâk mai pumin rikhûk idilin ki ṭongṭai a, PUMAPA ki Pathian tiang ke bân ki phar a.

⁶A ziangah, “O ki Pathian, ni tiang mâi ingat hi ki îzak a nit, kin siatnahei chu nê chîm rikhum rakkan a pung a, rivân ai sun dap a nit.

⁷Kin pi neh puheia rithokin atûn ten idênin keini ni mihei hin natinsat takkan kin îsual a nit. Kin siatna sikin keini neh kin rênghei neh kin thiampuhei chu ram dang rêng kutah imanin kin om a, ithatin kin om a, irokin neh suaka tângin kin om a, vuani tenah hin kin lai mualinphoi mai a nit.

⁸Atûn zoro sôt inote sungah hin O PUMAPA, kin Pathian, ni lungkhamna kin chungah a om a, bôi ata ni ne sua a, mun rithiangah hin ningbeiin ni nen om a. A nit, bôi ata ni nen zalen a, ringna thar ni ne ipêk tâk a nit.

⁹Bôi kin nit a; nikhomsela, bôia kin itângnaah khan ne marak mak che a. Persia rêng lungkham ni nen dong a, ni Tempil isin rangin ni nen rât a, â seh tâk siam iṭha nôk rangin a ne phal a, Judai ram neh Jerusalemah hin izôkriamkan ni nen om tâk a.

¹⁰“Nikhomsela, atûnah hin, O kin Pathian, im kin ti rang tâk? Ni thupêkhei nung kin song tâk a,

¹¹Ni suak zânthlahei imanga, ‘Nin va fena rang, nin ram lua rang kha a rama mi omhei siatna sikin â nim a, an porinchena khan kil tin kil tang porinchenan ai sip a nit.

¹²Khasikin, hi mihei neh hin nin rinei pol tlak rang ni mak a, nin naihei khom nupui pasalin an rinei rang ni mak; nin risôn inhoi rang ni mak a, an ningbeina rang manih, an vângsak inṭumna manih rêng rêng nin tho tlak rang ni mak e. Khanchu, kha rama thil iṭha khah fâng nin ta, hong rât nin ta, kumkhuaka ranga nin richi suanpârhei ta ranga dongtum nin imâk pêk thei rang a nit,’ itin thuhei ni ne pêk a.

¹³Kin siatna neh pualoina natinsat tak sika kin chungah hingkana thil a hong tlung nung khomin nangmah, kin Pathianin kin siatnahei phû lam angkah takin kuttum ne tho mak che a, izuan kin lai om a nit iti kin iriat a nit.

¹⁴Kha sik takah khan ingkan im ni thupêkhei kha iseh nôkin hi thil porinche thotuhei neh hin kin la irnei pol nôk ngân rang a? Khangkan kin tho nôkin chu ni ningthikna natinsat takin nen rimang vang ni ta, tute ne zua khâi no tin e.

¹⁵O PUMAPA, Israelhei Pathian, nang chu ni fel a; vuani tenah hin ni ne la zua a. Ringai ta, kin siatnahei chu ni ziangah kin înpuang a nit; ni makunga ngîr inrup khom ni khâi mang ung e,” ki ti a.