Read Biete NEHEMIA 1 Bible Online

NEHEMIA 1 - Biete bible

NEHEMIA 1

¹Amahih Hekalia naipa Nehemia thiltho thurchi riziakna bu a nit. Rêng Artazerzia khah Persia ân lal kum sôminikna, Kislev thla[1] a khan keimah, Nehemia chu rêng khopui Sosaah khan ki om a.

²Kha lâi zoroah khan ki suapuipa Hanaia neh Judai ram ata mi ṭhenkahei an hong a; khante, Judahei Babilon bôia tâng hong isuak a la damhei thurchi neh Jerusalem thurchi kha ker don a.

³Anni khan ki ziangah, “Bôia tâng hong izôk a, Judai rama idama hong ikîr nôka omhei chu chan iseh tak neh sîrinsian an om a. Jerusalem kulpui khom a chim rem rum tâk a, a kotkhârhei khom a kâng siat riai tâk a,” an ti a.

⁴Kha thu khah ki riatin chu ke ṭhung rak a, ki ṭap a, sûn izâka manih chu ngaiinsian fâk nêk zong loiin ki om a. Rivân Pathian ziangah ki ṭongṭai a,

⁵“O PUMAPA, rivân Pathian, Pathian roinpui neh inrît, nangmah lungithlunga ni thupêk izômtuhei chunga thuthlung ilena lungkhamna inlang ngaitu;

⁶Israela richihei sualna, ni chunga kin sualna thupha ki chôi lâiah hin ne kuar ne lei isungin ki tiang ni mâi ngat inla, ni bôi ṭongṭaina, ni zianga a sûn a zâna ni bôi Israela richihei ki ngên pêkna hi ne lei ringai pêk roh. Keimah neh ki pa insunghei chu kin lei îsual tâk a nit.

⁷Ni chungah ṭhano takkan thil kin lei tho tâk a, ni bôi Mosia zianga nî pêk, thupêkhei, dânhei, roirêlhei kha lei zôm khâi mang ung a.

⁸Ni bôi Mosia ziangah, ‘Ki chungah nin iamom no a nitin chu nam tin lâiah nangni thekindar ki ti.

⁹Khannisela, ki tiang nin hong ngat nôk a, ki thupêkhei nin zômin chu nin lâia mi kôlkomong idêna rithekindar om khom sela, khantak ata khom kha hong ṭhui nôk ki ta, ker ming omna ranga ki înkung munah khan ṭhui bûm nôk ki ti,’ itia thu ni ne ipêk khah lungkhamin ne reh pêk mai roh.

¹⁰“Khante, hi mihei hih ni bôihei neh ni mihei, ni sinthotheina roinpui tak neh ni kut irât takka ni irtlan suakhei chu an nit a.

¹¹O PUMAPA, lungkhamin ni bôi ṭongṭaina neh nangma ṭitu ni bôihei ṭongṭainaah hin ne kuar ne lei sung pêk roh. Vuanah hin ni bôi hi thluan nen tlung inla, hi rêng hi ki chungah lungkhamna nei rangin siam roh,” ki ti a. Kha lâiah khan kei chu rêng kilât ipetu ki nit a.