Read Biete NEHEMIA 10 Bible Online

NEHEMIA 10 - Biete bible

NEHEMIA 10

¹Kha an ṭonginkung namindetpui masa tak chu Hakalia naipa, ram optu Nehemia a nit a, kha rizoiin Zedekia a nit. Khanungchu, hi a nuaiahei hin an riming an riziak a.

²Thiampuhei: Seraia, Azaria, Jeremia, Pasura, Amaria, Malkija, Hatusa, Sebania, Maluka, Harima, Meremota, Obadia, Daniela, Ginethona, Baruka, Mesulama, Abija, Mijamina, Maazia, Bilgaia, Semaia hei an nit.

⁹Levia chihei: Azania naipa Jesua, Henadada naihei lâia mi Binuia, Kadmiela, Sebania, Hodia, Kelita, Pelaia, Hanana, Mika, Rehoba, Hasabia, Zakura, Serebia, Sebania, Hodia, Bania, Beninua hei an nit.

¹⁴Mipui ruaituhei: Parosa, Pahat Moaba, Elama, Zatua, Bania, Bunia, Azgada, Bebaia, Adonija, Bigvaia, Adina, Atera, Hezekia, Azura, Hodia, Hasuma, Bezaia, Harifa, Anathota, Nebaia, Magpiasa, Mesulama, Hezira, Mesezabela, Zadoka, Jadua, Pelatia, Hanana, Anaia, Hosea, Hanania, Hasuba, Halohesa, Pilha, Sobeka, Rehuma, Hasabna, Maaseia, Ahia, Hanana, Anana, Maluka, Harima, Baana hei an nit.

²⁸Keini Israel mipuihei, Thiampuhei, Levia chihei, Tempil vêngtuhei, Lâ saktuhei, Tempil sinthotuhei neh mi danghei murdi Pathian dân izôma kin rama nam danghei ata a rana om murdihei, kin nupuihei neh kin naihei murdi thil rife dân ireh thei tâkhei khan,

²⁹Kin ruaituhei ithlop ngitin, Pathian bôi Mosia ipêk Pathian dân izôm rangin vâni kin irsâm a nit.PUMAPA kin Rêngpa thupêk murdihei neh a roirêlhei neh ân riseinahei murdi chu izôma vong rangin kin înkung a nit.

³⁰Nam dang, kin rama omhei neh rinei pol no ning ung e.

³¹Kin rama nam danghein sabat nî-ah khan manih, sûn iser danga manih buhei neh thil danghei kin ziangah an hong zuar khomin lei richoh no ning ung e. Kum sarina kum ikipah ram chu in-ôl kin ta, kin lâkai ritâng murdi ngaidam kin ti.

³²Kum tin, Pathian ina sinthona rangin tangkarua gram ringakah chit ipe kin înkung a nit.

³³Tempila Pathian biakna rangin ibai rithianghei, nîn tina hâlrivâm thillan rang ibaidihei, nîn tina ribôlnaa hâlrivâm thillan rang mîringhei, sabatnî hei, Thla thar ruaiṭhe hei neh hun bi nei kût dang dang heia hâlrivâm thillan rang mîring hei, thillan rithiang danghei, Israel nam pumpui sual ribôlna rang mîringhei neh kin Pathian ina mang rang â nang murdihei chu hong tum kin ti.

³⁴Dân bua riziak angkan keini mipuihei, thiampuhei neh Levia chihei hin PUMAPA, kin Pathian mâichâma ribôlna thillan hâlna rang thing hong ilatu rang panam riatna rangin kum tin thla sân ngai kin ti.

³⁵Kum tin kin loia bu vâng masa tak neh thei chi tinrêng râ masa tak kha PUMAPA inah chôi ngai kin ti.

³⁶Dâna riziak angkan kin naiipa masa tak chu kin Pathian inah thiampu ziangah ṭhui kin ta, amakhan kin Pathian ziangah ani chu lan kin ti. Khabanah kin serât lôm, kin kêl lôm, kin bera lôm lâia a tê suak masa takhei khom lan sa ngai kin ti.

³⁷Tempila thiampuhei ziangah bu thar ivânga ibai thliam kin isiam masa takhei chu kum tin chôi kin ta, kin uainhei, oliv riakhei neh thei chi tinrênghei khom chôi kin ti. Kin loia vâng sômka khatkah kha â dong ranga inkung, loima nei ngai khuaheia a sôma khatkah rifuang ngai Levia chihei chu pêng kin ti.

³⁸Khante, Levia chihein sômka khatkah an lâk lâiin Arona richi thiampuhei kha Levihei ziangah khan an om rang a nit a, Levia chihei khan sômka khatkah an ilâk ata sômka khatkah kha Tempila mang rangin Tempil neinunsiana chontanah khan an sia rang a nit.

³⁹Israel mihei neh Levia chihei khan ngaihoi thillan buhei, uainhei neh riakhei kha Tempil bûrbêl siana, Tempil sinthotu rang Thiampuhei, Tempil vêngtuhei, Lâ saktuhei omna chontanah khan an sia rang a nit. Pathian in chu ithla tlak no ning ung e.