Read Biete NEHEMIA 11 Bible Online

NEHEMIA 11 - Biete bible

NEHEMIA 11

¹Nam ruaituhei kha Jerusalemah an om a; insûngkua sômka kipah insûngkua khatkah kha Jerusalem khopui rithianga om rangin thlasânin an rithlang a; insûngkua dang chu kho dang danga om rangin an fe tâk a.

²Lungihoi takka Jerusalema om ranga ripe murdihei chu mipuihei khan an inpâk a.

³Khopuihei neh kho dang dangheiah khan chu Israel mipuihei, thiampuhei, Levia chihei, Tempil sinthotuhei neh Solomona som richihei kha an mani khuaah, mahni in neh loi chitah an iom a nit. Hihei hi Judai rama mi, ruaitu ual Jerusalem khuaa omhei chu an nit:

⁴Juda nam lâia mi: Zakaria nai Uzia naipa Athaia: Ani hi Juda naipa Pereza richihei lâia mi a nit. A puhei chu Amaria, Sefatia, Mahalalela hei an nit.

⁵Kolhozea nai Baruka naipa Maaseia: Ani hi Juda nai Sela richihei lâia mi a nit. A puhei chu Hazaia, Adaia, Joiariba, Zakaria hei an nit.

⁶Pereza richihei, mi hâi Jerusalema om murdi chu mi rizalika sômirukka iriatkah an nit.

⁷Benjamina nam lâia mi: Joeda nai Mesulama naipa Salua; a puhei chu Pedaia, Kolaia, Maaseia, Jesaia hei an nit.

⁸Salua suapui Gebaia neh Salaia hei khom Jerusalema an om sa a. Benjamina richi Jerusalema omhei chu an rêngkan mi rizakuakka sôminika iriatkah an nit.

⁹Zikria naipa Joela chu an ruaitu tak a nit a; Hasenua naipa Juda chu kho ruaitu tak thuai zela ruaitu a nit.

¹⁰Thiampuhei lâia mi: Joiariba naipa Jedaia neh Jakina.

¹¹Mesulama nai Hilkia naipa Seraia; ani hi a puhei chu Zadoka, Meraiota neh thiampu lal tak Ahituba hei an nit.

¹²Hi urêng Tempila sin ithohei chu an rêngkan mi rizariatka sôminika inikah an nit. Pelalia nai Jerohama naipa Adaia; ani hi a puhei chu Amzia, Zakaria, Pasura, Malkija hei an nit.

¹³An rêngkan hi urênghei hih an insungkua ruaituhei kha mi rizanika sômilika inikah an nit.

¹⁴Azaia nai Azarela naipa Amasaia; ani hi a puhei chu Mesilemota neh Imera hei an nit. Hi urênghei hi mi rizalei sôminika iriatkah an om a, râlpa an nit. An ruaitu chu Hagedolima naipa Zabdiela a nit.

¹⁵Levia chihei lâia mi: Azrikama nai Hasuba naipa Semaia; ani hi a puhei chu Hasabia neh Bunia hei an nit.

¹⁶Sabethaia neh Jozabada; anni hi Levia chi, mi inlâr tak, Tempil putiang sin enkoltuhei an nit.

¹⁷Asafa richi, Zabdia nai Mika naipa Matania; ani hi Tempila lômthu ril ṭongṭaina lâ sak ruaitu a nit. Bakbukia; ani hi Matania rithloppuitu a nit. Galala nai Samua naipa Abda; ani hi Jeduthuna richia mi a nit.

¹⁸Khopui rithiang Jerusalema Levia chi â om murdi chu an rêngkan mi rizanika sômiriatka ilikah an nit.

¹⁹Tempil vêngtuhei: Akuba, Talmona neh an suapuihei, an rêngkan mi rizalei sômsarika inikah an nit.

²⁰Israelhei mi danghei chu thiampuhei neh Levia chihei neh khan Judai ram khotinah mahni in chitah an om a.

²¹Tempil sinthotuhei chu Jerusalem sung Ofel an iti munah khan an om a; Ziha neh Gispa chu an ruaituhei an nit.

²²Levia chihei lâia an ruaitu tak Jerusalem khuaa om chu Hasabia nai Bania naipa Uzia a nit. A puhei chu Matania neh Mika hei an nit. Asafa richihei lâia mi a nit a, Tempil inkhômnaa lasakna tianga ngaituatu panamhei an nit.

²³Nîn tina Tempila lâ saktuhei rithlâk kual rang dân chu rêng thupêk iom thlâm a nit.

²⁴Juda nama mi, Zera richi Mesezabela naipa Pethahia chu Persia rêng roirêlnaa Israel mihei rithûla dingtu a nit.

²⁵Khante, mipuihei kha an loima nâi khuaheiah khan an om a. Juda nama mi ṭhenkahei chu Kiriat-arba neh a kôl khotehei, Dibon neh a kôl khotehei, Jekabzeel neh a kôl khoteheiah khan an om a.

²⁶Jesua khuahei, Molada khuahei, Beth-Pelet khuahei khomah khan an om a.

²⁷Hazar-Shual khopuihei, Beerseba neh a kôl khoteheiah khan an om a.

²⁸Ziglag khopuihei, Mekona khopui neh a kôl khotehei;

²⁹Enrimon hei, Zora hei, Zarmut hei,

³⁰Zanoa hei, Adulam hei neh an kôl khotehei khomah khan an om a. Lakis neh a kôl loimunhei, Azeka neh a kôl khoteheiah an om a. Khanchu, sim tiang Beerseba ata mâr tiang Hinom Phâi kâr ram kha om munin an idel a nit.

³¹Khante, Benjamina richihei chu Gebaah hei, Mikmasaah hei, Aiah hei, Bethelah hei neh a kol khoteheiah an om a.

³²Anathotah hei, Nobah hei, Ananiaah hei,

³³Hazorah hei, Ramaah hei, Gitaimah hei;

³⁴Hadidah hei, Zeboimah hei, Nebalatah hei;

³⁵Lodah hei, Onoah hei kutthiamhei phâi a khan an om a.

³⁶Khante, Judai rama om ngai Levia chihei lâia mi ṭhenkah chu Benjamina richihei omnaah khan an om sa a.