Read Biete NEHEMIA 2 Bible Online

NEHEMIA 2 - Biete bible

NEHEMIA 2

¹Sûnkah chu rêng Artazerzia kha kum sôminikah ân lal kum Nisan thlaah khan khalai a ot lâiin, uain an hong isung khah ki chôi a, rêng khah ki pêk a, kha maah khan chu ki ngaisiat mêl rêng rêng la mu ngai mak a.

²Khanchu, rêng khan ki ziangah, “Nî dam ino lak ni mak a, îtho tâk im ngaisiat mêl ni irput tâk? Thil dang ni no nih, ni lungril tiang ai ngûi a nit hi na,” a ne ti a. Khanchu, ki ṭi tak tak a.

³Rêng ziangah khan, “Rêng chu kumkhuakan dam mai riseh. Ki chibulhei thlân omna khuaa a kotkhârhei chu a ramin a kâng riai tâk a, beidong mêl ripu no thei im nîng ki ta?” ki ti a.

⁴Khanchu, rêng khan ki ziangah, “Im nî tho nuam?” a ti a. Rivân Pathian ziangah ki ṭongṭai tâk a,

⁵khanchu, rêng ziangah khan, “Rêng ṭhat ti lam a nit a, ni bôi hin ni mit kî tlung a nitin chu, Judai ramah, ki chibulhei thlân omna khuaah nen fen la, khua chu la hang siam inṭha rong,” ki ti a.

⁶Rêngpa kôlah khan rêngnu khom â ṭhung a, Rêngpa khan ki ziangah, “Itena sôt im ni va thang rang, tikin im ni hong kîr nôk rang?” a ti a. Khante, ki va thang rang dôr hei, ki hong kîr nôk rang zoro hei ke ril a; khanchu, rêng khan ilôm takkan a ne phal tâk a.

⁷Khanungchu, rêng ziangah khan, “Rêng ṭhat ti lam a nitin chu Eufratis vadung râl thlang tiang bial optuhei kha Judai ram ki tlung idêna an nen fe thal theina rangin phalna lekha ipe ni sela.

⁸Khante, rêng rampui ivêngtu Asafa ziangah khom Tempil lûtna kotkhâr rang hei, khopui kulpui rang hei neh ki omna in sinna rang thinghei a ne pêk theina rangin lekha ne peh sa roh,” ki ti a. Khante, Pathian ki ziangah a om sikin kî zong murdi kha rêng khan a ne pêk a.

⁹Khanchu, rêng khan sipai ruaituhei neh sipai sakor chungchuang mihei kha keima lômin a tir sa a, Eufratis vadung râl thlang bial optuhei ziang chu ki hang tlung a, rêng lekhahei khah an ziangah ki pêk a,

¹⁰Khannisela, Horon khua mi Sanbalata neh Amon biala milian khatkah Tobia khan an lei riatin chu Israel mihei ṭhatna ranga sinthotu hong chu an ilung lei hoi tlak mak a.

¹¹Khante, Jerusalem ki hang tlung a, sûn thumkah ker ngam a.

¹²Pathianin Jerusalem khua ranga itho rang a ne ipêk ki lungrila ai sia kha tute iril mang a. Khanungchu zânlâiah ki thoi a, ki mal ṭhenkahei neh kin fe suak a. Kin chuangna sakuartung ti no chu sa dang ṭhui mang ung a.

¹³Khante, zânah khan tlâk lam tianga Phâi Kotbâiah khan kin suak a, sim tianga Dragon Tuisunsua tiang neh Nimnok Kotbâi tiang kin fe a. Jerusalem kulpui ichim neh a kotkhâr ikânghei khah iṭha takkan ki en vêl a.

¹⁴Khanungchu, khopui sua tiang ata mâr tiang Tuisunsua Kotbâi neh Rêng Dîl idênin kin fe a; khanniseh, kin chuangna sakuartung kha lung ichim rem rum kârah khan fe thleng thei khâi mak a.

¹⁵Khanchu, Kidron varuam kha kin zui a, kulpui kha ki en vêl mai a. Khanungchu, ki zuangna lampui ngirah khan ki kîr nôk a, Phâi Kotbâiah khan khopui ki lût nôk tâk a.

¹⁶Khuaa milianhei khan takâm kî fe a, im kî tho iti khom îte reh mak e. Ki chipui, Juda thiampuhei, roirêltuhei, ruaituhei neh sin itho rang mihei rêng rêng ziangah khom îte la sîr pêk mang a.

¹⁷Khanungchu, an ziangah khan, “Ei chan siat zia hih nin mu a, Jerusalem a ram iti hei, a kotkhârhei a kâng zoi tâk itihei khom nin riat a. Tho ta u, sîrinsia ei nit khâi nona rangin Jerusalem rikul chu inding nôk ei ti u,” ki ti a.

¹⁸Khante, anni chu ki Pathian ne ditsak thuhei neh ki zianga rêng thusîrhei khom ke ril a. Khante, anni khan, “Tho, lei inding titak rei u,” an ti a. Khanchu, kha sin iṭha tho rangah khan an kut an inrât a.

¹⁹Khannisela, Sanbalata neh Tobia neh Arab mi Gesema hei khan kin thiltum khah an riatin chu nuizabûrin an ne mang a, an ne musit a, “Nin sintho hi ingkah tliam ai nit? Rêng chungah nin irhel rang na?” an ne ti a.

²⁰Anni chu ki sâm a, an ziangah, “Rivân Pathianin thluantlungna ne pêng a ti. Keinihei chu a bôihei kin nit a, thoi kin ta, inding kin ti. Nangni rêk chu Jerusalemah hin rangtum manih, thuneina manih, inung ima manih, khom nei viat mak chei,” ki ti a.