Read Biete NEHEMIA 3 Bible Online

NEHEMIA 3 - Biete bible

NEHEMIA 3

¹Khopui kulpui siam inṭhat nôk dân chu hingka hin a nit. Thiampu laltak Eliasiba neh a thiampu champuihei khan Bera Kotbâi khah an siam inṭhat a; an thâr a, a kotkhârhei an ikhop a. Rizaka Inrisâng neh Hananela Inrisâng idênin an thâr inrithiang a.

²Â zom zelah khan Jeriko mihein an siam a. Khante, anmani zom zel kha Imria naipa Zakura khan a siam a.

³Khante, Inga Kotbâi khah Hasena naipahein an siam a, a kotngulhei an siam a, a kotkhâr kalhei an siam a, â kalnahei an ikhop a.

⁴Anni zomah khan Hakoza nai Uria naipa Meremota hei khan an siam ṭhat a. Anni zom zelah khan Mesezabela nai Berekia naipa Mesulama hei khan an siam ṭhat a. Khante, anni zom khah Baana naipa Zadoka hei khan an siam inṭhat a.

⁵Khante, anni zom zel khah Teko kho mihein an siam inṭhat a. Khanniseh, an khua milianhei khan ruaituhein sintum an pêk lam angkah khan tho nuam mak e.

⁶Khante, Kotbâi Ilui khah Pasea naipa Joiada neh Besodaia naipa Mesulama khan an siam inṭhat a, a kalhei an siam a, a kotkhârhei, â kalnahei neh a kalhei kha an siam a.

⁷Khante, anni zom khah Gibeon mi Melatia neh Meronot mi Jadona neh Eufratis vadung râl thlang tiang ram optu thu nuaia om Gibeon kho mihei neh Mizpa kho mihei khan an siam inṭhat a.

⁸Â zom zel khah rângkachak siamtu lâia mi Harhaia naipa Uziela hei khan an siam inṭhat a. Khante, â zom zel khah namhoi siamtu lâia mi Hanania hei khan an siam inṭhat a, Kulpui Isa dênin an siam inṭhat a.

⁹Khante, anni zom zel khah Jerusalem khua neh a kôlvêl ram rizâtka thuneitu Hora naipa Refaia hei khan an siam inṭhat a.

¹⁰Anni zomah khan Harumafa naipa Jedaia khan ama in ridîn khah a siam inṭhat a. Khante, â zom zel khah Hasabneia naipa Hatusa hei khan an siam inṭhat a.

¹¹Harima naipa Malkiza neh Pahat Moaba naipa Hasuba hei khan anni zom zel khah Meipui Sêmna Inrisâng neh khan an siam inṭhat a.

¹²Khante, anni zom zel khah Jerusalem neh a kôlvêl ram rizâtka thuneitu Halohesa naipa Salumana hei khan an siam inṭhat a, a nainuhei khomin an san a.

¹³Phâi Kotbâi khah Hanuna neh Zanoa khua mihei khan an siam inṭhat a. A kotkhâr hei an ikhop a, â kalna hei neh â kuatna hei an siam a. Khante, Nimnok Kotbâi idênin kulpui kha mûk sângkah an siam sa a.

¹⁴Nimnok Kotbâi kha chu Rakeba naipa Malkija, Beth-Hakerem bial thuneitu khan a siam inṭhat a. A kotkhârhei â khop a, â kalnahei neh â kuatnahei a siam a.

¹⁵Khante, Kolhozea naipa Saluma, Mizpa bial thuneitu khan Tuisunsua Kotbâi kha a siam inṭhat a. A kotbâi lu chung bang khom a siam a, a kotkhârhei â khop a, a kalhei neh â kuatnahei a siam a. Rêng rikul kôla Sela dîl rikama kul bang kha Davida khua rithoka zuang ṭumna kalbi dênin a siam inṭhat sa a.

¹⁶Khante, â zom zel khah Azbuka naipa Nehemia, Beth-Zur bial ritiaka thuneitu khan Davida thlân neh dîl tial neh râlpahei in idênin a siam inṭhat a.

¹⁷Kha khêlah khan hi Levia richihei hin kulpui ṭhen itam takkah khah an isiam inṭhat a nit. Nehemia siamna zom zel khah Bania naipa Rehuman a siam inṭhat a. Â zom zel khah Hasabia, Keila bial ritiaka thuneitu khan ama bial rimingin a siam inṭhat a.

¹⁸Â zom zel khah Henadada naipa Bavaia, Keila bial ritiaka dang thuneitu khan a siam inṭhat a.

¹⁹Khante, â zom zel khah Jesua naipa Ezera, Mizpa thuneitu khan râlthluk siana ridîn ata kulpui kôi riphutna dênin a siam inṭhat a.

²⁰Â zom zel khah Zabaia naipa Baruka khan kulpui kôi riphutna ata thiampu laltak Eliasiba in kotsua dênin a siam inṭhat a.

²¹Â zom zel khah Hazoka nai, Uria naipa Meremota khan Eliasiba in mongna dênin a siam inṭhat a.

²²Kha khêlah khan hi thiampuhei hin kulpui kha ṭhen itam takkah an isiam inṭhat a nit. Â zom zel khah Jerusalem kôlvêla thiampuhei khan an siam inṭhat a.

²³Anni zom zel khah Benjamina neh Hasuba khan an in ridîn kha an siam inṭhat a. Anni zom zel kha Anania nai, Maseia naipa Azaria khan a in ridîn kha a siam inṭhat a.

²⁴Â zom zel khah Henadada naipa Binuia khan Azaria in ridîn ata Kulpui Kilkôi idênin a siam inṭhat a.

²⁵Â zom zel kha Uzaia naipa Palala khan kulpui kilkôi riphutna ata vêngtuhei omna, rêng in chuanchung risâng ual kôl idênin a siam inṭhat a.

²⁶Khante, â zom zel khah Parosa naipa Pedaia hei khan sak tiang kha Tuikuang Kotbâi, Tempil kôla in risâng omna dênin an siam inṭhat a. Hi mun vêl hih Tempil sinthotuhei omna a nit, arming kha Ofel an ibe a nit.

²⁷Â zom zel khah Tekoa kho mihei khan an chan inikna kha Tempil kôla in risâng ata Ofel kôl kulpui idênin an siam inṭhat a.

²⁸Sakor Kotbâia rithoka mâr tiang kha thiampuhein mahni in ridîn chit kha an siam inṭhat a.

²⁹Anni zom zel khah Imera naipa Zadoka khan a in ridîn kha a siam inṭhat a. Khante, â zom zel khah Sekania naipa Semaia, sua tiang kotbâi vêngtu khan a siam inṭhat a.

³⁰Â zom zel khah Selemia naipa Hanania neh Zalafa naipa â rukna Hanuna hei khan an chan â nikna kha an siam inṭhat a. Â zom zel khah Bekeria naipa Mesulaman a in ridîn kha a siam inṭhat a.

³¹Â zom zel khah rângkachak siamtu lâia mi Malkiza khan Tempil sinthotuhei omna in neh rivai mihei riakna in, Hamifkad an iti ridîn mârsak kulpui kil kôina dênin a siam inṭhat a.

³²Khante, â kila rithokin Bera Kotbâi idênin rângkachak siamtuhei neh rivai mihei khan an isiam inṭhat a nit.